မန္တလေးမှာ ရာအိမ်မှုးအမျိုးသား ပျုစောထီးတွေ ဝိုင်းရိုက်ခံရပြီးသေဆုံး

ဆိုင်းမင်း/People’s Spring

မန္တလေးတိုင်း၊ ပြည်ကြီးတံခွန်မြို့နယ်မှာ ရာအိမ်မှုး အမျိုးသား တစ်ဦး စစ်တပ်လက်ဝေခံ ပျုစောထီး အဖွဲ့ဝင်တွေ ဝိုင်းရိုက်ခံရပြီး သေဆုံးသွားတဲ့ဖြစ်စဉ် ပြီးခဲ့တဲ့ရက်ပိုင်းက ဖြစ်ပွားခဲ့ပါတယ်။

ရိုက်နှက်ခံရလို့သေဆုံးသူဟာ သင်ပန်းကုန်းရပ်ကွက် ရာအိမ်မှုး ဦးမြင့်သိန်းဆိုသူဖြစ်ပြီး ဇန်နဝါရီလ ၃၁ ရက် ညပိုင်းက နေအိမ်ကို လာရောက်ရိုက်နှက်ကြတာလို့ ရပ်ကွက်အတွင်းနေထိုင်သူ က အသိပေးပါတယ်။

သင်ပန်းကုန်းရပ်ကွက် ၊ ၅၉ လမ်း ၊ ၁၂၂ လမ်းနဲ့ ၁၂၃ လမ်းကြားမှာ ရှိတဲ့ ဂျင်ဝိုင်းကို လိုင်းကြေးတောင်းရာကနေ မကျေနပ်မှုဖြစ်ပွား ပြီးနေအိမ်ထိလာရောက်ရိုက်နှက်သွားတာလို့ အဲဒီ ဒေသခံကပြောပြပါတယ်။

Public Service Announcement

ဂျင်ဝိုင်းဟာ ပျုစောထီးခေါင်းဆောင် ပေါက်ကိုယ်တော် ရဲ့ တပည့်တွေ ကြီးကြပ်တာလို့ သိရပါတယ်။

“အချင်းချင်းစားခွက်လုရင်းဖြစ်ကြတဲ့သဘောပဲ၊ အဲလောင်းကစားဝိုင်းက နာမည်ကြီးပဲ ” လို့ ရပ်ကွက်အတွင်းနေထိုင်သူတစ်ဦးကပြောပါတယ်။

မြန်မာနိုင်ငံရဲ့ ဒုတိယမြို့တော်ဖြစ်ပြီး စစ်ကောင်စီရဲ့အလယ်ပိုင်းတိုင်းစစ်ဌာနချုပ်အခြေစိုက်ရာ မန္တလေးမြို့မှာ ပျုစောထီးတွေကို မွေးထုတ်နေပြီး လက်နက်တပ်ဆင်ပေးသလို ရပ်ကွက်လုံခြုံရေးမှာပါ ပူးတွဲ တာဝန်ပေးတာကို စစ်ကောင်စီ က လုပ်ဆောင်ပါတယ်။

မန္တလေးမှာ ပျုစောထီးတွေဟာ လမ်းသွားလမ်းလာ ပြည်သူတွေကို လုံခြုံရေးအကြောင်းပြပြီး စစ်ဆေးတာ ၊ ငွေညှစ်တာတွေ ပြုလုပ်လေ့ရှိပါတယ်။

ပြီးခဲ့တဲ့ နှစ် စက်တင်ဘာလအတွင်းကဆိုရင် မန္တလေးမြို့ ၊ ချမ်းမြသာစည်မြို့နယ် ချောင်ချောင်ရွှေဆိုင်ပိုင်ရှင် နေအိမ် ဓားပြတိုက်မှုနဲ့ပတ်သက်ပြီးဖမ်းခံရသူတွေထဲ ပျုစောထီး ခင်မောင်စိုးဆိုသူ ပါဝင်ခဲ့ပါတယ်။

ခင်မောင်စိုးဆိုသူဟာ ပေါက်ကိုယ်တော်ရဲ့ တပည့်ဖြစ်ပြီး စစ်ကောင်စီလက်အောက်ခံ ရဲတပ်ဖွဲ့က လူမှားဖမ်းတာဖြစ်တယ်လို့ အဲဒီအချိန်က လူမှုကွန်ရက်မှာ ပေါက်ကိုယ်တော်က ရုပ်သံနဲ့ပြောကြားခဲ့ပေမယ့် အဲဒီရုပ်သံကို နောက်ပိုင်းမှာ ပြန်လည်ဖြုတ်ချသွားခဲ့ပါတယ်။