မန္တလေးမှာ စစ်တပ်ပစ်ခတ်မှုကြောင့် ဒဏ်ရာရသွားတဲ့ ပြည်သူ ၃ဦးကို စစ်ကောင်စီက ကျပ်သိန်း ၁၂၀ပေးပြီး ကျည်ခွံတွေသိမ်းသွား

ဒီဇင်ဘာ-၂၉၊ ၂၀၂၅။မေရီ/People’s Spring

မန္တလေးမြို့မှာ စစ်တပ်ရဲ့ပစ်ခတ်မှုကြောင့် ထိခိုက်ဒဏ်ရာရသွားတဲ့ ပြည်သူ ၃ ဦးကို စစ်ကောင်စီက ကျပ်သိန်း ၁၂၀ ပေးပြီး ကျည်ခွံတွေ လာသိမ်းသွားကြောင်း သတင်းရရှိပါတယ်။

ဒီဇင်ဘာ ၂၈ ရက် မနက် ၁ နာရီခွဲခန့်က တော်လှန်ရေးအင်အားစုတွေက မန္တလေးနန်းတွင်းကို ရှော့တိုက်ဒုံးနဲ့ ပစ်ခတ်ခဲ့ပြီးနောက် စစ်ကောင်စီက လက်နက်ကြီးနဲ့ ပြန်လည်ပစ်ခတ်ခဲ့လို့ အောင်မြေသာစံမြို့နယ်၊ ၅လမ်းနဲ့ ၈၆လမ်းအနီးရှိ ပြည်သူ့အိမ်တစ်လုံးပေါ် ကျည်ကျရောက်ကာ ပြည်သူ ၃ ဦး ထိမှန်ဒဏ်ရာရခဲ့ကြောင်း MDY Revolution အသိပေးပါတယ်။

မနက် ၆ နာရီခန့်မှာတော့ စစ်ကောင်စီက လက်နက်ကြီးကျတဲ့ ပြည်သူ့နေအိမ် ရောက်လာပြီး ပေါက်ကွဲထိမှန်တဲ့ ကျည်ခွံကို လာရောက်ရှာဖွေသိမ်းဆည်းသွားကြောင်း၊ နေ့လယ်ပိုင်းမှာလည်း ရဲမှူးအပါအဝင် စစ်အုပ်စုဝင်တွေ ထပ်မံရောက်လာပြီး ကျည်ခွံကိစ္စ မေးခဲ့ကြောင်း MDY Revolution ထပ်မံအသိပေးပါတယ်။

Public Service Announcement

ဒါ့အပြင် ထိခိုက်ခံရတဲ့ မိသားစုကို ကျပ်သိန်း ၁၂၀နဲ့ ခြေတု၊လက်တု စီစဉ်ပေးမယ်လို့ ပြောပြီး ​တောင်းပန်သွားတယ်လို့ MDY Revolution ဆိုပါတယ်။

“သူတို့(စစ်ကောင်စီ)ရမ်းသမ်းပစ်တဲ့ဟာ ကျတာ။ မန်းတိုင်းဝန်ကြီးချုပ်ကိုတိုင်လည်း ၄လုံးကျတာ ဝန်ခံထားတော့ အဖြေကရှင်းပါတယ်။”လို့ ဒေသခံတစ်ဦးက ပြောပါတယ်။

မန္တလေးနန်းတွင်းက အလယ်ပိုင်းတိုင်းစစ်ဌာနချုပ်ကို ရှော့တိုက်ဒုန်း ငါးလုံးပစ်ခဲ့တာဖြစ်ပြီး လေးလုံးအောင်မြင်ခဲ့တယ်လို့ BWMက ထုတ်ပြန်ထားပါတယ်။

အဲဒီစစ်ဆင်ရေးကို BWM ရဲ့ ဦးဆောင်မှုနဲ့ No More Dictatorship (NMD-PDF) ၊ Shadow (အညာ) နဲ့ Infinity စတဲ့ ပူးပေါင်းအဖွဲ့တွေ လုပ်ဆောင်ခဲ့တာဖြစ်ပြီး စစ်ကောင်စီတပ် နှစ်ဦးသေဆုံးကာ ထိခိုက်မှုများနိုင်တယ်လို့ BWM ကဆိုပါတယ်။

ရှော့တိုက်ဒုန်းလေးလုံးထဲက သုံးလုံးဟာ ကျုံးအတွင်းကျခဲ့ပြီး တစ်လုံးကတော့ နန်းတွင်းအတွင်းကို ကျ‌တာကြောင့် ထိခိုက်သူနှစ်ဦးရှိတယ်လို့ စစ်ကောင်စီခန့် မန္တလေးတိုင်းဝန်ကြီးချုပ်က စစ်ကောင်စီ ထောက်ခံတဲ့ မီဒီယာတွေကို ပြောထားပါတယ်။