ဒီဇင်ဘာ-၃၁၊၂၀၂၅။ဇော်ဝင်း/People’s Spring
မကွေးတိုင်း၊သရက်မြို့နယ်က စစ်ကောင်စီရဲ့ အမှတ်(၁၂)ကာကွယ်ရေးပစ္စည်းစက်ရုံ(ကပစ-၁၂)စည်းရိုးဖြစ်တဲ့ဆင်ကော်တပ်စခန်းကို တော်လှန် ရေးတပ်ဖွဲ့တွေ ပိတ်ဆို့တိုက်ခိုက်နေတယ်လို့ ဒေသခံသတင်းရင်းမြစ်အချို့က လူထုနွေဦးကို ပြောပါတယ်။
ကပစ(၁၂)ရဲ့အနောက်ဘက်(၁၀)မိုင်ဝန်းကျင်မှာရှိတဲ့ စစ်ကောင်စီရဲ့ ဆင်ကော်ရွာတပ်စခန်းကို တော်လှန်ရေးတပ်ဖွဲ့တွေက ဒီဇင်ဘာ ၂၄ ရက်ကစ စီးနင်းတိုက်ခိုက်ပြီး ဒီကနေ့ (ဒီဇင်ဘာ ၃၁ ရက်)မှာ စခန်းကိုပိတ်ဆို့ထားနိုင်တယ်လို့ ဆိုပါတယ်။
“စခန်းထဲမှာရှိတဲ့အင်အား ၃၀လောက်ကလုံးဝကိုအပြင်မထွက်နိုင်တော့ဘူး။အကုန်လုံးပိတ်မိနေပြီ။တော်လှန်ရေးတပ်တွေကတော့ ပိတ်ဆို့ထားတုန်းပဲ”လို့ သရက်မြို့နယ်စစ်ရေးသတင်းရင်းမြစ်က ပြောပါတယ်။
Public Service Announcement
စစ်ကောင်စီကစခန်းမကျရေးအတွက်ကပစ(၁၂)ကနေ စစ်ကူစေလွှတ်နေပြီး လက်ရှိမှာ အောက်မမြင့်ကျေးရွာကို ရောက်နေပြီလို့ သိရပါတယ်။
“ကပစ(၁၂)ကနေအင်အား ၅၀ ကျော်ပါတဲ့စစ်ကြောင်းက ၂၈ရက်ကနေ ထွက်လာတယ်။အခု ဒီနေ့ အောက်မမြင့်ရွာကို ရောက်နေပြီ။ရွာက ပြည်သူတွေကို ရွာလယ်မှာစုပြီး နေအိမ်တွေကပစ္စည်းတွေကို ယူနေတယ်”လို့ သရက်မြို့ခံတစ်ဦးက ပြောပါတယ်။
ဒါ့အပြင် စစ်တပ်ရဲ့လက်နက်ကြီးပစ်ခတ်မှုတွေနဲ့ စစ်ကြောင်းက မီးရှို့တာတွေကြောင့် နေအိမ်တွေ မီး လောင်ပြီး စစ်ဘေးရှောင်နေရတဲ့ ပြည်သူတွေ များတယ်လို့ သူကဆက်ပြောပါတယ်။
ဆင်ကော်တပ်စခန်းတိုက်ခိုက်မှုနဲ့ပတ်သက်လို့သရက်ခရိုင်စစ်ရေးတာဝန် ခံကို လူထုနွေဦးက ဆက်သွယ် မေးမြန်းနေဆဲ ဖြစ်ပါတယ်။
“ဆင်ကော်စခန်းကတကယ့်ကိုအခိုင်အမာတည်ဆောက်ထားတာ။ဘန်ကာတွေ၊ဆက်သွယ်ရေးတူးမြောင်းတွေကအစရှိတယ်။ကပစ (၁၂)ရဲ့စည်းရိုး လို့ပြောလို့ရတယ်”လို့သရက်မြို့နယ်စစ်ရေးသတင်းရင်းမြစ်ကရှင်းပြပါတယ်။
လတ်တလောတိုက်ပွဲအခြေအနေအရစစ်တပ်ကဒရုန်းနဲ့ကာမီကာဇေ (အသေခံဒရုန်း)တွေအသုံးပြုနေပြီးအဲဒီထဲကဒရုန်းတချို့ကိုတော်လှန် ရေးတပ်ဖွဲ့တွေက သိမ်းဆည်းရရှိနေတယ်လို့ သိရပါတယ်။
စစ်ရေးအချက်အလက်တွေအရသရက်မြို့နယ်စခမ်းကြီးကျေးရွာနဲ့ ပိတောက်ပင်ကျေးရွာအနီးမှာရှိတဲ့ အမှတ်(၁၂)ကာကွယ်ရေးပစ္စည်းစက်ရုံ (ကပစ-၁၂ )က ၆၀ မမ၊ ၈၁ မမ နဲ့ ၁၂၀ မမ ဗုံးသီးတွေကို ထုတ်နေတာဖြစ်ပါတယ်။
