ဩဂုတ်−၁၂၊၂၀၂၆။ဖိုးသား/People’s Spring
မကွေးတိုင်း၊ သရက်မြို့နယ်မှာ စစ်တပ်စစ်ကြောင်းကို တိုက်တိုက်ခဲ့ရာ ထိခိုက်သေဆုံးသူတွေရှိတယ်လို့ ပြည်သူ့ကာကွယ်ရေးတပ်မတော်၊ သရက်ခရိုင် အမှတ်(၄)တပ်ရင်းက ဒီကနေ့ ဩဂုတ် ၁၂ရက်မှာ ထုတ်ပြန်ပါတယ်။
သရက် – မင်းတုန်း လမ်းပိုင်းအတိုင်း နယ်မြေရှင်းဖို့အတွက် မင်းတုန်းမြို့က ထွက်လာတဲ့ စစ်တပ်စစ်ကြောင်းကို ဒီကနေ့(ဩဂုတ် ၁၂ ရက်)နေ့လယ် ၁ နာရီခန့်မှာ တိုက်ခိုက်ခဲ့တာလို့ ဆိုပါတယ်။
အင်အား (၃၅)ဦးခန့်ပါတဲ့ အဲဒီစစ်ကြောင်းကို သရက်မြို့နယ် ပုဇဥ်းဒါးကျေးရွာအနီးမှာ အသင့်စောင့်ကြိုလက်ဦးမှုရယူပြီး မိုင်းဆွဲတိုက်ခိုက်တာအပြင် အပြန်အလှန်ပစ်ခတ်မှုတွေ ဖြစ်ခဲ့တယ်လို့ အသိပေးပါတယ်။
Public Service Announcement
မိနစ် ၃၀ နီးပါးကြာတဲ့ တိုက်ပွဲအတွင်းမှာ စစ်တပ်က ၉ ဦး သေဆုံးပြီး သရက်ခရိုင်အမှတ်(၄) တပ်ရင်းက ရဲဘော်တွေ အထိအခိုက်မရှိပြန်ဆုတ်နိုင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။
စစ်တပ်ရဲ့ထိခိုက်သေဆုံးမှုနဲ့ ပတ်သက်လို့ လူထုနွေဦးက သီးခြားအတည်ပြုမရသေးပါဘူး။
အခုဩဂုတ် ၁၀ ရက်ကလည်း သရက်-မင်းတုန်းလမ်းပိုင်းမှာ စစ်တပ်တိုက်ခိုက်ခံရပြီး သေဆုံးသူတွေနဲ့ လက်နက်နဲ့ခဲယမ်းတချို့ရရှိခဲ့ပါတယ်။
သရက်-မင်းတုန်းလမ်းပိုင်းဟာ စစ်တပ်အတွက် အရေးပါတဲ့ လမ်းပိုင်းဖြစ်ပြီး စစ်တပ်ရဲ့ အမှတ်(၁၂) ကာကွယ်ရေးပစ္စည်းစက်ရုံ (ကပစ−၁၂)နဲ့လည်းနီးတာကြောင့် စစ်တပ်က မကြာခဏ စစ်ကြောင်းထိုးတာနဲ့တပ်ဖြန့်တာတွေရှိတယ်လို့ သရက်ခရိုင် အမှတ်(၄)တပ်ရင်း တာ၀န်ရှိသူက ပြောပါတယ်။
ဒါ့အပြင် စစ်တပ်က သရက်-မင်းတုန်းလမ်းပိုင်း အသုံးပြုပြီး မင်းတုန်းမြို့နယ်အနောက်ခြမ်းက ရခိုင်ရိုးမကို စစ်ကြောင်းထိုးနေပေမယ့် ၂လကျော်ကြာတဲ့အထိ ရိုးမပေါ် မတက်နိုင်သေးဘဲ အနီးတဝိုက်ကျေးရွာတွေမှာပဲ တပ်ဖြန့်ထားတယ်လို့ သိရပါတယ်။
