မြင်းခြံမှာ စစ်ကောင်စီတပ်ကို တစ်ရက်တည်း နှစ်ကြိမ်တိုက်ရာ ၂ဦး ဖမ်းမိပြီး လက်နက်ခဲယမ်းအချို့သိမ်းရ

ဇန်နဝါရီ-၇၊၂၀၂၆။ဇေအောင်/People’s Spring

မန္တလေးတိုင်း၊ ​မြင်းခြံမြို့နယ်မှာ စစ်ကောင်စီတပ် ကို တစ်ရက်တည်း ၂ ကြိမ်တိုက်ခိုက်ခဲ့ရာ ၂ဦးကိုစစ်သုံ့ပန်းအဖြစ် ဖမ်းဆီးရမိပြီး လက်နက်ခဲယမ်းအချို့ပါသိမ်းရခဲ့ကြောင်း Myingyan Black Tiger(MBT)တပ်ဖွဲ့ရဲ့ခေါင်းဆောင် ဗိုလ်မိုက်ခဲက ပြောပါတယ်။

ဇန်နဝါရီ ၆ ရက် မနက် ၅ နာရီခန့်က မြင်းခြံမြို့နယ် လေးအိမ်တန်းကျေးရွာရှိ စစ်ကောင်စီတပ်အထိုင်ချထားတဲ့ ရွှေညောင်ပင်ဂိတ်ကို ဝင်ရောက်ပစ်ခတ်ခဲ့ရာ စစ်အုပ်စုဝင် ၁၀ဦးသေဆုံးခဲ့ပြီး ၂ဦးကို ဖမ်းဆီးနိုင်ခဲ့ကြောင်း ဗိုလ်မိုက်ခဲက ပြောပါတယ်။

“ လာပြီး စစ်ကူပေးတဲ့ စကစတပ်ကိုလည်း ကြားဖြတ်တိုက်နိုင်ခဲ့တယ်။ ခဲယမ်းမပြည့်စုံလို့ ပြန်ဆုတ်ခဲ့ရတဲ့အနေအထားရှိတယ်။ စစ်သုံ့ပန်း ၂ ဦးကို ဖမ်းဆီးထား​တာရှိပါတယ်။” လို့ ဗိုလ်မိုက်ခဲက ဆိုပါတယ်။

Public Service Announcement

အဲဒီနေ့ ည ၈ နာရီခန့်ကလည်း မြင်းခြံမြို့အနောက်ဘက် ပိုက်တဲကုန်းကျေးရွာအနီး ကင်းပတ်တဲ့ စစ်ကောင်စီတပ်သားတွေကို ကြားဖြတ်တိုက်ခိုက်ရာ ၃ဦးသေဆုံးကြောင်း Myingyan Black Tiger(MBT)တပ်ဖွဲ့က ထုတ်ပြန်ပါတယ်။ ဒါ့အ​ပြင် စစ်အုပ်စုဝင်တွေ ကိုင်ဆောင်လာတဲ့ MA1 သေနတ် ၁လက်နဲ့ ခဲယမ်းအချို့လည်း သိမ်းဆည်းရရှိခဲ့ကြောင်း အသိပေးပါတယ်။

“ ၃ယောက်သေတယ်။ တစ်ယောက်ကတော့ တဲကုန်းရွာနားသွားသေတယ်။ တစ်ယောက်ကတော့ ဘော်ဒီကော သူ့ဆီက MA1၊ ကျည်အချို့နဲ့ အီနာဂါ၊ ဖုန်းတစ်လုံး သိမ်းဆည်းရမိတယ်။” လို့ MBTတပ်ဖွဲ့ရဲ့ခေါင်းဆောင် ဗိုလ်မိုက်ခဲက ပြောပါတယ်။

မနက်ပိုင်းက စစ်ဆင်ရေးကို Myingyan Black Tiger (MBT)မြင်းခြံခရိုင်အမှတ်(၉)တပ်ရင်းနဲ့ Onemore စစ်ကြောင်း၊မြင်းခြံခရိုင် အမှတ်(၂) တပ်ရင်း၊မိုရှည်ဒါးယမ်းအဖွဲ့၊YLKတပ်ဖွဲ့၊အမေ့လက်ရုံးတပ်ဖွဲ့တို့မှ ပူးပေါင်းဆောင်ရွက်ခဲ့ပြီး ညပိုင်း စစ်ဆင်ရေးကိုတော့ Myingyan Black Tiger (MBT)မြင်းခြံခရိုင်အမှတ်(၉) တပ်ရင်းနဲ့ MGN အညာသားပြောက်ကျားတပ်တို့ ပူးပေါင်းဆောင်ရွက်ခဲ့ကြောင်း ထုတ်ပြန်ထားပါတယ်။

Myingyan Black Tiger (MBT)တပ်ဖွဲ့ဟာ ပြီးခဲ့တဲ့ ဒီဇင်ဘာအတွင်းကလည်း နွားကြီးမြို့နယ်၊ ကုန်းရွာ၊ မြင်းခြံမြို့နယ် ကျောက်ပြုတ်ရွာ၊ ကူကုန်းရွာတို့မှာ တပ်စွဲထားတဲ့ စစ်ကောင်စီတပ်ကို ဝင်ရောက်တိုက်ခိုက်ခဲ့ပါသေးတယ်။