ဇန်နဝါရီ-၁၂၊ ၂၀၂၆။ ထားမြတ်/People’s Spring
ချင်းပြည်နယ်၊ ဖလမ်းမြို့နယ် သီးဘွာလ်ကျေးရွာတိုက်နယ်ဆေးရုံကို အာဏာသိမ်းစစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့ကြောင်း ချင်းအမျိုးသားကာကွယ်ရေးတပ်(CNO/CNDF) ပြောရေးဆိုခွင့်ရှိသူ ဆလိုင်းတင်မီက ပြောပါတယ်။
ဇန်နဝါရီ ၁၁ ရက်ညပိုင်းမှာ တိုက်နယ်ဆေးရုံဗုံးကြဲခံရတာဖြစ်ပါတယ်။
“အထိအခိုက်တော့ မရှိပါဘူး။ ဒါပေမဲ့ အိမ်ပျက်စီးတဲ့ဟာတော့ရှိတာပေါ့။ တိုက်နယ်ဆေးရုံက အကုန်လုံး ပျက်စီးသွားတယ်။ နောက်ပြီး ဆေးရုံဝန်းထဲမှာ ရှိတဲ့ အဆောက်အအုံတွေလည်းပျက်စီးတယ်။ ပြည်သူ အဆောက်အအုံကတော့ တအိမ်ဘဲ ပျက်စီးတယ်လို့ ကျနော်တို့ သိရတယ်။ တခြားဟာကတော့ နည်းနည်း ထိခိုက်ရုံပျက်စီးရုံပေါ့။ လူကတော့ထိခိုက်မှုမရှိပါဘူး” လို့ ဆလိုင်းတင်မီက ပြောပါတယ်။
Public Service Announcement
အခု စစ်ကောင်စီ ဗုံးကြဲခဲ့တဲ့ဒေသဟာ လတ်တလောတိုက်ပွဲဖြစ်ပွားမှုမရှိတဲ့ နယ်မြေဖြစ်တယ်လို့ ပြောပါတယ်။
“အဲဒီ နေရာ သီးဘွာလ်က ၂၀၂၃ နိုဝင်ဘာလ ၁၅ရက်နေ့မှာ အဲဒီမှာ ရှိတဲ့ တပ်စခန်းရယ် ရဲလုံခြုံရေးဂိတ် ပေါ့နော် အဲဒါ အရင်တုန်းက ရှိတယ် ။အဲဒါ ကို ကျနော်တို့CNDFက သိမ်းပိုက်ထားတာဖြစ်ပါတယ်။ ဖလမ်း မြို့သိမ်း မတိုင်ခင် အထိ ရဲဂိတ်ကို CNDFက ထားထားပါတယ်။ ဒါပေမဲ့ မြို့သိမ်းပြီးတဲ့နောက်ပိုင်း ကျနော်တို့ မထားတော့ပါဘူး။ စစ်ရေးလှုပ်ရှားမှုလည်း မရှိသလို တော်လှန်ရေးဘက်က တပ်ချတာ ဘာမှ မရှိတဲ့နေရာဖြစ်ပါတယ်” လို့ ဆလိုင်းတင်မီက ပြောပါတယ်။
လေကြောင်း တိုက်ခိုက်ခံရလို့ တိုက်နယ်ဆေးရုံ အဆောက်အအုံထိခိုက်ပျက်စီးမှု ရုပ်သံကို The Voice of Chinland က ဖော်ပြထားတာတွေ့ရပါတယ်။
ဖလမ်းမြို့ကို CNDF ပါဝင်တဲ့ ချင်းညီနောင်မဟာမိတ်တပ်တွေက ၂၀၂၅ နွေကာလမှာ သိမ်းပိုက်ခဲ့တာဖြစ်ပြီး လက်ရှိမှာတော့ စစ်တပ်က ဖလမ်းပြန်ရရေး ထိုးစစ်ဆင်နေလို့ ဖလမ်းမြို့နယ်အတွင်း ချင်းတော်လှန်ရေး ပူးပေါင်းတပ်တွေနဲ့ စစ်ကောင်စီအကြား တိုက်ပွဲတွေဖြစ်ပွားခဲ့ပါတယ်။
