ဇန်နဝါရီ ၁၅၊ ၂၀၂၆။မေရီ/People’s Spring
စစ်ကိုင်းနဲ့ မန္တလေးတိုင်းမှာ စစ်တပ်ရဲ့ ပေါ်တာဆွဲဖမ်းဆီးမှုတွေ ဆိုးရွားနေပြီး လူငယ်အများအပြား ဖမ်းဆီးခံလိုက်ရကြောင်း ဒေသခံတွေက ပြောပါတယ်။
စစ်ကိုင်းတိုင်း၊ မုံရွာမြို့မှာ စစ်တပ်က ညနေ ၄ နာရီထိုးပြီးနောက်ပိုင်း ကား ၅စီးနဲ့ ပတ်ပြီး လူငယ်တွေ ရှာဖွေဖမ်းဆီးနေကြောင်း၊ မနေ့က ဇန်နဝါရီ ၁၄ရက် ညနေ ၅နာရီခွဲခန့်ကလည်း မုံရွာမြို့၊ သာစည်လမ်းမှာ လူငယ် ၃ဦးထက်မနည်း ဖမ်းဆီးသွားကြောင်း မြို့ခံတွေက ပြောပါတယ်။
“ညနေ ၅ နာရီနောက်ပိုင်း ရက်ဆက်ဆိုသလို ဆွဲနေတာ”လို့ မုံရွာမြို့ခံတစ်ဦးက ပြောပါတယ်။
Public Service Announcement
အလားတူ စစ်ကိုင်းမြို့မှာလည်း စစ်တပ်က နေ့ခင်းမှာတင် ပေါ်တာဆွဲနေပြီး ဒီကနေ့လည်း ကျော်ထက်ကွေ့မီးပွိုင့်နဲ့ မြို့ပေါ်နေရာတချို့မှာ လူငယ်တွေ ပေါ်တာဆွဲခံလိုက်ရတယ်လို့ မြို့ခံတွေက ပြောပါတယ်။
“ရတနာဗိမာန်ကျောင်းဝင်းအတွင်းက လေထိုးကျွတ်ဖာဆိုင်က အလုပ်သမားလေးတွေလည်း ပေါ်တာဆွဲသွားတယ်”လို့ ဒေသခံတစ်ဦးက ပြောပါတယ်။
မန္တလေးတိုင်းက ဝမ်းတွင်းမြို့နယ်မှာလည်း မနေ့က ညနေ ၅နာရီခန့်က ရွာရှည်ကျေးရွာ ကားလမ်းဘေးက ခြင်းဝိုင်းကို စစ်တပ်က ပေါ်တာဝင်ဆွဲလို့ လူငယ်တွေ အများအပြား ဖမ်းဆီးခံလိုက်ရကြောင်း Voice of Wundwin က ဖော်ပြပါတယ်။
ဖမ်းဆီးခံလိုက်ရသူတွေကို ကျပ်သိန်းရာချီနဲ့ ရွေးယူရတာတွေလည်းရှိနေကြောင်း ဒေသခံတွေက ပြောပါတယ်။
စစ်ကောင်စီဟာ မကြာခင် စစ်မှုထမ်းအပတ်စဥ် (၂၁) စတင်တော့မှာဖြစ်ပြီး အဲဒီအတွက် ပေါ်တာဆွဲဖမ်းဆီးမှုတွေ ပြုလုပ်နေတာဖြစ်ပါတယ်။
