ဇန်နဝါရီ-၁၇၊ ၂၀၂၆။ ဒလပန်း/People’s Spring
ပဲခူးတိုင်း ၊ ကျောက်တံခါးမြို့မှာ အရက်မူးစကားများရန်ဖြစ်ရာကနေ ရဲတပ်သားအချင်းချင်း သေနတ်နဲ့ အပြန်အလှန်ပစ်ခတ်ခဲ့ရာ ရဲတပ်သားဇနီးနဲ့ ရဲသုံးဦးသေဆုံးခဲ့တယ်လို့ ဒေသခံတွေက ပြောပါတယ်။
ဇန်နဝါရီ ၁၆ ရက် မနေ့ မနက် ၆ နာရီခွဲအချိန်မှာ ကျောက်တံခါးမြို့ မြောက်ဖက်အထွက် နတ်စင် တာဆုံဂိတ်စခန်းက ရဲတပ်ဖွဲ့ဝင်တွေဟာ အရက်မူးစကားများရန်ဖြစ်ခဲ့ကြပြီး အချင်းချင်းအပြန်အလှန်ပစ်ခတ်ခဲ့တာလို့ သိရပါတယ်။
“သူတို့အချင်းချင်း အရက်မူးပြီး စကားများကြတာ။ ဗိုလ်လေးက အရင်ပစ်တာ။ ရဲတပ်သားမွန်လေးရဲ့ မိန်းမ မသက်မာကို ထိတယ်။ အဲ့တာနဲ့ မွန်လေးက သေနတ်လုပြီး ပြန်ပစ်တာ သုံးယောက်သေသွားတာ”လို့ ကျောက်တံခါးမြို့ခံ အမျိုးသားတစ်ဦးက ပြောပါတယ်။
Public Service Announcement
ပစ်ခတ်မှုဖြစ်ပွားပြီးနောက် ရဲတပ်သားမွန်လေး ထွက်ပြေးလွတ်မြောက်သွားပြီး အခုဖြစ်စဉ်ကို ရဲတပ်ဖွဲ့က ဖုံးကွယ်ထားတယ်လို့ ဒေသခံတွေက ပြောပါတယ်။ ရဲတပ်သားမွန်လေးနဲ့ သူ့အမျိုးသမီး မသက်မာတို့ဟာ လက်ထပ်ထားတာ တစ်လခန့်သာ ရှိသေးတယ်လို့ သိရပါတယ်။
သေဆုံးသွားတဲ့ ရဲတပ်သားသုံးဦးထဲမှာ တစ်ပွင့် အဆင့်အရာရှိတစ်ဦးပါဝင်တယ်လို့ ဒေသခံတွေကပြောပါတယ်။
ရဲတပ်ဖွဲ့ဝင်တွေက လွတ်မြောက်သွားတဲ့ ရဲတပ်သားမွန်လေးကို မနေ့က ညနေပိုင်းမှာ ရန်ကုန်-မန္တလေးအမြန်လမ်းအနီး မြို့ချောင်းကျေးရွာအနီးက ကင်းရွာမှာ ပစ်ခတ်အသေဖမ်းဆီးခဲ့တယ်လို့ သိရပါတယ်။
