စစ်တပ်လွှတ်​တော်ဒုတိယ​​နေ့မှာ စစ်တပ်ကကျောက်တံခါးကိုစစ်​ကြောင်းထိုး ပစ်ခတ်လို့ကလေးငယ်၁ဦး​သေဆုံး၊၂ဦးဒဏ်ရာရ

မတ် – ၁၈၊၂၀၂၆။ဒလပန်း/People’s Spring

စစ်တပ်လွှတ်​တော်​ခေါ်တဲ့ ဒုတိယ​နေ့မှာ ပဲခူးတိုင်း၊ကျောက်တံခါးမြို့နယ်မှာ စစ်ကြောင်းထိုးနေတဲ့ စစ်သားတွေက ၂ နှစ်အရွယ် ကလေးငယ်တစ်ဦးကိုပစ်ခတ်သတ်ဖြတ်ခဲ့တယ်လို့ ကရင်အမျိုးသားအစည်းအရုံး KNU ကမတ်လ ၁၈ ရက်မှာ သတင်းထုတ်ပြန်ပါတယ်။

စစ်တပ်စိတ်တိုင်းကျစီစဥ်ခဲ့တဲ့​ရွေး​ကောက်ပွဲအပြီး စစ်တပ်လွှတ်​​တော်​ခေါ်တာ ဒုတိယ​နေ့ဖြစ်တဲ့ မတ်လ ၁၇ ရက် မနက်ပိုင်းမှာ ကျောက်တံခါးမြို့နယ် ပဲနွယ်ကုန်းမြို့နဲ့ ဆေးရိုးခင်ကျေးရွာမှာတပ်စွဲထားတဲ့ စစ်တပ်ကဇရပ်ခင်ကျေးရွာအုပ်စုကို စစ်ကြောင်းထိုးခဲ့ပါတယ်။

“အရင်နေ့ထဲက ဆေးရိုးခင်နားမှာ အင်အားတွေလာချသွားတာ ၄၀၀ ရာလောက်တော့ရှိတယ်။ ဆေးရိုးခင်ဘက်ကနေ ဇရပ်ခင်ရွာတောင်ဘက်ကိုစဝင်တာ။ လက်နက်ကြီးကော ဒရုန်းကောကြဲပြီး စစ်ကြောင်းထိုးတာ ” လို့ ဇရပ်ခင်းရွာသားတစ်ဦးက ပြောပါတယ်။

Public Service Announcement

စစ်ကြောင်းထိုးဝင်ရောက်လာတဲ့ စစ်သားတွေကဇရပ်ခင်ရွာသူရွာသား မိသားစုဝင် (၃) ဦးကို သေနတ်နဲ့ ပစ်ခတ်ခဲ့တာကြောင့် အသက် ၃၂ နှစ်အရွယ်ရဲမင်းနိုင် ၊ အသက် ၃၄ နှစ်အရွယ် မလေးခင် တို့ ၂ ဦး ထိခိုက်ဒဏ်ရာရရှိခဲ့ပါတယ်။သူတို့ရဲ့ သားဖြစ်သူ ဖိုးသောက်ကြာ (၂)နှစ်မှာ ပွဲချင်းပြီးသေဆုံးခဲ့တယ်လို့ KNU ဗဟိုက သတင်းထုတ်ပြန်ပါတယ်။

စစ်တပ်ကစစ်ကြောင်းထိုဝင်ရောက်လာတကြောင့် သဲဖြူရွာသစ်၊ရွှေတဲစု၊ပေါက်ကုန်း၊သဲဖြူရွာဟောင်း၊ဇရပ်ခင်၊နံဇလေး၊ ရွာသာယာနဲ့သစ်တဲကျေးရွာ စုစုပေါင်း ကျေးရွာ (၈) ရွာက အိမ်ခြေ (၄၀၇) အိမ်ထောင်ရှိ လူဦးရေ (၁၇၄၃) ဦးဟာ ဘေးလွတ်ရာသို့ထွက်ပြေးတိမ်းရှောင်နေကြရပါတယ်။

ထွက်ပြေးတိမ်းရှောင်နေကြရတဲ့ စစ်ရှောင်ပြည်သူတွေအတွက် အ​ရေး​​ပေါ်အကူ အညီမှုတွေလိုအပ်လျက်ရှိတယ်လို့ ကူညီသူတွေက ဆိုကြပါတယ်။