ဇန်နဝါရီ-၂၁၊ ၂၀၂၆ ဇေအောင်/People’s Spring
မန္တလေးတိုင်း၊ မိတ္ထီလာခရိုင်၊ မလှိုင်မြို့နယ်မှာ ရွေးကောက်ပွဲလုံခြုံရေးယူ ကင်းပတ်နေတဲ့ စစ်ကောင်စီတပ်သားတွေ ပစ်ခတ်လို့ အမျိုးသမီးတစ်ဦး သေဆုံးပြီး နေအိမ် ၂လုံးပျက်စီးခဲ့ကြောင်း ဒေသခံတွေက ပြောပါတယ်။
ဇန်နဝါရီ ၁၉ ရက် မနက် ၇နာရီခွဲခန့်က မလှိုင်မြို့အနောက်ဘက်မှာ ပေါက်ကွဲသံကြားလို့ဆိုပြီး ရထားသံလမ်းအတိုင်းလာတဲ့ အင်အား ၅၀ခန့်ပါတဲ့ စစ်ကောင်စီတပ်သားတွေက လက်နက်ငယ်တွေနဲ့ ရမ်းသမ်းပစ်ခတ်ခဲ့ကြောင်း၊ အဲဒီပစ်ခတ်မှုကြောင့် သံလမ်းအနီးရှိ ကမ္ဘားဖြူကျေးရွာက နေအိမ်တွေ ကျည်ထိမှန်ပြီး နေအိမ်တစ်အိမ်က အမျိုးသမီးတစ်ဦး ကျည်ထိမှန်သေဆုံးခဲ့ကြောင်း လူထုသတင်းကွန်ရက်-မလှိုင်မြို့ရဲ့ တာဝန်ရှိသူတစ်ဦးက ပြောပါတယ်။
“အဲ့နေ့က မလှိုင်ကထွက်တာ။ မလှိုင် ရွှေကျင်ကျောင်း ကနေ သံလမ်းအတိုင်းလာတာပေါ့။ စစ်ကြောင်းက ရွေးကောက်ပွဲအတွက် လုံခြုံရေးလာတာပြောတယ်။”လို့ လူထုသတင်းကွန်ရက်-မလှိုင်မြို့ရဲ့ တာဝန်ရှိသူတစ်ဦးက ပြောပါတယ်။
Public Service Announcement
ဒါ့အပြင် စစ်ကောင်စီတပ်သားတွေရဲ့ ပစ်ခတ်မှုကြောင့် နေအိမ် ၂လုံးလည်း ပျက်စီးမှုတွေရှိကြောင်း ဒေသခံတွေက ပြောပါတယ်။
လာမယ့် ဇန်နဝါရီ ၂၅ ရက်မှာ ပြုလုပ်မယ့် စစ်ကောင်စီရဲ့ ရွေးကောက်ပွဲအပိုင်း(၃)မှာ မလှိုင်မြို့နယ်လည်း ပါဝင်ပါတယ်။ စစ်ကောင်စီတပ်ဟာ ရွေးကောက်ပွဲအတွက် မလှိုင်မြို့ပေါ်မှာ အင်အား ၄၀၀ ခန့်ရှိနေကြောင်း၊ ပန်းအိုင်အုပ်စု မြစ်ကျင်းရွာ၊ ကံဥိီးရွာ ပန်းအိုင်ကျေးရွာတွေက ဘုန်းကြီးကျောင်းတွေမှာ ညအိပ်တပ်စွဲထားကြောင်း ဒေသခံတွေဆီက သိရပါတယ်။
