ဖေဖော်ဝါရီ-၆၊ ၂၀၂၆။ ထားမြတ်/People’s Spring
ရှမ်းပြည်မြောက်ပိုင်း၊ လားရှိုးမြို့နယ် နမ့်ပေါင်ကျေးရွာအုပ်စု ဝမ်စယ်ကျေးရွာက ရှမ်းဒေသခံတွေကို ကိုးကန့်တပ်မတော်(MNDAA)က ဖမ်းဆီးထားတာနဲ့ပတ်သက်ပြီး ရှမ်းပြည်တိုးတက်ရေးပါတီ(SSPP/SSA)နဲ့ MNDAA တို့ ဒီကနေ့ ဖေဖော်ဝါရီ ၆ရက်မှာ ဆွေးနွေးဖို့ရှိတယ်လို့ ဒေသ သတင်းရင်းမြစ်အချို့နဲ့ SSPP က ပြောပါတယ်။
MNDAAနဲ့ တရုတ်လုပ်ငန်းရှင်တွေက ရွှေတူးဖို့ လုပ်ဆောင်နေတာကို ဆန္ဒပြလို့ဆိုပြီး ဖေဖော်ဝါရီ ၁ရက်မှာ ဝမ်စယ်ဒေသခံ ၃၆ဦးကို MNDAAက ဖမ်းဆီးခဲ့ရာ ၉ဦး ပြန်လွှတ်ပေးဖို့ ကျန်နေတာဖြစ်ပါတယ်။
ဖမ်းဆီးခံထားရသူတွေ ပြန်လွှတ်ပေးဖို့ ရှမ်းအဖွဲ့အစည်းတွေက တိုက်တွန်းချက်ထုတ်ပြန်ထားသလို ဖမ်းဆီးခံရသူတွေ ရိုက်နှက်နှိပ်စက်ခံရလို့ အချို့ဟာ အသက်အန္တရာယ် စိုးရိမ်နေရတယ်လို့ ဆိုပါတယ်။
Public Service Announcement
အဲဒီ ကိစ္စနဲ့ပတ်သက်ပြီး SSPPကို ဆက်သွယ်မေးမြန်းရာ တာဝန်ရှိသူတဦးကလည်း MNDAAနဲ့ SSPP နှစ်ဖက်ကိုယ်စားလှယ်တွေ ဒီကနေ့ ဆွေးနွေးဖို့ရှိနေပြီး ရလဒ်ကို အသိပေးမယ်လို့ ပြောပြပါတယ်။
ရှမ်းကျောင်းသား လူငယ်အဖွဲ့တွေ အပါအဝင် ရှမ်းအရပ်ဘက်အဖွဲ့အစည်း ၁၁ဖွဲ့က ဒီကနေ့ ဖေဖော်ဝါရီ ၆ရက်မှာ MNDAA ရဲ့ လုပ်ရပ်နဲ့ပတ်သက်ပြီး ကြေညာချက်ထုတ်ပြန်ခဲ့ရာ မတရားဖမ်းထားတဲ့ဒေသခံ ၉ဦးကိုချွန်းချက်မရှိ ပြန်လွှတ်ပေးဖို့ ဖော်ပြထားပါတယ်။
ဒါ့အပြင် SSPP/SSA အနေနဲ့လည်း ပြည်သူတွေကို အပြည့်အ၀ ကာကွယ်ပြီး ဒေသတွင်းရှိ လက်နက်ကိုင်တပ်ဖွဲ့အချင်းချင်းကြားညှိနှိုင်းထိန်းကျောင်းပေးဖို့လည်း ရှမ်းအဖွဲ့အစည်း ၁၁ဖွဲ့က တိုက်တွန်းထားပါတယ်။
MNDAA အနေနနဲ့ ရွှေတူးတာ အပြင် တရားမျှတမှုမရှိတဲ့ ဥပဒေမဲ့လုပ်ရပ်တွေ ရပ်တန့်ဖို့၊ အရပ်သားတွေကို ဖမ်းဆီးနှိပ်စက်၊လက်နက်နဲ့ ခြိမ်းခြောက် အကြမ်းဖက်မှုတွေ လုံး၀မလုပ်ဖို့၊ ထိခိုက်နစ်နာသူတွေကို ပြဿနာ ပြေလည်တဲ့အထိ တာဝန်ခံ ဖြေရှင်းပေးဖို့လည်း တိုက်တွန်းထားပါတယ်။ရှမ်းပြည်အတွင်း တိုင်းရင်းသားပြည်သူတွေရဲ့ ငြိမ်းချမ်းစွာ အတူယှဉ်တွဲနေထိုင်ရေး မူကို ထိခိုက်စေတဲ့စည်းဘောင်ကျော်လွန်ချိုးဖောက်နေမှုတွေကို ချက်ချင်းရပ်တန့်ဖို့လည်း ရှမ်းအဖွဲ့အစည်းတွေကတိုက်တွန်းထားပါတယ်။
