ဖေဖော်ဝါရီ-၇၊ ၂၀၂၆။ ဟန်နွေ/People’s Spring
ကရင်အမျိုးသားအစည်းအရုံး(KNU) မြိတ်ထားဝယ်ခရိုင် ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄)ဆီကို စစ်ကောင်စီတပ်သား တစ်ဦးလက်နက်နဲ့အလင်းဝင်လာကြောင်း KNU မြိတ်ထားဝယ်ခရိုင်ကသတင်းထုတ်ပြန်ပါတယ်။
စစ်ကောင်စီရဲ့ ခလရ(၄၀၄)တပ်ရင်းက တပ်သားဟာဖေဖော်ဝါရီ ၆ရက်မှာ KNLA တပ်မဟာ(၄) တပ်ရင်း(၁၂) ထံ အလင်းဝင်လာတာလို့ဆိုပါတယ်။
အလင်းဝင်လာတဲ့ တပ်သားက MA-1(၁)လက်၊ ကျည်ဘောက်(၃)ခု၊ MA-1ကျည်ဆံ(၂၁၀) တောင့် ယူဆောင်လာကြောင်း အသိပေးထားပါတယ်။
Public Service Announcement
အကြောင်းအမျိုးမျိုးကြောင့် မတရားစစ်မှုထမ်း ခိုင်းစေခံရတဲ့ စစ်ကောင်စီတပ်အတွင်းက တပ်သားတွေ KNUနဲ့ နီးစပ်ရာ တော်လှန်ရေးတပ်တွေဆီရရာနည်းနဲ့ အလင်းဝင်ကြဖို့လည်း တိုက်တွန်းထားပါတယ်။
ပြီးခဲ့တဲ့ ဇန်နဝါရီ ၂၃ရက်ကလည်း စစ်ကောင်စီတပ်သား ၅ဦး လက်နက် ၆လက်ယူလာပြီး KNLA တပ်မဟာ(၄) တပ်ရင်း(၁၀)ထံအလင်းဝင်ခဲ့ပါသေးတယ်။အလင်းဝင်လာတဲ့ စစ်ကောင်စီတပ်သား ၅ဦးဟာ MA-1(၃)လက်၊ MA-2 (၁)လက်၊ MA-3 (၁)လက်၊ BA-100(၁)လက် ကျည်အပါဝင်စစ်သုံးပစ္စည်းတစ်ချို့ ပါလာတယ်လို့ ဓာတ်ပုံမှတ်တမ်းတွေနဲ့အတူ အသိပေးထားပါတယ်။
ဇန်နဝါရီအတွင်း KNLA တပ်မဟာ(၄)ဆီ အလင်းဝင်တဲ့ စစ်ကောင်စီတပ်သား ၈ဦးရှိခဲ့ကြောင်း တပ်မဟာ(၄) သတင်းရင်းမြစ်တဦးက ပြောပါတယ်။
KNU မှာ ခရိုင်နဲ့ တပ်မဟာ ၇ခုရှိရာဖြစ်ပြီး အခြား တပ်မဟာ နယ်မြေတွေမှာလည်း စစ်ကောင်စီတပ်သားတွေ လက်နက်နဲ့ ဖြစ်စေ လက်နက်မဲ့ဖြစ်စေ အလင်းဝင်ရောက်မှုတွေ ရှိပြီး တဦးချင်းသော်လည်းကောင်း အဖွဲ့လိုက်သော်လည်းကောင်း အလင်းဝင်ရောက်ခဲ့တဲ့ ဖြစ်စဉ်တွေရှိပါတယ်။ အလင်းဝင်လာသူ တပ်သားအများစုဟာ စစ်ကောင်စီ အဓမ္မ စစ်သား စုဆောင်းထားတဲ့ စစ်မှုထမ်း တပ်သားသစ်တွေဖြစ်ကြောင်း KNUက အသိပေးထားပါတယ်။
