ဖေဖော်ဝါရီ-၁၁၊၂၀၂၆။ကဖေး/People’s Spring
မန္တလေးတိုင်း၊ မိုးကုတ်မြို့နယ် ချောင်းကြီးနဲ့ ရှမ်းကုန်းစံကျေးရွာဘက်မှာ ယခုရက်ပိုင်းဖြစ်ပွားတဲ့ တိုက်ပွဲဆီ စစ်ကူသွားတဲ့ စစ်ကောင်စီတပ်စစ်ကြောင်း ကြားဖြတ်တိုက်ခိုက်ခံရပြီး ထိခိုက်သေဆုံးမှုတွေ များခဲ့ပါတယ်။
ဖေဖော်ဝါရီ ၈ရက်ကနေ ဒီနေ့ ဖေဖော်ဝါရီ ၁၁ရက်အတွင်း ဖြစ်တဲ့တိုက်ပွဲတွေမှာ စစ်ကောင်စီတပ် အထိနာခဲ့တာလို့ စစ်ရေးသတင်းရင်းမြစ်က ပြောပါတယ်။
” ၈ရက်နေ့ကတိုက်ပွဲမှာ စစ်ကူလာတာ ၁၀၀လောက်ရှိတယ်။စစ်ကားတွေက ချောင်းကြီး မရောက်ခင်လှည့်ပြန်တာ။ အဲ့ဒီစစ်ကြောင်း ပိတ်အပစ်ခံရတာဖြစ်တယ်”လို့ ချောင်းကြီးရွာမှာရှိနေတဲ့ သတင်းရင်းမြစ်တစ်ဦးက ပြောပါတယ်။
Public Service Announcement
ချောင်းကြီးနဲ့ ရှမ်းကုန်းစံကျေးရွာဟာ မိုးကုတ်မြို့ အရှေ့ပိုင်းကနေသွားရပြီး မိုးကုတ်- ဘားနဒ်ရွာလမ်းပိုင်းမှာ ရှိပါတယ်။
တိုက်ပွဲတွေဖြစ်နေတာ ရက်အနည်းငယ်ကြာပြီဖြစ်ပြီး ဖေဖော်ဝါရီ ၈ရက် မနက်ပိုင်းမှာ ပိုပြင်းထန်ခဲ့တာပါ။
” ဇန်နဝါရီလတုန်းက ချောင်းကြီးက စစ်ဘေးရှောင်လင်မယား ဆိုင်ကယ်နဲ့ သွားတာကို စစ်တပ်က ပစ်လို့ မိန်းမ သေသွားသေးတယ်။စစ်တပ်က ချောင်းကြီးကို ထိန်းချင်တာ။ တိုက်ပွဲကဆက်ဖြစ်နေတာ” လို့ မိုးကုတ်မြို့ခံတစ်ဦးက ပြောပါတယ်။
အဲ့ဒီရွာတွေပတ်ဝန်းကျင်မှာ ပြီးခဲ့တဲ့ ၂၀၂၅ နိုဝင်ဘာကလည်း တိုက်ပွဲပြင်းထန်ခဲ့ပြီး အရပ်သားတွေကို စစ်ကောင်စီတပ်က ထွက်ခွာခွင့်ပိတ်ပင်ခဲ့ပါတယ်။ လေကြောင်းကနေ ဗုံးကြဲခဲ့ပါတယ်။ ယခုတစ်ကြိမ်တိုက်ပွဲမှာလည်း မိုးကုတ်မြို့ထဲကနေ လက်နက်ကြီးတွေ ပစ်ခတ်နေခဲ့တယ်လို့ မြို့ခံတွေကပြောပါတယ်။
ယခုရက်ပိုင်းတိုက်ပွဲမှာ စစ်ကောင်စီကသေဆုံးသူ ၈၀ ဦးထက်မနည်းရှိတယ်လို့ စစ်ရေးသတင်းမြစ်တွေက ပြောပါတယ်။ တိုက်ပွဲအတွင်း ထိခိုက်သေဆုံးမှုတွေနဲ့ပတ်သက်လို့ အသေးစိတ်မသိရသေးပါဘူး။
ပြီးခဲ့တဲ့ရက်ပိုင်းက မိုးကုတ်မြို့အနောက်ပိုင်းမှာ လက်နက်ကြီးကျည်ကျရောက်ပေါက်ပွဲမှုဖြစ်ခဲ့တယ်လို့ မိုးကုတ်မြို့ခံတစ်ဦးက ပြောပါတယ်။
“ပြန်ဖို့က မဖြစ်နိုင်သေးဘူး။ အနောက်ပိုင်းမှာ ဖြစ်နေတယ်။ အရှေ့ခြမ်းကတော့ နေရတယ်။ အခုက မြို့ထဲကို ပွဲကဖြစ်နေတာ”လို့ မိုးကုတ်မြို့ခံက ပြောပါတယ်။
တအာင်းတပ်မတော်(TNLA)က မိုးကုတ်နဲ့မိုးမိတ်မြို့ကို စစ်ကောင်စီထံ ပြန်အပ်ပေးပြီးတဲ့နောက်ပိုင်း စစ်ကောင်စီတပ်စစ်ကြောင်းတွေက ၂၀၂၅ အောက်တိုဘာမှာ ပြန်လည်ဝင်ရောက်လာတာဖြစ်ပါတယ်။အဲဒီနောက်ပိုင်း မြို့အနီးမှာ တိုက်ပွဲတွေဖြစ်ခဲ့ပါတယ်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD) စစ်ရုံးချုပ်က မိုးကုတ် – မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာ၉ ရက်မှာ စတင်ဖွဲ့စည်းခဲ့ပြီး စစ်ကောင်စီတပ် စစ်ကြောင်းတွေကို နိုဝင်ဘာ ၃၀ရက်ကစပြီး တိုက်ခိုက်ခဲ့ပါတယ်။
စစ်ကောင်စီတပ်တွေရဲ့ အုပ်ချုပ်မှု၊ ကွပ်ကဲမှု၊ ထောက်ပံ့မှု ရပ်ဝန်းတွေကို အထူးစစ်ဆင်ရေးဖော်ဆောင်ပြီး အဆက်မပြတ်တိုက်ခိုက်နေတယ်လို့ MODက အသိပေးထားပါတယ်။
စစ်ကောင်စီက ဖေဖော်ဝါရီ ၅ရက်မှာ မိုးကုတ်မြို့အတွင်းကို စစ်ကောင်စီတပ်ဖွဲ့ဝင်တွေနဲ့ ဌာနဆိုင်ရာဝန်ထမ်းတွေ ထပ်မံပို့ဆောင်ခဲ့ပါတယ်။ ဖေဖော်ဝါရီ ၆ရက်မနက်ပိုင်းမှာ မိုးကုတ်မြို့ထဲက စစ်ကောင်စီတပ်စွဲထားတဲ့နေရာတစ်ခုကို PDF ပူးပေါင်းတပ်တွေက တိုက်ခိုက်ခဲ့ပါသေးတယ်။
