ဖေဖော်ဝါရီ ၂၁၊၂၀၂၆။ သုည/People’s Spring
စစ်ကိုင်းတိုင်း၊ ယင်းမာပင်နဲ့ ရွှေဘိုမြို့နယ်မှာ သပိတ်အဖွဲ့တွေ၊ ဒေသခံပြည်သူတွေဟာ စစ်ဘေးရှောင်တွေကိုကျန်းမာရေးစစ်ဆေးခြင်းနဲ့ စစ်အာဏာရှင်ဆန့်ကျင်ရေး လူထုသပိတ်လှုပ်ရှားမှုတွေကို ဒီကနေ့ (ဖေဖော်ဝါရီ ၂၁) မှ ပြုလုပ်ခဲ့ပါတယ်။
စစ်ကိုင်းတိုင်း ရွှေဘိုမြို့နယ်အတွင်းမှာ သပိတ်အင်အားစုမှ ရဲဘော်တွေက စစ်ဘေးရှောင်ပြည်သူတွေကို အခမဲ့ကျန်းမာရေး စစ်ဆေးစောင့်ရှောက်မှုပေးခဲ့ပြီး အမျိုးသမီးအသုံးအဆောင်ပစ္စည်းတွေကိုလည်း ဖြန့်ဝေခဲ့ပါတယ်။
ယင်းမာပင်မြို့နယ်မြောက်ခြမ်းမှာလည်း နောက်ပြန်မလှည့်ကြေးဒီတော်လှန်ရေးသပိတ်စစ်ကြောင်းမှ တော်လှန်ပြည်သူတွေနဲ့ အတူ ပူးပေါင်းပြီး “ စုစည်းပါဝင် တော်လှန်ရေးအရှိန်တင်” စာသားနဲ့ စစ်အာဏာရှင်ကို ဆန့်ကျင်ကြောင်း ဆန္ဒထုတ်ဖော် ပြသခဲ့ပါတယ်။
Public Service Announcement
ဒါ့အပြင် ယင်းမာပင်-ဆားလင်းကြီးရွာပေါင်းစုံသပိတ်မှ သပိတ်ကော်မတီဝင်တစ်ဦးကလည်း နိုင်ငံရေးဖြစ်ပေါ်ပြောင်းလဲလာမှုတို့ကို ပြည်သူတွေသတိချပ်ပြီး အရေးတော်ပုံကြီးအောင်မြင်သည်အထိ ပူးပေါင်းပါဝင်တိုက်ပွဲဝင်ကြဖို့ တိုက်တွန်းနှိုးဆော်ခဲ့ပါတယ်။
စစ်ကိုင်းတိုင်းအတွင်း ဒေသခံတော်လှန်ပြည်သူတွေဟာ နယ်မြေမငြိမ်သက်မှုကြားထဲကနေပဲ စစ်အာဏာရှင်ဆန့်ကျင်ရေးနဲ့ စစ်တပ်ရွေးကောက်ပွဲဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေကြပါတယ်။
ဓာတ်ပုံ – စစ်ကိုင်းဒေသသပိတ်အင်အားစု၊ ရွှေဘိုသပိတ်အင်အားစု
