ဖေဖော်ဝါရီ−၂၂၊ ၂၀၂၆။ဇေအောင်/People’s Spring
စစ်ကိုင်းတိုင်း၊ မုံရွာမြို့မှာ လမ်းမှားဝင်လာမိတဲ့ ဆီသယ်လာတဲ့ အိမ်စီးကားတစ်စီးကို စစ်တပ်က ပစ်ခတ်ခဲ့ရာ ယာဥ်မောင်းသေဆုံးခဲ့ကြောင်း မုံရွာမြို့နယ်သတင်းမှန်ပြန်ကြားရေးအဖွဲ့က ပြောပါတယ်။
မနေ့က ဖေဖော်ဝါရီ ၂၁ရက် ည ၈ နာရီ မိနစ် ၄ဝခန့်က မုံရွာမြို့၊ သာစည်ဘုရားမုခ်ပေါက်အနီးလမ်းမှားဝင်လာမိတဲ့ ဆီသယ်ကားတစ်စီးကို ဘုရားအနီးမှာရှိတဲ့ သာစည်ထောင်က စစ်ကောင်စီတပ်ဖွဲ့ဝင်တွေက ပစ်ခတ်လို့ ယာဉ်မောင်းသေဆုံးခဲ့တာဖြစ်ကြောင်း မုံရွာမြို့နယ်သတင်းမှန်ပြန်ကြား ရေးအဖွဲ့က ပြောပါတယ်။
“ပေါက်ငယ်တောကနေ မြောက်သွားရမှာကို သူက တောင်သွားတော့ သာစည်ဘုရားဘက် ရောက်သွားတာ ထောင်နားပါပဲ ပြောရရင်ဟိုက ပစ်ရော။ အဲ့ဘက်လမ်းတွေက သွားနေကြသူတွေတောင် လမ်းမှားတယ်လို့ ပြောတယ်။ ကားအသင်းက စောင့်ဖို့ ပြောတာကို သူက အရင်သွားတော့ အဖွဲ့နဲ့ ကွဲသွားတာလို့ ကားသမားတွေက ပြောတယ်။”လို့ အထက်ပါအဖွဲ့ တာဝန် ရှိသူက ပြောပါတယ်။
Public Service Announcement
ဖေဖော်ဝါရီ ၂၀ရက် ညနေ ၆နာရီခန့်ကလည်း မုံရွာမြို့၊ မြို့ရှောင်လမ်းအရှေ့ဘက်၊ စစ်ကောင်စီတပ်စွဲရာ ကံသာဘုန်းကြီးကျောင်းအနီးမှာ အသက် ၂၀နှစ်ဝန်းကျင် အမျိုးသမီးတစ်ဦး ဒဏ်ရာတွေနဲ့ လဲကျသေဆုံးနေခဲ့ပြီး တစ်ရက်အကြာမှ အလောင်းလာကောက်သွားခဲ့တယ်လို့ ဒေသခံတွေက ပြောပါတယ်။
မုံရွာမြို့ပေါ်က စစ်ကောင်စီတပ်ဟာ မကြာခဏ ရမ်းသမ်းပစ်ခတ်မှုတွေ ပြုလုပ်နေပြီး လူငယ်လူရွယ်တွေ ထိခိုက်သေဆုံးတာတွေရှိနေတယ်လို့ သိရပါတယ်။
ဖေဖော်ဝါရီ ၃ ရက်ကလည်း မုံရွာမြို့၊ သာစည်လမ်း၊ ပညာရေးတက္ကသိုလ် (TTC)အနီးမှာ အိမ်စီးကားတစ်စီးကို စစ်တပ်က လိုက်လံပစ်ခတ်ရာ အမှိုက် ပုံအနီးက အမှိုက်ကောက်တဲ့ကလေးတစ်ဦး၊ သုံးဘီးသမားတစ်ဦးအပါအဝင်ပြည်သူ ၄ ဦးခန့် သေဆုံးခဲ့ကြောင်း မြို့ခံတွေကပြောပါတယ်။
ဓာတ်ပုံ – ဝီကီ
