ငလျင်အကြောင်းရိုက်ကူးရုံတင်ပြသမယ့်ဇာတ်ကားကိုမန္တလေးမြို့ခံတွေ ဝေဖန်

ဖေဖော်ဝါရီ – ၂၃ ၊၂၀၂၆ ၊ဆိုင်းမင်း/People’s Spring

ပြည်သူလူထုရဲ့အသက်အိုးအိမ်စည်းစိမ်များစွာပျက်စီးဆုံးရှုံးခဲ့တဲ့အပြင် ကိုယ်စိတ်နှလုံးကြေကွဲခံစားခဲ့ရတဲ့မန္တလေးငလျင်ကြီးအကြောင်း ရိုက်ကူးထားတဲ့ဇာတ်ကားကိုမန္တလေးမြို့ခံတွေကကန့်ကွက်ဝေဖန်နေကြပါတယ်။

ငလျင်ကြီး နောက်ဆက်တွဲဖြစ်ရပ်တွေကိုထည့်သွင်းရိုက်ထားတဲ့ “ မပြိုလဲနိုင်တဲ့ နှလုံးသားများ” ဆိုတဲ့ ဇာတ်ကား ပိုစတာ ထွက်လာချိန်မှာ ဝေဖန်မှုတွေ ရှိလာတာပါ။

“ တစ်နှစ်တောင်မပြည့်သေးဘူး ၊ဒီဖြစ်ရပ်ကြီးကို မေ့နိုင်ဖို့ ကြိုးစားနေကြတုန်း၊ ရုပ်ရှင်တောင်ပြတော့မယ်၊ ငလျင်ဒဏ်ခံခဲ့သူတွေကို စာနာမှုမရှိတာ”လို့ငလျင်ကြောင့် မိသားစုဝင်နှစ်ဦးဆုံးပါးခဲ့သူကပြောပါတယ်။

Public Service Announcement

“မပြိုလဲနိုင်သောနှလုံးသားများ”ဆိုတဲ့ ဇာတ်ကားကငလျင်ကြောင့် လူရာချီဆုံးပါးခဲ့တဲ့မန္တလေး ရှိ Sky Villa (စကိုင်းဗီလာ) ကွန်ဒိုအတွင်း ပိတ်မိ နေရာကနေ အသက်ရှင်လျက် ပြန်ထွက်လာနိုင်တဲ့ မြေးအဖွားသုံးဦးရဲ့ ဖြစ်စဉ်အပါအဝင် ဖြစ်ရပ်မှန်အချို့ကို အခြေခံရိုက်ကူးထားတယ်လို့ သိရပါတယ်။

ရုံတင်မပြသခင်လူမှုကွန်ရက်ဖေ့ဘွတ်ခ်မှာရုပ်ရှင်ကြော်ငြာထွက်လာပြီး ရက်ပိုင်းမှာပဲအဲဒီလုပ်ရပ်အပေါ် မန္တလေးမြို့ခံတွေရဲ့ ဝေဖန်သံလည်းထွက်လာတာပါ။

“အခုထိလည်းငလျင်က မငြိမ်သေးဘူး ၊လှုပ်နေတုန်း၊ လူတွေက စိတ်ဒဏ်ရာဖြစ်နေတာ၊ဘယ်လိုစိတ်တွေနဲ့အစပြန်ဖော်နေကြတာလဲ”လို့ နေအိမ်ပြိုကျပျက်စီးမှုကို ကြုံခဲ့ရတဲ့မန္တလေးမြို့ခံ အိမ်ရှင်မတစ်ဦးကပြောပါတယ်။

အဲဒီဇာတ်ကားကို ဒါရိုက်တာသော်ဇင်ရိုက်ကူးပြီး ဖြိုးငွေစိုး၊နေမင်း၊မင်းဦး၊ရတနာဗိုလ်၊ချိုပြုံးတို့ပါဝင်ပြီး မကြာခင်ရုံတင်ပြသမယ်လို့ ကြော်ငြာထားပါတယ်။

“အိမ်တွေပြို၊အသက်တွေဆုံးရှုံးခဲ့တဲ့လူတွေက အနာမကျက်သေးဘူးလေ၊ ထပ်တူးဆွတာမျိုးမလုပ်သင့်သေးဘူး၊လူတွေကမေ့နိုင်ဖို့ကြိုးစားကြတုန်းရှိသေးတယ်၊စာနာပေးဖို့လိုတယ်”လို့ မန္တလေးမြို့ခံ ကျောင်းဆရာတစ်ဦးကပြောပါတယ်။

မန္တလေးမှာ ပြီးခဲ့တဲ့နှစ်မတ်လ ၂၈ ရက်က ဖျက်အားပြင်း ငလျင်ကြီး လှုပ်ခတ်ပြီးနောက်ပိုင်း မှာလည်းနောက်ဆက်တွဲ ငလျင်​တွေ မကြာခဏဆိုသလိုလှုပ်ခတ်နေဆဲပါ။

အခုနှစ်ဆန်းပိုင်းဇန်နဝါရီ ၈ရက်ညပိုင်းကဆိုရင် မန္တလေးမြို့မှာ အင်အားအနည်းငယ်ရှိတဲ့ငလျင်လှုပ်ခတ်ရာအထပ်မြင့်နေသက်ကြီးရွယ်အို အမျိုး သားတစ်ဦးရုတ်တရက် ထိတ်လန့်ပြီးသေဆုံးခဲ့တဲ့ဖြစ်စဉ်ဖြစ်ထားပါတယ်။

ပြင်အားရစ်ချ်တာစကေး၇.၇ အဆင့်ရှိတဲ့ဖျက်အားပြင်းငလျင်ကြီးကြောင့် မြန်မာနိုင်ငံ မှာလူပေါင်း ၃,၈၀၀ ထက်မနည်းသေဆုံးပြီး ၅,၀၀၀ ကျော် ထိခိုက်ဒဏ်ရာရခဲ့တယ်လို့ ကုလသမဂ္ဂက ဆိုထားပါတယ်။

ငလျင်ကြီးဒဏ်ကို မြန်မာနိုင်ငံအလယ်ပိုင်းဒေသတွေဖြစ်တဲ့ မန္တလေးတိုင်း ၊စစ်ကိုင်းတိုင်း၊မကွေးတိုင်းတို့က အပြင်းထန်ဆုံး ခံစားခဲ့ရပြီး လူနေအိမ်တွေ ၊အဆောက်အဦးတွေ အများအပြား ပြိုကျပျက်စီးခဲ့ပါတယ်။

ငလျင်ကြီးလှုပ်ပြီး အာဏာသိမ်းစစ်တပ်က အ​ရေး​ပေါ်ကယ်ဆယ်​ရေးလုပ်ငန်း​တွေကို အချိန်မီမလုပ်နိုင်လို့ ပိတ်မိပြီး​သေဆုံးသူများစွာရှိခဲ့ပါတယ်။ စစ်တပ်က ငလျင်ကယ်ဆယ်​ရေးအတွက် ထိထိ​ရောက်​ရောက် ဝင်​ရောက်ကူညီတာမရှိပဲ ငလျင်

သင့်​ဒေသ​တွေအပါအဝင် နိုင်ငံ့​ဒေသအများစုကို ငလျင်လှုပ်ပြီးရက်ပိုင်းအတွင်းမှာပဲ ဗုံးပတ်ကြဲလို့ ပြည်တွင်းပြည်ပက ပြင်းထန်စွာ​ဝေဖန်ခဲ့ကြပါတယ်။