ခင်ဦးမှာ စစ်တပ်က မီးရှို့လို့ ကျပ်သိန်းထောင်ချီတန်တဲ့ ဆန်စက်၂လုံးအပါအဝင် အဆောက်အအုံတွေ မီးလောင်

ဖေဖော်ဝါရီ-၂၆၊၂၀၂၆။ဇေအောင်/People’s Spring

စစ်ကိုင်းတိုင်း၊ ခင်ဦးမြို့မှာ စစ်တပ်က မီးရှို့လို့ ကျပ်သိန်းထောင်ချီတန်တဲ့ ဆန်စက်ကြီး ၂လုံးအပါအဝင် အဆောက်အအုံ ၉လုံးမီးလောင်ပြာကျခဲ့ကြောင်း ခင်ဦးမြို့နယ် ပြည်သူ့အုပ်ချုပ်ရေးအဖွဲ့က ပြောပါတယ်။

ဖေဖော်ဝါရီ ၂၄ရက် ညနေ ၆နာရီခန့်က ခင်ဦးမြို့ပေါ်က အင်အား ၄၀ခန့်ပါတဲ့ စစ်ကောင်စီတပ်ဟာမြို့အထွက် ခင်ဦး-ရေဦး ကားလမ်းတလျှောက်က ဆန်စက်တွေ၊ နေအိမ်တွေ၊ စျေးဆိုင်ခန်းတွေကို မီးတင်ရှိူ့ဖျက်ဆီးခဲ့ရာ ဆန်စက်အကြီး ၂လုံး၊ လူနေအိမ် ၅လုံး၊ ဆိုင်ခန်းနဲ့လူနေအိမ်တွဲရက် ၂လုံး မီးလောင်ပျက်စီးခဲ့တယ်လို့ ခင်ဦးပအဖ တာဝန်ရှိသူက ပြောပါတယ်။

“ဆန်စက်ကအကြီးပဲ။ ယနေ့ ကာလပေါက်စျေးနဲ့ဆိုရင် သိန်းထောင်ကြီးပိုင်း ကိန်းဂဏန်းလောက်အထိ ရှိနိုင်ပါတယ်”လို့ အထက်ပါတာဝန်ရှိသူက ပြောပါတယ်။

Public Service Announcement

မီးရှို့နေတဲ့ စစ်အုပ်စုနဲ့ တော်လှန်ရေးအဖွဲ့တွေ တိုက်ပွဲဖြစ်ပွားခဲ့ပြီး စစ်ဗိုလ်တစ်ဦးသေဆုံးကာ MA1 သေနတ်တစ်လက်သိမ်းရတယ်လို့ ခင်ဦးပကဖ တာဝန်ရှိသူက ပြောပါတယ်။

ခင်ဦးမြို့နယ်ဟာ စစ်ကောင်စီတပ်ရဲ့ မီးရှိူ့ဖျက်ဆီးမှု အကြိမ်ကြိမ်ခံထားရတဲ့အပြင် လေကြောင်းတိုက်ခိုက်မှုတွေလညိး မကြာခဏ ရင်ဆိုင်နေရပါတယ်။