မတ်-၂၊ ၂၀၂၆။ အိမ်သွင်/People’s Spring
စစ်ကိုင်းတိုင်း၊ ပင်လည်ဘူးမြို့မှာ မတ်လ ၁ရက် မနေ့ ညပိုင်းက စစ်ကောင်စီလေကြောင်းတိုက်ခိုက်မှုကြောင့် ဒေသခံ ၉ဦးသေဆုံးပြီး ၁၄ဦး ဒဏ်ရာရခဲ့ပါတယ်။
ပင်လည်ဘူးမြို့နယ်၊ လိပ္ပုတ်ကျေးရွာကို ည ၁၁ နာရီ ၁၅မိနစ်ခန့်မှာ ဂျက်ဖိုက်တာနဲ့ ဗုံးကြဲတာလို့ ဒေသခံသတင်းရင်းမြစ်က ပြောပါတယ်။
“ ၉ဦးသေဆုံးတယ်။ ၁၄ဦး ထိတယ်။ လေကြောင်းက အရှေ့ဘက်ကို သွားပြီးမှ ပြန်ဝင်လာတာ။ အထိအခိုက်များသွားတယ်” လို့ ၎င်းက ပြောပါတယ်။
Public Service Announcement
စစ်ကောင်စီဗုံးကြဲလို့ လူသေဆုံးထိခိုက်မှုသတင်း မှန်တယ်လို့ စစ်ကိုင်းတိုင်းထဲက PDF သတင်းရင်းမြစ်ကလည်း ပြောပါတယ်။ သေဆုံးထိခိုက်သူတွေအားလုံး အရပ်သားတွေဖြစ်ပြီး ပေါက်ကွဲအားပြင်းထန်လို့ ရုပ်အလောင်းအချို့ပျက်စီးခဲ့တယ်လို့ ဆိုပါတယ်။
ပင်လည်ဘူးမြို့ဟာ PDFနဲ့ တော်လှန်ရေးတပ်တွေ ၂၀၂၃ နိုဝင်လကတည်းက ထိန်းချုပ်ထားခဲ့တဲ့ မြို့ဖြစ်ပါတယ်။
စစ်ကောင်စီက မနေ့က တရက်တည်းမှာပဲ လေကြောင်းနဲ့ လက်နက်ကြီး အသုံးပြုတိုက်ခိုက်လို့ ပင်လည်ဘူးမြို့အပါအဝင် နေရာ ၃နေရာမှာ အရပ်သားတွေ အစုလိုက်အပြုံလိုက်သေဆုံးမှုတွေ ဖြစ်ခဲ့ပါတယ်။
မကွေးတိုင်း၊ အောင်လံမြို့နယ် တဇန်းရွာကို မနေ့က မနက်ပိုင်းမှာ စစ်ကောင်စီတပ်က လက်နက်ကြီးနဲ့ ပစ်ခတ်လို့ အရပ်သားငါးဦးသေဆုံးခဲ့ပါတယ်။
မင်းတုန်းမြို့နယ်၊ ပြောင်းရွာက ကုန်ကားစခန်းနေရာကို လေကြောင်းကနေ ဗုံးကြဲလို့ အရပ်သား ၂၅ဦး သေဆုံးပြီး ၂၀ဦး ဒဏ်ရာရခဲ့ပါတယ်။
