'/%3E%3C/svg%3E){kind=small}
မတ်-၇၊ ၂၀၂၆။ထားမြတ်/People’s Spring
ပဲခူးတိုင်း၊ ပေါင်းတည်မြို့နယ်အတွင်း စစ်ကြောင်းထိုးလာတဲ့ စစ်ကောင်စီတပ်ကို မိုင်းဆွဲတိုက်ခိုက်ခဲ့ကြောင်း ပြည်သူ့ကာကွယ်ရေးတပ်မတော်(PDF) ဗျူဟာ ၂၁ ကွပ်ကဲမှုအောက်ရှိ ပြည်ခရိုင် တပ်ရင်း(၁)က သတင်းထုတ်ပြန်ပါတယ်။
အင်အား ၅၀ပါတဲ့ ခမရ(၁၀)တပ်ရင်းဟာ ပေါင်းတည်မြို့နယ် သဲမဲကျေးရွာဘက် စစ်ကြောင်းထိုးလာစဉ် မတ်လ ၆ရက်မနက်အစောမှာ ပြည်ခရိုင် တပ်ရင်း(၁) တပ်ခွဲ(၂)က သဲမဲကျေးရွာ အနောက်ဘက် သင်္ချိုင်းကုန်းနားအရောက် မိုင်းဆွဲတိုက်ခိုက်ခဲ့တာလို့ ဆိုပါတယ်။
အဲဒီလို မိုင်းစွဲတိုက်ခိုက်ခဲ့ရာ စစ်ကောင်စီတပ် က စစ်ကြောင်းမှူး အပါအဝင် ၂ဦးသေဆုံးပြီး ၃ဦး ဒဏ်ရာရရှိခဲ့ကြောင်း ထုတ်ပြန်ထားပေမယ့် သေဆုံးထိခိုက် အခြေအနေတွေ နဲ့ပတ်သက်ပြီး သီးခြားအတည်ပြုချက် မရသေးပါဘူး။ ဒေသတွင်း စစ်ရေး အခြေအနေတွေကို မေးမြန်းဖို့ ပြင်ခရိုင် တပ်ရင်း(၁)ထံ ဆက်သွယ်ထားဆဲဖြစ်ပါတယ်။
Public Service Announcement
မိုင်းဆွဲတိုက်ခိုက်ခံရတဲ့ စစ်ကောင်စီတပ်ကလည်း လက်နက်ကြီး၊ လက်နက်ငယ်တွေနဲ့ ပြန်လည် ပစ်ခတ်တိုက်ခိုက်ခဲ့ပေမယ့် PDF ရဲဘော်တွေ အထိအခိုက်မရှိဘူးလို့ အသိပေးပါတယ်။
စစ်ကောင်စီတပ်စစ်ကြောင်းဟာ ရှေ့ဆက်မတိုးနိုင်ဘဲ သေဆုံးအလောင်းတွေနဲ့ ဒဏ်ရာရသူတွေကို သယ်ဆောင်ပြီး ခမရ(၁၀) တပ်တွင်းသို့ နောက်ကြောင်းပြန်လှည့်သွားတယ်လို့ ထုတ်ပြန်ပါတယ်။
မိုင်းဆွဲတိုက်ခိုက်တဲ့နေရာကို နယ်မြေရှင်းလင်းရေး လုပ်ဆောင်စဉ် ကျည်ဘောက် ၁ခုနဲ့ ကျည်အချို့၊ စစ်အသုံးအဆောင်ပစ္စည်းတွေ သိမ်းရခဲ့ကြောင်းလည်း ထုတ်ပြန်ပါတယ်။
ပြည်ခရိုင် တပ်ရင်း(၂)အနေနဲ့ မတ်လ ၂ရက်က လည်း သဲမဲကျေးရွာကို စစ်ကြောင်းထိုးလာတဲ့ စစ်ကောင်စီတပ်ကို မိုင်းဆွဲတိုက်ခိုက်ခဲ့ကြောင်း အသိပေးထားပါတယ်။ အဲဒီတုန်းကလည်း စစ်ကောင်စီတပ်ဟာ အထိအခိုက်ရှိခဲ့ပြီး နောက်ကြောင်းပြန်ဆုတ်သွားကြောင်း ဖော်ပြထားပါတယ်။
