မတ်-၁၇၊၂၀၂၆။ဇော်ဝင်း /People’s Spring
မကွေးတိုင်း၊ဂန့်ဂေါမြို့နယ်မြောက်ပိုင်းကို စစ်တပ်ကလေကြောင်းကနေဗုံးကြဲလို့ စစ်ရှောင်မိသားစုဝင်နှစ်ဦးသေဆုံးပြီး တစ်ဦးစိုးရိမ်ရတယ်လို့ ဖြစ်စဥ်ကိုသိရှိသူအချို့က ပြောပါတယ်။
စစ်တပ်ဟာ မတ်လ ၁၆ ရက် နေ့လယ် ၁ နာရီ မိနစ် ၂၀ကနေ ၁နာရီ မိနစ် ၄၀ကြာတဲ့အထိ ကျောက်ဂူဒေသကို ဂျက်ဖိုက်တာ လေးစီးသုံးပြီး ဗုံးရှစ်ကြိမ်ကြဲခဲ့တာလို့ ဆိုပါတယ်။
“ကန်ရွာကနေ စစ်ရှောင်ရတဲ့ ပြည်သူတွေ။အသက် ၅၀ နှစ်အရွယ် မိခင်ဖြစ်သူနဲ့ အသက် ၁၃ နှစ်အရွယ် သမီးငယ်ဖြစ်သူ တို့ ၂ ဦးဟာ နေရာမှာပဲ ဆုံးတယ်”လို့ ဂန့်ဂေါမြို့နယ်နေသူတစ်ဦးက ပြောပါတယ်။
Public Service Announcement
ဒါအပြင် ဖခင်ဖြစ်သူကလည်း ဗုံးဒဏ်ကြောင့် အသက်အန္တရာယ် စိုးရိမ်နေရပြီး အသက် ၂၀ အရွယ်သမီးဖြစ်သူကလည်း ခြေထောက်ဖြတ်ရမယ့် အခြေအနေရှိတယ်လို့ ဆိုပါတယ်။
ဒေသခံတွေခေါ်တဲ့ ကျောက်ဂူဒေသမှာ ကန်ရွာ၊ကျွန်းခုံသာ၊ဘော်ပြင်း၊မောက်လင်းနဲတောင်ယာပြင်ရွာ တွေ ပါရှိပါတယ်။
“YDF (ယောကာကွယ်ရေးတပ်)တပ်စခန်းရှိတယ်ဆိုပြီး လေယာဥ်လေးစီးနဲ့ကြဲတာလို့ ကြားတယ်။ထိတာက အရပ်သားတွေ”လို့ ဂန်ဂေါမြို့နယ်စစ်ရေးသတင်းရင်းမြစ်က ပြောပါတယ်။
မနေ့ကလေကြောင်းတိုက်ခိုက်ခံရတာနဲ့ပတ်သက်ပြီး ကိုမြတ်သူဦးဆောင်တဲ့ YDF ကို လူထုနွေဦးက ဆက်သွယ် မေးမြန်းနေဆဲ ဖြစ်ပါတယ်။
ဒါ့အပြင် မနေ့ညနေပိုင်းကလည်း ထီးလင်းမြို့နယ်တောင်ပိုင်းနဲ့ ချင်းပြည်နယ် မင်းတပ်မြို့နယ်မြောက်ပိုင်း အစပ်အနီးတနေရာကို လေကြောင်းတိုက်ခိုက်ခံရတာရှိတယ်လို့ သိရပါတယ်။
အမျိုးသားညီညွတ်ရေးအစိုးရ(NUG)ရဲ့ သတင်းအချက်အလက်တွေအရ စစ်တပ်အာဏာသိမ်းပြီး ငါးနှစ်ကျော်အတွင်း ၂၀၂၆ မတ်လ ၁၀ ရက်အထိ လေကြောင်းတိုက်ခိုက်မှုပေါင်း ငါးထောင်ကျော်အတွင်းသေဆုံးတဲ့အရပ်သား ၅,၀၇၅ ဦး ရှိပါတယ်။
