■ဆီတန်းစီနေတဲ့ကားအချို့ပါမီးထဲပါသွားပြီး ဒဏ်ရာရသူအချို့ရှိ
မတ်-၂၁၊၂၀၂၆။ရောင်နီ၊မိုမို/People’s Spring
ရန်ကုန်မြို့၊ဒဂုံမြို့သစ်မြောက်ပိုင်း မြို့နယ် ၇/၈ လမ်းဆုံအနီးက Terminal ဆီဆိုင် မီးလောင်ခဲ့ပြီးဆီတန်းစီနေတဲ့ ကားအချို့ပါ မီးထဲ ပါသွားပြီး ထိခိုက်ဒဏ်ရာရသူတွေများတယ်လို့ ဒေသခံတွေက ပြောပါတယ်။
“ဆီဆိုင်ပေါက်ကွဲတာ ဘယ်လောက်ပြင်းလဲ ဆိုရင် လမ်းဆုံ မီးပွိုင့်ကပါ ထိပြီး ပျက်စီးသွားတယ်”လို့ ဖြစ်စဥ်ကို တွေ့ရှိတဲ့ ဒေသခံတစ်ဦးက ပြောပါတယ်။
Public Service Announcement
မီးလောင်ရတဲ့ ဖြစ်စဥ် အသေးစိတ်ကို မသိရသေးပေမယ့် ဖြစ်စဥ်အနီးနားရှိနေသူတွေကတော့ ဆီဆိုင်အနီးရပ်ထားတဲ့ကားကနေ မီးလောင်မှုစခဲ့တာလို့ ဆိုပါတယ်။
“ရပ်ထားတဲ့ ကားကနေစလောင်တာတဲ့။ဆိုင်က ကားလား ဆီတန်းစီတဲ့ကားလားမသိဘူး။ဆီဆိုင်ဘေးနားက g & g စတိုးဆိုင်လဲအကုန် ကုန်တယ်။လူနာ တင်ကားတွေ နှစ်စီး၊သုံးစီးပဲ”လို့ မီးလောင်မှုဖြစ်စဥ်အနီးရောက်နေသူက ပြောပါတယ်။
ဆီဆိုင်တစ်ခုလုံးမီးလောင်မှုထဲ ပါသွားပြီး ဆီတန်စီထားတဲ့ အိမ်စီးကားနှစ်စီး နဲ့ တက္ကစီ တစ်စီးလည်း မီးလောင်သွားတယ်လို့ သူက အသိပေးပါတယ်။
“ပေါက်ကွဲမှု စဖြစ်တဲ့အသံကို ၉:၂၉မှာကြားပါတယ်၊ပြီးနောက် ပေါက်ကွဲမှုအသေးလေးတွေဆက်ကြားပါတယ်။ မီးတွေလည်း အများကြီးလောင်ပါတယ်”လို့ မျက်မြင်တွေ့ခဲ့သူတစ်ဦးကပြောပါတယ်။
စက်သုံးဆီတန်းစီတဲ့ ကားတစ်စီးကနေ မီးစတင်လောင်ခဲ့တာဖြစ်ပြီး ဆီဆိုင်တစ်ဆိုင်လုံး မီးလောင်ဆုံးရှူံးသွားတယ်လို့ သူကဆက်ပြောပါတယ်။
“ကား၃စီးလောင်၊ ဆီကန် နဲ့ ဆီကားထိမရောက် လိုက်”လို့ မျက်မြင်တွေ့ရှိခဲ့သူက ပြောပါတယ်။
ဒီနေ့(မတ်၂၁) ရက် ည ၉ နာရီခွဲကျော်မှာ မီးလောင်မှုဖြစ်ခဲ့တာဖြစ်ပြီး Level 1 ယာဉ်အုပ်စုနဲ့ နာရီဝက်ခန့် မီးငြှိမ်းသတ်ခဲ့ရတယ်လို့ မီးသတ်တပ်ဖွဲ့ကထုတ်ပြန်ထားပါတယ်။ဒါပေမယ့် ထိခိုက်ပျက်စီးမှုနဲ့ပတ်သက်ပြီး မဖော်ပြထားပါဘူး။
မီးသတ်တပ်ဖွဲ့ရဲ့ ပေ့ခ်ျမှာ တိုက်ရိုက်ထုတ်လွှင့်ထားတဲ့ ဗီဒီယိုဖိုင်မှာတော့ ဆီဆိုင်တစ်ခုလုံး မီးလောင်ဆုံးရှုံးထားတာကိုတွေ့ရပါတယ်။
အရေးပေါ် ဖုန်းနံပါတ် တွေကိုလူထုနွေဦးက ဆက်သွယ်ခဲ့ပေမယ့် ဖြေကြားတာလည်း မရှိခဲ့ပါဘူး။
လက်ရှိ ပြည်တွင်းမှာ စက်သုံးဆီအကြပ်အတည်း ကြောင့် ဆီဆိုင်တွေ အနီး ညအိပ်တန်းစီနေရတာအပြင် အကန့်အသတ်နဲ့ပဲ စစ်တပ်သတ်မှတ်တဲ့ နှုန်းအတိုင်း ဝယ်ယူနေကြရပါတယ်။
