'/%3E%3C/svg%3E){kind=small}
မတ်-၂၂၊ ၂၀၂၆။ထားမြတ်/People’s Spring
တော်လှန်ရေးရဲ့ လက်ရှိ အခြေအနေဟာ စိတ်ဓာတ်ကျစရာမရှိဘဲ အောင်မြင်ဖို့အတွက် အားနည်းချက်ရှာ အားသာချက်ဖြစ်အောင်လုပ်ပြီး တော်လှန်ရေးပန်းတိုင်အတွက် ဆက်လက်ကြိုးစားကြရမယ်လို့ချင်းညီနောင် ခေါင်းဆောင်တစ်ဦးဖြစ်တဲ့ ဆလိုင်းထန်းချွန်းဖေက ပြောပါတယ်။
ချင်းညီနောင်အတွက် ရန်ပုံငွေရှာဖွေပွဲကို မနေ့က မတ်လ ၂၁ရက်မှာ ပြုလုပ်ခဲ့ရာ ကြားကာလချင်းအမျိုးသားအတိုင်ပင်ခံကောင်စီ(ICNCC) ဥက္ကဋ္ဌလည်းဖြစ်သူ ဆလိုင်းထန်းချွန်းဖေက အခုလို ပြောပြခဲ့တာပါ။
” မြန်မြန်ပြေးခဲ့တဲ့ဟာက နည်းနည်းတန့်ပြီး ဖြေးဖြေးလျှောက်တာပဲဖြစ်ပါလိမ့်မယ်။ ဒါပေမဲ့ ပန်းတိုင်ကနေ နောက်ဆုတ်နေတာမဟုတ်ပါဘူး။ လုံး၀ တော်လှန်ရေးက အကျဘက်ကို မသွားဘူးဆိုတာ ကျနော်ပြောလိုပါတယ်”လို့ ဆလိုင်းထန်းချွန်းဖေကလက်ရှိ တော်လှန်ရေး အခြေအနေအပေါ် သုံးသပ်ပါတယ်။
Public Service Announcement
တော်လှန်ရေးမှာ ဒီအခြေအနေရောက်လာတယ်ဆိုတာ လုံး၀အပေါင်းလက္ခဏာဆောင်တယ်လို့လည်း ပြောပါတယ်။ ၂၀၂၁ မှာ ဘာမှ မပိုင်ဆိုင်တဲ့ နယ်မြေစိုးမိုးမှု မရှိပေမယ့် နောက်ပိုင်းမှာ မြို့တွေ သိမ်းပိုက်တာ နယ်မြေတွေ ထိန်းချုပ် နိုင်တာတွေကြောင့် လူထုရဲ့ ပူးပေါင်းပါဝင်မှု ပိုမိုခိုင်မာသွာားကြောင်းလည်း အသိပေးပါတယ်။
စစ်ကောင်စီဟာ ပြည်သူလူထု စားဝတ်နေရေးခက်အောင် လုပ်ဆောင်ကာ ပြည်သူနဲ့ တော်လှန်ရေးကို ရန်တိုက်ပေးနေပေမယ့် စစ်အုပ်စုရဲ့ ကြိုးပမ်းမှု မအောင်မြင်တဲ့အပြင် စစ်အုပ်စုရှိနေရင်တိုင်းပြည်အေးချမ်းမှာ မဟုတ်ဘူးဆိုတာ ၊ စစ်ကောင်စီတပ် နိုင်ငံရေးဇာတ်ခုံမှာ ပါဝင်နေသရွေ့ တိုင်းပြည်အေးချမ်းမှာမဟုတ် ဆိုတာ ပိုမြင်လာကြောင်း ပြောပြပါတယ်။
ဒါ့အပြင် စစ်ကောင်စီက ဝါဒဖြန့်တာတွေ ဗြောင်လိမ်ဗြောင်စားလုပ်တာတွေ အစဉ်ပြုလုပ်နေကြောင်းလည်း ဆလိုင်းထန်းချွန်းဖေက ပြောပါတယ်။
” ဥပမာ သူတို့ဘက်ခြမ်းမှာ အမှောင်ဝင်သွားတဲ့သူ တယောက်လောက်ရှိမယ်ဆိုရင် ၁၀ယောက် လောက်လို့ပြောမယ်။ ၁၀ယောက်လောက်ဆိုရင် အယောက်တထောင်လောက်လို့ပြောမယ်”လို့ ဆလိုင်းထန်းချွန်းဖေက ပြောပါတယ်။
ဒါဟာ စစ်ကောင်စီလုပ်နေကျ အလုပ်ဖြစ်လို့ စစ်ကောင်စီရဲ့ လုပ်ရပ်မှာမျောမသွားဖို့လိုတယ်လို့လည်း အသိပေးပါတယ်။
ချင်းညီနောင်အနေနဲ့လည်း စစ်ကောင်စီကို တိုက်ခိုက်တဲ့ စစ်ဆင်ရေးတွေ ရပ်သွားဖို့မရှိဘူးလို့ပြောပြပါတယ်။
” နောက်ထပ်စစ်ဆင်ရေးတွေလည်း ကျနော်တို့ လုပ်ဖို့ ။ ဘယ်နေ့နေ့ဘယ်အချိန်ဆိုတာ စစ်ရေးအရ ပြောဖို့မရှိသေးပါဘူး။သေချာတာကတော့ တိုက်ပွဲရပ်မှာ မဟုတ်ပါဘူး”လို့ ဆလိုင်းထန်းချွန်းဖေက ပြောပါတယ်။
စစ်ရဲ့သဘောတရားမှာ ကိုယ့်ဘက်ကအပဲ အမြဲတမ်းနိုင်တာမျိုးဖြစ်ချင်မှ ဖြစ်မယ်လို့ ဆလိုင်းထန်းချွန်းဖေက ပြောပြပြီး အားနည်းချက် ကို ရှာ အားသာချက်အဖြစ် ပြောင်းလဲသွားကြရမယ်လို့ အသိပေးပါတယ်။
ချင်းညီနောင်အပါအဝင် တော်လှန်ရေးတပ် ၁၉ဖွဲ့ စုဖွဲ့ထားတဲ့နွေဦးတော်လှန်ရေးမဟာမိတ်တပ်ပေါင်းစု(SRA) ဟာ စစ်ကောင်စီကို ထိုးနှက်တိုက်ခိုက်ရာမှာ ပိုမိုအားကောင်းလာစေဖို့ ဖြစ်တယ်လို့ ပြောပါတယ်။
