မတ်-၂၄၊၂၀၂၆။ ထားမြတ်/People’s Spring
ချင်းလဲန်းကာကွယ်ရေးတပ်ဖွဲ့(CDF)- မတူပီအနေနဲ့ ချင်းပြည်ကောင်စီ ချင်းပြည်အစိုးရရဲ့စစ်မှုထမ်း မူဝါဒအရအထက်မှညွှန်ကြားချက်တွေကိုအကောင်အထည်ဖော်ဆောင်ရွက်မှာ ဖြစ်လို့ ပါဝင်ပူးပေါင်းကြဖို့ CDF မတူပီကမတ်လ ၂၄ရက်မှာ ကြေညာချက် ထုတ်ပြန်ပါတယ်။
လက်ရှိမှာ အာဏာသိမ်းစစ်တပ်က ချင်းပြည်နယ်အတွင်း ဆုံးရှုံးနယ်မြေတွေ ပြန်ရဖို့ အပြင်းအထန် ထိုးစစ်ဆင်နေတဲ့ ကာလဖြစ်သလို ချင်းပြည်ကောင်စီ ချင်းပြည်အစိုးရကလည်း ဖေဖော်ဝါရီလအတွင်း သတ်မှတ်ခဲ့တဲ့ စစ်မှုထမ်းမူဝါဒအရ လုပ်ငန်းစဉ်တွေ စတင်အကောင်အထည်ဖော်နေချိန်ဖြစ်ကြောင်း အသိပေးပြီး CF မတူပီ အနေနဲ့လည်း ညွှန်ကြားချက်တွေ အတိုင်း အကောင်အထည်ဖော်သွားမယ်လို့ ဖော်ပြထားပါတယ်။
“မူဝါဒနှင့်ကိုက်ညီသော သူများအနေဖြင့် အမျိုးသားတာဝန် ထမ်းဆောင်နိုင်ရန်အတွက် မိမိတို့ထံသို့ လာရောက်ပူးပေါင်းပါဝင်နိူင်ကြပါရန် အသိပေးထုတ်ပြန်အပ်ပါသည်”လို့ ကြေညာချက်မှာ ရေးသားထားပါတယ်။
Public Service Announcement
မတူပီ CDF ထိန်းချုပ်နယ်မြေအတွင်းက ထွက်ခွာမယ်ဆိုရင် CDF မတူပီ (ဌာနချုပ်)ရဲ့ ထောက်ခံစာဖြင့်သာ ထွက်ခွာနိူင်မယ်လို့လည်း အသိပေးထားပါတယ်။
ချင်းပြည်ကောင်စီ ဥက္ကဋ္ဌ ပူးဇင်ကျုံးကလည်း ချင်းပြည်နဲ့ ချင်းလူမျိုးတည်တံ့ခိုင်မြဲစွာ ရှင်သန်ရပ်တည်နိုင်ရေး ဆင်နွှဲတဲ့ အမျိုးသားတော်လှန်ရေးဟာ ချင်းပြည်သူတရပ်လုံးပါဝင်ဆင်နွှဲရမယ့် တော်လှန်ရေးဖြစ်တယ်လို့ မတ်လ ၂၀ ရက်မှာ ကျရောက်တဲ့ (၃၈) နှစ်မြောက်ချင်းတော်လှန်ရေးနေ့ မှာ ပြောကြားခဲ့ပါတယ်။
အာဏာသိမ်း စစ်တပ်ကို လက်နက်ကိုင် ခုခံခြင်းမှတပါး အခြားရွေးချယ်စရာ နည်းလမ်းမရှိတာကြောင့် ခုခံတော်လှန်စစ်ကို ဆင်နွှဲရခြင်းဖြစ်ကြောင်း ချင်းအမျိုးသားတပ်ဦး(CNF) ဥက္ကဋ္ဌလည်းဖြစ်သူ ပူးဇင်ကျုံးက ပြောပါတယ်။
စစ်တပ်ကင်းစင်တဲ့ နိုင်ငံရေး စနစ်သစ်တစ်ခုဆီကို ဦးတည်တိုက်ပွဲဝင်နေပြီး တနိုင်ငံလုံးမှာ ရှိတဲ့ တော်လှန်ရေး အဖွဲ့တွေ လူပုဂ္ဂိုလ်တွေတိုင်းရင်းသား လက်နက်ကိုင်တော်လှန်ရေးအဖွဲ့တွေနဲ့ လက်တွဲလျက် အတူတကွ ပူးပေါင်းတိုက်ပွဲဝင်နေကြောင်းလည်း ပူးဇင်ကျုံးက ပြောပါတယ်။
ချင်းအမျိုးသားတည်ဆောက်ရေးနဲ့ ချင်းပြည်တည်ဆောက်ရေး လက်တွေ့အကောင်အထည်ဖော်နေတာဖြစ်လို့ ချင်းပြည်သူတွအနေနဲ့ တက်ကြွစွာ ပါဝင်ကြရမယ်လို့လည်း ချင်းပြည်ကောင်စီ ဥက္ကဋ္ဌက ပြောကြားပါတယ်။
