မတ်-၂၆၊၂၀၂၆။ရောင်နီ/People’s Spring
ပြည်တွင်းစက်သုံးဆီဈေးက စံချိန်တင်ဆက်လက်မြင့်တက်နေပြီး ဓာတ်ဆီ ၊ ဒီဇယ်အမျိုးအစားအလိုက် တစ်လီတာကိုငွေကျပ် ၈၀၀ ကနေ ၁၂၀၀ ကျော်အထိ မြင့်တက်ခဲ့ပါတယ်။
အပတ်စဥ် သောကြာနေ့တိုင်း စစ်ကောင်စီဖွဲ့စည်းပေးထားတဲ့ စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်ကော်မတီရဲ့သတ်မှတ်စျေးအရ မတ်လ ၂၇ ရက်မှာ ရန်ကုန်အထိုင် စက်သုံးဆီဈေးက ဓာတ်ဆီ 92တစ်လီတာ ၄,၄၅၀ ကျပ် ၊ ဓာတ်ဆီ 95 တစ်လီတာ ၄,၉၇၅ကျပ်၊ ဒီဇယ်ဆီ တစ်လီတာ ၅,၄၅၀ကျပ်နဲ့ ပရီမီယံဒီဇယ် ၆,၀၈၅ကျပ် သတ်မှတ်လိုက်တာပါ။
စစ်ကောင်စီရဲ့ စက်သုံးဆီရည်ညွှန်းစျေးက လေးပတ်ဆက် မြင့်တက်နေတာဖြစ်ပြီး တစ်လအတွင်း သတ်မှတ်စျေးကြားမှာ တစ်လီတာ ကျပ် ၂၁၀၀ ကနေ ၃၂၀၀ ကျော်အထိ မြင့်တက်ခဲ့တာဖြစ်ပါတယ်။
Public Service Announcement
စက်သုံးဆီဈေးတွေ စံချိန်တင်မြင့်တက်နေသလို စစ်ကောင်စီက ဆီဝယ်ယူမှုပုံစံကိုလည်း အင်ဂျင်ပါဝါပေါ်မူတည်ပြီးတစ်ပတ်အတွင်း သတ်မှတ်ထားတဲ့ စက်သုံးဆီနှုန်းထားကို ဝယ်ယူရမယ့် စနစ်ကို ကြေညာခဲ့ပါတယ်။
အဲဒီ့ကြေညာချက်မှာ ဆိုင်ကယ်က၈လီတာ (၂ကြိမ်)၊ သုံးဘီးက ၂၅လီတာ(၃ကြိမ်) ၊ ထော်လာဂျီက ၃၀ လီတာ(၃ကြိမ်) ၊ အိမ်စီးကားနဲ့ ဌာနဆိုင်ရာယာဉ် အင်ဂျင်ပါဝါ ၂၀၀၀ စီစီ အထိ က ၃၅ လီတာ(၂ကြိမ်) ၊ ၂၀၀၀စီစီအထက်နဲ့ ၃၀၀၀ စီစီအထိက ၄၀လီတာ(၂ကြိမ်) ၊ ၃၀၀၀ စီစီအထက်က ၄၅ လီတာ(၂ကြိမ်) ကို တစ်ပတ်အတွင်းဝယ်ယူနိုင်မယ်လို့ ကြေညာထားပါတယ်။
အငှားယာဉ်တွေကိုတော့ တစ်ပတ်ကို သုံးကြိမ် ဝယ်ယူခွင့်ပေးထားပြီး အင်ဂျင်ပါဝါ ၂၀၀၀ စီစီ အထိ က ၉၀ လီတာ ၊ ၂၀၀၀စီစီအထက်နဲ့ ၃၀၀၀ စီစီအထိက ၁၀၀လီတာ နဲ့ ၃၀၀၀ စီစီအထက်က ၁၁၀ လီတာဝယ်ယူနိုင်မယ်လို့ဆိုပါတယ်။
ပုဂ္ဂလိကနဲ့ ဌာနဆိုင်ရာ ကုန်တင်ဝန်ပေါ့ ယာဉ်၊ ကုန်တင်ယာဉ်ကြီးတွေအတွက်ကိုတော့ တစ်ပတ်နှစ်ကြိမ် ဝယ်ယူခ္ငအင့် ပေးထားပြီး အင်ဂျင်ပါဝါ ၆၀၀၀ စီစီ အထိ၁၂၀လီတာ၊ ၆၀၀၀စီစီအထက် ကို ၁၅၀ လီတာ ၊ အင်ဂျင်ပါဝါ ၈၀၀၀ စီစီအထိ ၂၀၀လီတာ၊ ၈၀၀၀ စီစီအထက်က ၂၅၀ လီတာ စသဖြင့် သတ်မှတ်ပေးထားပါတယ်။
ယာဉ်တိုင်း ခရီးဝေးထွက်ခွာရင်တော့ လမ်းတစ်လျှောက်ကဆိုင်တွေမှာ စက်သုံးဆီရောင်းချပေးမယ်လို့ဆိုပါတယ်
ပုဂ္ဂလိက ခရီးသည်တင်ယာဉ်တွေအပါအဝင် လူမှုကူညီရေးယာဉ် ၊ လူနာတင်ယာဉ် ၊စည်ပင်အမှိုက်သိမ်းယာဉ် ၊ ရေပုတ်စုတ်ယာဉ် စတဲ့ ယာဉ်တွေကိုတော့ သတ်မှတ်ချက်မရှိပဲ လိုအပ်တဲ့ပမာဏကိုရောင်းချပေးသွားမယ်လို့ ထုတ်ပြန်ထားပါတယ်။
စက်သုံးဆီဝယ်ယူဖို့အတွက် စစ်ကောင်စီက စုံ၊ မ ရက်ခွဲပြီး ရက်အလိုက်ထည့်နေရတဲ့ စနစ်ကိုတော့ ဖျက်သိမ်းတယ်လို့ ကြေညာထားတာမရှိပါဘူး။
ဒါ့အပြင် လက်ရှိ အင်ဂျင်ပါဝါအလိုက် ဝယ်ယူခွင့်ပေးတဲ့ ပမာဏက အင်ဂျင်ပါဝါနည်းတဲ့ ကားတွေမှာ လက်ရှိစနစ်မှာ ဝယ်ယူရတဲ့ နှုန်းထက်လျော့ပြီးရရှိသွားမှာဖြစ်လို့အဆင်မပြေတာတွေရှိနိုင်တယ်လို့လည်း ဝေဖန်ထားကြပါတယ်။
