ဧပြီ−၈၊၂၀၂၆။ရှိန်း/People’s Spring
မန္တလေးတိုင်း၊မြင်းခြံမြို့နယ်မှာ စစ်ကြောင်း ၂ကြောင်းနဲ့ မီးလိုက်ရှို့နေတဲ့ စစ်တပ်က ကျေးရွာတွေ မီးရှို့ဖျက်ဆီးပြီး ဒေသခံပြည်သူတွေရဲ့ပစ္စည်းတွေသယ်ယူနေတယ်လို့ မြင်းခြံမြို့နယ်၊ပြည်သူ့ကာကွယ်ရေးအဖွဲ့(ပကဖ)က ပြောပါတယ်။
ပြီးခဲ့တဲ့မတ်လမှာ နွားထိုးကြီးမြို့နယ်က ကျေးရွာတွေကို မီးရှို့ဖျက်ဆီးခဲ့တဲ့ စစ်ကောင်စီတပ်စစ်ကြောင်းနဲ့ ဧပြီ ၅ ရက်နဲ့ ၆ရက်က မြင်းခြံမြို့နယ်က ဖက်ပင်အိုင်ကျေးရွာက ဒေသခံပြည်သူ ၈ဦးကို သတ်ဖြတ်ကာ ကျေးရွာ မီးရှို့ဖျက်ဆီးခဲ့တဲ့ ရဲကွန်မန်ဒိုစစ်ကြောင်းနဲ့ စစ်ကြောင်း ၂ကြောင်းပေါင်းပြီး မြင်းခြံမြို့နယ်မှာ စစ်ကြောင်းထိုး နေတယ်လို့ သိရပါတယ်။
အဲဒီစစ်ကြောင်း ၂ကြောင်းပေါင်းပြီး မြင်းခြံမြို့နယ်၊ကုပ်ကဲရွာကတဆင့် ဇီးပင်ကုန်၊ကျောက်ကန်ကျေးရွာတွေကို စစ်ကြောင်းထိုးလာတယ်လို့ သိရပါတယ်။
Public Service Announcement
အဲဒီထဲက ရဲကွန်မန်ဒိုစစ်ကြောင်းဟာ ရှေ့ကနေ ဒရုန်းတွေနဲ့ ဆက်တိုက်ဗုံးကြဲပြီးမှ ကျေးရွာတွေကို ဝင်ရောက်တာလို့ မြို့နယ်ပကဖ သတင်း ထောက်လှမ်းရေးနဲ့ ပြန်ကြား ရေးတာဝန်ရှိသူက ပြောပါတယ်။
“ရှေ့က နေဒရုန်းနဲ့ဗုံး တွေကြဲပြီးမှ နောက်က ရဲကွန်မိုဒိုစစ်ကြောင်းကလိုက်တာ။ပြီးတော့ မီးလိုက်ရှို့ နေတဲ့စစ်တပ်စစ်ကြောင်းရော အတူတူ ပေါင်းလာတယ်”လို့ ၎င်းက ဆက်ပြောပါတယ်။
အဲဒီစစ်ကြောင်းတွေဟာ ဒီကနေ့ ဧပြီ ၈ရက်မှာ သစ်ရုံကျေးရွာကို ရောက်လာပြီး စစ်သားတချို့က ဇီးပင်ကန်နဲ့ ကျောက်ကန်ကျေးရွာက ပစ္စည်းတွေကို ကားတွေနဲ့သယ်ကာ နွားထိုးကြီးမြို့ဘက်ကို သယ်ထုတ် နေတယ်လို့ သိရပါတယ်။
“အခုနောက်ပိုင်း ဒီမီးရှို့နေတဲ့ စစ်ကြောင်းတွေက ပြည်သူပိုင်ပစ္စည်းတွေကို သူတို့အရင်သယ်ထုတ်ပြီးမှ မီးလိုက်ရှို့ နေတာ။ပြီးတော့ ပြည်သူတွေက ရွာမီးရှို့ခံရပြီး နေစရာမရှိလို့ တောတွေထဲ ပြောင်းနေကြရတာ။အဲဒီစစ်ရှောင်တွေ ရှိတဲ့ဘက်ကို ဆက်တိုက်ဒရုန်းနဲ့ လိုက်ချနေတယ်”လို့ မြို့နယ်ပကဖ သတင်း ထောက်လှမ်း ရေးနဲ့ ပြန်ကြား ရေးတာဝန်ရှိသူက ပြောပါတယ်။
ယခု ဧပြီ ၇ရက်ကလည်း အဲဒီစစ်ကြောင်းက ဖက်ပင်အိုင်ကျေးရွာကို ဝင်ရောက် စီးနင်းမီးရှို့ခဲ့ပြီး ထပ်တိုး တွေ့ရှိချက်တွေအရ ဒေသခံပြည်သူ ၈ဦး သေဆုံးပြီး ပိတ်မိတဲ့ပြည်သူတွေကို ကယ်ထုတ်ပေးတဲ့ တော်လှန်ရေး ရဲဘော် ၃ဦးလည်း ကျဆုံးခဲ့တယ်လို့ သိရပါတယ်။
နွားထိုးကြီး၊မြင်းခြံနဲ့ တောင်သာမြို့နယ်တို့မှာ စစ်တပ်က ၂၀၂၅ ဩဂုတ်ကစတင် ထိုးစစ်ဆင်ခဲ့ပြီးနောက် နယ်မြေတချို့ကို ထိန်းချုပ်နိုင်သွားပေမယ့်ထိတွေ့တိုက်ပွဲတချို့ ဆက်တိုက်ဖြစ်နေပါတယ်။
