ကျင်ဒွေးမြို့ကို စစ်တပ်ဗုံးကြဲလို့ တံတားလုပ်သား ၉ဦးသေဆုံး

ဧပြီ ၃၀၊ ၂၀၂၆။ ထားမြတ်/People’s Spring

ချင်းပြည်နယ်၊ ကန်ပက်လက်မြို့နယ် ကျင်ဒွေးမြို့ ကျင်ဒွေးတံတားကို စစ်တပ်က တိုက်လေယာဉ်နဲ့ ဗုံးကြဲတိုက်ခိုက်ခဲ့လို့ ကျင်ဒွေးတံတား ထိန်းသိမ်းပြုပြင်နေတဲ့ အရပ်သား ၉ဦး သေဆုံးကာ ၃ဦး ဒဏ်ရာရခဲ့တယ်လို့ ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA)က သတင်းထုတ်ပြန်ပါတယ်။

စစ်တပ်ဟာ ဧပြီ ၂၉ရက်မနက်မှာ ကျင်ဒွေးတံတားကို လေကြောင်း တိုက်ခိုက်ခဲ့တာပါ။

CPU/CPAရဲ့ ထုတ်ပြန်ချက်အရ လေကြောင်းတိုက်ခိုက်မှုအတွင်း သေဆုံးသူတွေထဲမှာ အမျိုးသမီး ၁ဦး၊ အမျိုးသား ၈ဦး ပါဝင်ပါတယ်။

Public Service Announcement

အဲဒီ လေကြောင်းတိုက်ခိုက်မှုမှာ အရပ်သား သေဆုံးထိခိုက်တာတွေအပြင် စက်ယန္တရားတွေ ပျက်စီးမှု ရှိခဲ့တယ်လို့လည်း CPU/CPAက အသိပေးပါတယ်။ JCB စက်ကြီး (၁) စီး၊ Dayan ကား (၁) စီးနဲ့ KENBO R (၄) စီး တို့ ပျက်စီးခဲ့ရတယ်လို့ ဆိုပါတယ်။

လက်ရှိမှာ ပြည်သူတွေအနေနဲ့ နေအိမ်တွေ ၊ စျေးဆိုင်ခန်းတွေမျာ ဗုံးခိုကျင်းတွေ ကတုတ်ကျင်းတွေ အသင့်ထားရှိပြီး လေကြောင်းရန် သတိထားနေထိုင်ကြဖို့လည်း တိုက်တွန်းထားပါတယ်။

ချင်းတပ်ဖွဲ့ CPU/CPAဟာ မင်းတပ်၊ ကန်ပက်လက်၊ ကျင်ဒွေး၊ မတူပီ စတဲ့ ချင်းတောင်ပိုင်းဒေသတွေကို ၂၀၂၄ ကတည်းက မဟာမိတ်တွေနဲ့ပူးပေါင်းတိုက်ခိုက်သိမ်းပိုက်ထားတာပါ။

စစ်တပ်ကလည်း ကျင်ဒွေးအပါအဝင် ချင်းတောင်ပိုင်းကိုမြေပြင်ထိုးစစ် မဆင်နိုင်သေးတဲ့ အခြေအနေမှာ လေကြောင်းဗုံးကြဲတိုက်ခိုက်တာတွေ မကြာခဏ ပြုလုပ်လျက်ရှိလို့ အရပ်သားသေဆုံးတာ၊ နေအိမ်အဆောက်အအုံ ပျက်စီးတာတွေ မကြာခဏ ဖြစ်ပေါ်လျက်ရှိပါတယ်။

ကျင်ဒွေးလေကြောင်းတိုက်ခိုက်ခံရမှု အခြေအနေနဲ့ပတ်သက်ပြီး CPU/CPA ပြောရေးဆိုခွင့်ရှိသူ ဆလိုင်းအောင်မင်းထံ ဆက်သွယ်ထားဆဲဖြစ်ပါတယ်။

လက်ရှိမှာ စစ်တပ်ဟာ ချင်းတောင်ပိုင်းနဲ့ မကွေး အစပ် ဆောမြို့နယ် ကျောက်ထုဒေသတွေမှာ စစ်ရေးလှုပ်ရှားတာတွေရှိနေပါတယ်။

လတ်တလော စစ်တပ် စစ်ကြောင်းရဲ့ စစ်ရေးလှုပ်ရှားမှုဟာ လတ်တလော အခြေအနေအရ မင်းတပ်မြို့ကို ဦးတည်တာ မဟုတ်ဘူးလို့ သုံးသပ်ရပေမယ့် လိုအပ်တဲ့ ပြင်ဆင်မှုတွေ လုပ်ဆောင်ထားသလို အချိန်မရွေးတိုက်ပွဲ ဖြစ်နိုင်ကြောင်း CPU/CPA ပြောရေးဆိုခွင့်ရှိသူ အဖွဲ့ ဒုဥက္ကဋ္ဌ ဆလိုင်းအောင်မင်းက ပြီးခဲ့တဲ့ရက်ပိုင်းမှာ ပြောထားပါတယ်။

မင်းတပ်ဒေသ ချင်းတော်လှန်ရေးတပ်မှူးအချို့နဲ့ ဒေသခံတွေကလည်း လက်ရှိမှာ စစ်တပ်ရဲ့ မြေပြင်စစ်ကြောင်းထက် လေကြောင်းရန်ကို သတိပြုဖို့ နှိုးဆော်ထားပါတယ်။

“ လေကြောင်းတိုက်ခိုက်မှုတွေကိုတော့ ချင်းနဲ့ ယောနယ်အားလုံး အရင်ထက် ပိုဂရုစိုက်ကြပါ။ ဗုံးခိုကျင်း မဖြစ်မနေ တူးကြပါ။ လေယာဉ် သတိပေးချက်ရတာနဲ့ ဗုံးခိုကျင်းထဲ ဝင်တက်တဲ့ အကျင့်လုပ်ထားရင် လေကြောင်းအန္တရာယ်က လွတ်ကင်းပါလိမ့်မယ်။ လေယာဉ်မကြောက်ချင်ယောင်ဆောင်တဲ့ ရောဂါကို ပြင်ကြပါ။ ကြောက်ကြောက် မကြောက်ကြောက် ကိုယ့်တာဝန်က ဗုံးခိုကျင်းထဲ ရောက်နေဖို့ လိုအပ်ပါတယ်။” လို့ CPU/CPA တပ်မှူးတဦးက လူမှုကွန်ရက်မှာ ရေးသားထားပြီး လေယာဉ်ကြောက်စရာ မလိုတော့တဲ့နေ့ ရောက်လာဖို့အတွက် တော်လှန်ရေး အောင်နိုင်မှသာဖြစ်မယ်လို့ အသိပေးထားပါတယ်။