ပြည်မှာ ပြည်သူ့ပါတီက အမတ်လောင်း အိမ်ပေါ်တက် ပေါ်တာဆွဲခံရ

မေ-၂၀၊၂၀၂၆။ဟာနာဆန်၊တာရာ/People’s Spring

ပဲခူးတိုင်း၊ ပြည်မြို့မှာ ဦးကိုကိုကြီးရဲ့ ပြည်သူ့ပါတီက လွှတ်တော်ကိုယ်စားလှယ်လောင်း နေအိမ်ပေါ်တက် ပေါ်တာဆွဲခံလိုက်ရပါတယ်။

မေလ ၁၉ ရက် ည ၁၁ နာရီခွဲခန့်က ပဲခူးတိုင်း၊ ပြည်မြို့မှာနေထိုင်တဲ့ ပြည်သူ့ပါတီရဲ့ တိုင်းဒေသကြီး လွှတ်တော် ကိုယ်စားလှယ်လောင်း ဦးဇေယျာ​ဇော်ဟာ နေအိမ်မှာအိပ်နေချိန် စစ်တပ်က အတင်းဝင်ရောက် ဖမ်းဆီးပေါ်တာဆွဲသွားကြောင်း ပြည်သူ့ပါတီရဲ့ ပြည်မြို့နယ် ပါတီဝင်တစ်ဦးက လူမှုကွန်ရက်ကနေ အသိပေးပါတယ်။

ဦး​ဇေယျာဇော်ကို ပြည်မြို့ရှိတပ်မ(၆၆)လက်အောက်ခံ အမှတ် (၉၅၉) တပ်ထဲမှာ ဖမ်းဆီးချုပ်နှောင်ထားတယ်လို့ ၎င်းကဆိုပါတယ်။အခုလိုလုပ်ရပ်ဟာ စစ်မူထမ်းနည်းဥပဒေနဲ့ ဆန့်ကျင်တဲ့ လုပ်ရပ်ဖြစ်ကြောင်း ၎င်းက ရေးသားထားပါတယ်။ဦး​ဇေယျာဇော်ဟာ စစ်တပ်စီစဥ်တဲ့ ၂၀၂၅ ဒီဇင်ဘာနဲ့ ၂၀၂၆ ဇန်နဝါရီ ​ရွေး​ကောက်ပွဲမှာ ပြည်သူ့ပါတီကိုယ်စားပြုယှဥ်ပြိုင်ပြီး ရှုံးနိမ့်ခဲ့သူဖြစ်ပါတယ်။

Public Service Announcement

ပြည်သူ့ပါတီက ကိုယ်စားလှယ်လောင်းတစ်ဦးကလည်း “အဲဒီသတင်းကဟုတ်ပါတယ်။ အမှန်ကမဖြစ်သင့်ဘူး။ ဒီဖြစ်စဥ်ကို ကျွန်တော်တစ်ဦးတည်းရဲ့အမြင်ပြောရရင် ကန့်ကွက်တယ်။ အခုသူ့မိသားစုကိုချိတ်ဆက်နေတယ်။ လုပ်ပေးလို့ရတဲ့အနေအထားထိ လိုက်လုပ်ပေးမယ်။ ဒါကလည်းကျွန်တော်က ပါတီဝင်အချင်းချင်းကူညီတာပါ”လို့ ပြောပါတယ်။

ဒီဖြစ်စဥ်နဲ့ ပတ်သက်ပြီး ပြည်သူ့ပါတီက အခုသတင်း​ရေးသားချိန် ​မေ ၂၀ ည ၈ နာရီ ၁၅ မိနစ်အထိ့ထုတ်ပြန်ထားတာ မရှိသေးပါဘူး ။

ပြည်သူ့ပါတီဟာ ဦးကိုကိုကြီးရဲ့ ပါတီဖြစ်ပြီး သူက စစ်​အုပ်စုရဲ့ အတိုင်ပင်ခံ​ကောင်စီဝင်ဖြစ်ပါတယ် ။

အာဏာသိမ်းစစ်တပ်ဟာ ယခုနောက်ပိုင်း ရန်ကုန်၊ မန္တလေးအပါအဝင် မြို့ကြီးတွေမှာပါ နေအိမ်ပေါ်တက် ပေါ်တာဆွဲတာတွေ ပိုမိုပြုလုပ်နေပြီး စစ်မှုထမ်း အပတ်စဥ် (၂၅)ကို စတင်ဖို့ ပြင်ဆင်နေပါတယ်။