ချောင်းဦးမြို့နယ်ကို စစ်တပ်က စစ်ကြောင်းထိုးပြီး လူသတ် ရွာတွေ မီးရှို့နေ

ဇွန်-၁၁၊၂၀၂၆၊ကတ်သရင်းနှင်း၊People’s Spring

စစ်ကိုင်းတိုင်း၊ချောင်းဦးမြို့နယ်ကို စစ်တပ် စစ်ကြောင်းထိုးကာ ငါးလုံးတင်ရွာနဲ့ ဆင်မြေကျေးရွာက ပစ္စည်းတွေသယ်ယူကာ နေအိမ်တွေကို မီးရှို့နေတယ်လို့ ဒေသခံတွေက ပြောပါတယ်။

မေလနောက်ဆုံးပတ်မှာ စစ်ကိုင်းမြို့က တပ်မ (၃၃)နဲ့ အနောက်မြောက်တိုင်း၊စစ်ဌာနချုပ်(နမခ) က တပ်တွေပေါင်းပြီး နတ်ရေကန်ဘက်ကို စစ်ကြောင်းထိုးလာတာလို့ သိရပါတယ်။

ဇွန်လ၄ရက်က ငါးရှန်နဲ့ မှန်ချို ကျေးရွာဘက်ကိုစစ်ကြောင်းထိုး ဝင်ရောက်လာတာလို့ သိရပါတယ်။ဇွန်လ၅ရက်မှာ စစ်ကြောင်းက ရှေ့တိုးလာမို့ တော်လှန်ရေးတပ်တွေနဲ့ ထိတွေ့တိုက်ပွဲဖြစ်ခဲ့တယ်လို့ သိရပါတယ်။

Public Service Announcement

အဲဒီနောက် စစိတပ်က ရွာတော်လေးကျေးရွာက အမျိုးသား ၃ဦး ဖမ်းဆီးခံခဲ့ရပြီး ၁ဦးကို သတ်ဖြတ်သွားတယ်လို့ သိရပါတယ်။

အဲဒီစစ်ကြောင်းနဲ့ တော်လှန်ရေးတပ်တွေက ဇွန်လ၆ရက်နဲ့၇ရက်တွေမှာ ထိတွေ့တိုက်ပွဲထပ်မံဖြစ်ခဲ့ပြီး တော်လှန်ရေးတပ်တွေ နောက်ဆုတ် ပေးခဲ့ရတယ်လို့ သိရပါတယ်။

“စစ်ကောင်စီဘက်က ဒရုန်းတွေ၊ဂျိုင်ရယ်ကော်ပတာ‌ေတွ၊လက်နက်ကြီးတွေနဲ့မို့ ၇ရက် နေ့ကစပြီး နောက်ဆုတ် ပေးလိုက်ရတယ်။၇ရက် နေ့တိုက်ပွဲက ဆင်မြေ ရွာ မြောက်ပိုင်းမှာပါ”လို့ ဖြစ်စဉ်ကို သိရှိသူတဦး ကပြောပါတယ်။

အဲဒီစစ်ကြောင်းတွေဟာ လက်ရှိမှာ ငါးလုံးတင်ရွာနဲ့ ဆင်မြေကျေးရွာတို့ကို စီးနင်းပြီး ကား ၇စီးနဲ့ ဒေသခံတွေရဲ့ ပစ္စည်းတွေကို ချောင်းဦးမြို့ ထွေအုပ်ရုံး သယ်ထုတ်ပြီး ကျေးရွာက နေအိမ် တွေကိုလည်း မီးရှို့ဖျက်ဆီး နေတယ်လို့ သိရပါတယ်။

စစ်တပ်က နယ်မြေရှင်းလင်းရေးဆိုပြီး ကျေးရွာတွေကို စစ်ကြောင်းထိုးနေတာဖြစ်ပြီး ဇွန်လ၇ရက်က ထူးနီကျေးရွာကို အသေခံဒရုန်းနဲ့ ဗုံးကြဲခဲ့တာမို့ ပြည်သူ ၁ဦးလည်း ထိမှန်သေဆုံးခဲ့တယ်လို့ သိရပါတယ်။