ဇွန်-၁၂၊၂၀၂၆။ဇော်ရမ်း/ People’s Spring
ကချင်ပြည်နယ်၊ ရွှေကူမြို့အနီးမှာ ဒီကနေ့ ဇွန်လ ၁၂ရက်မှာလည်း တိုက်ပွဲပြင်းထန်နေပြီး ညနေပိုင်းမှာ စစ်တပ်က လေကြောင်းကနေ ဗုံးကြဲသွားတယ်လို့ ဒေသခံတွေက ပြောပါတယ်။
ရွှေကူမြို့ ၄လမ်းဆုံ၊ တော်လှန်ရွာ၊ ပန်းတင်ရွာနဲ့ ငါးဘတ်ကြီးကျေးရွာတွေဘက်မှာ ဇွန်လ ၁၁ရက် မနက်ပိုင်းကစပြီး တိုက်ပွဲဖြစ်ပွားခဲ့တာပါ။ ဒီနေ့မှာတော့ တော်လှန်ရွာမှာ တိုက်ပွဲပြင်းထန်ခဲ့ပြီး ညနေ ၄ နာရီကျော်မှာ စစ်တပ်က လေကြောင်းကနေ ဗုံးလာကြဲသွားတယ်လို့ ဒေသခံတွေက ပြောပါတယ်။
” စကစဘက်က အများကြီးပဲ ထိတာ။ KIA က ဒရုန်းနဲ့ အတိအကျချတာ။ လေကြောင်းကနေပါ လာပစ်ရတာ”လို့ တော်လှန်ရွာက ဒေသခံတစ်ဦးက ပြောပါတယ်။
Public Service Announcement
လေကြောင်းတိုက်ခိုက်မှုကြောင့် အရပ်သားထိခိုက်မှုရှိတယ်လို့သတင်းရပေမယ့် တိတိကျကျမသိရသေးဘူးလို့ ၎င်းက ပြောပါတယ်။
ရွှေကူမြို့အနီးက ၅လမ်းဆုံပါဝင် နေရာချို့မှာ ၂၀၂၆ နှစ်ဆန်းပိုင်းကတည်းက တိုက်ပွဲတွေဖြစ်ပွားခဲ့ပြီး စစ်တပ်က လေကြောင်းကနေ ဗုံးကြဲတဲ့ဖြစ်စဉ်တွေလည်းရှိခဲ့ပါတယ်။ ပြီးခဲ့တဲ့ ဧပြီနဲ့ မေလထဲမှာ အခြေအနေတွေငြိမ်သက်နေခဲ့ပေမယ့် မြို့ခံတွေဘေးလွတ်ရာကိုကြိုတင် တိမ်းရှောင်ကြဖို့ ဇွန်လ ၈ရက်နေ့က KIA သတိပေးချက်ထုတ်ပြန်ပြီးနောက်ပိုင်း စစ်တပ်က ပထမဆုံးလေကြောင်းကနေတိုက်ခိုက်တာဖြစ်ပါတယ်။
လက်ရှိဖြစ်ပွားနေတဲ့တိုက်ပွဲတွေထဲမှာ အရပ်သားထိခိုက်သေဆုံးမှုတွေရှိနေတယ်လို့လည်း သတင်းတွေထွက်ပေါ်နေပါတယ်။
” ဒေသခံတွေပိတ်မိနေတာရှိတယ်။ KIA က ထွက်ခိုင်းတယ်။ စစ်တပ်ကမထွက်ခိုင်းဘဲ ပိတ်ထားတယ်။ ရွာကိုပိတ်ထားပြီး လေကြောင်းကနေပါဗုံးကြဲတော့ ဘယ်လိုမှနေလို့မတတ်တော့ဘူး” လို့ ဒေသခံတစ်ဦးက ပြောပါတယ်။
ရွှေကူမြို့ဟာ လက်ရှိတိုက်ပွဲတွေပြင်းထန်နေတဲ့ ဗန်းမော်မြို့အပြင် KIA ထိန်းချုပ်ထားတဲ့ မဘိမ်းမြို့၊ စစ်ကိုင်းတိုင်းထဲမှာစစ်ရေးတင်းမာနေတဲ့ ကသာမြို့တွေနဲ့လည်း ဆက်စပ်နေပါတယ်။
ကချင်လွတ်လပ်ရေးတပ်မတော် (KIA) တပ်ရင်း (၁၂)က ရွှေကူမြို့နယ်မှ ဒေသခံတွေ မြို့ကနေ ခေတ္တတိမ်းရှောင်ဖို့ ဇွန်လ၈ရက်နေ့မှာ ထုတ်ပြန်ခဲ့ပါတယ်။ အဲဒီနောက်ပိုင်းမှာ စစ်တပ်က မြို့ကို ပိတ်ဆို့ခဲ့ပြီး ဒေသခံတွေကိုလည်းမြို့ကနေ မထွက်ခွာဖို့ ဖိအားပေးခဲ့ပါတယ်။ ဒီနေ့ညပိုင်းမှာလည်း တိုက်ပွဲတွေဆက်လက်ပြင်းထန်နေတယ်လို့ သိရပါတယ်။
