ဇွန် ၁၅၊ ၂၀၂၆။ဟာနာဆန်/People’s Spring
ပဲခူးနဲ့ ဧရာဝတီတိုင်းမှာ ပေါ်တာဆွဲခံရတဲ့ ပခုက္ကူမြို့နယ်အခြေစိုက် ခလရ (၂၃၅) တပ်ရင်းက စစ်မှုထမ်းတပ်သား ၂ ဦးဟာ COBRA ONE Pakokku တပ်ဖွဲ့ထံ အလင်းဝင်ရောက်လာခဲ့တယ်လို့ အဲဒီတပ်ဖွဲ့က သတင်းထုတ်ပြန်ပါတယ်။
ပေါ်တာဆွဲဖမ်းဆီးခံရတဲ့ စစ်မှုထမ်း တပ်သား မြင့်သူအောင်နဲ့ အောင်ဖြိုးသူတို့ ၂ ဦးဟာ ဇွန်လ ၁၄ ရက်မှာ ပခုက္ကူမြို့နယ် စစ်တပ်ရဲ့ တပ်မ (၁၀၁)လက်အောက်ခံ ခလရ (၂၃၅) တပ်ရင်းကနေ ပခုက္ကူအခြေစိုက် COBRA ONE Pakokku တပ်ဖွဲ့ထံ လက်နက်မဲ့ အလင်းဝင်ရောက်လာခဲ့တာလို့ အသိပေးပါတယ်။
၎င်းတပ်သားနှစ်ဦးအနက် မြင့်သူအောင်ဟာ ဟင်္သာတမြို့ကဖြစ်ပြီး အလုပ်ပြန်လာချိန် ပေါ်တာဆွဲခံရတာဖြစ်ကြောင်း၊ နောက်တစ်ဦးဖြစ်တဲ့ အောင်ဖြိုးသူဟာ ပဲခူးတိုင်းက ဖြစ်ပြီး ၎င်းနေအိမ်ပေါ်တက်ကာ အဆွဲခံခဲ့ရတာဖြစ်ကြောင်း သိရပါတယ်။
Public Service Announcement
ဒါ့အပြင် မြင့်သူအောင်ကို စစ်တပ်က အမြဲတမ်းစစ်သား အဖြစ် စစ်တပ်က သတ်မှတ်ထည့်သွင်းထားတယ်လို့ ဆိုပါတယ်။
ပေါ်တာဆွဲခံရတာချင်းတူပေမဲ့ သန္ဓေတပ်သား(အမြဲတမ်းတပ်သား)နဲ့ စစ်မှုထမ်းတပ်သား(ပစ)ဆိုပြီး ခွဲခြားထည့်သွင်းခံရတာနဲ့ ပတ်သက်လို့ COBRA ONE Pakokku တပ်ဖွဲ့တာဝန်ရှိသူက ယခုလိုရှင်းပြပါတယ်။
“သန္ဓေနဲ့ ပစကတော့ သူတို့ထည့်ချင်ရင် သန္ဓေဆိုပြီး လုပ်ပစ်လိုက်တာပဲ ပေါ်တာဆွဲပြီးတော့။ သူတို့ ထည့်ချင်တဲ့သူဆို သန္ဓေဆိုပြီး စာရင်းထည့်ပစ်လိုက်တာ။ ပစဆိုလည်းပစ ဒီအတိုင်းပဲထားလိုက်တာ။ သန္ဓေဆိုရင်လည်း ပစထဲနေရွေးထုတ်ပြီးတော့ (ပေါ်တာဆွဲတဲ့ထဲကနေပြီးတော့) သန္ဓေဆိုပြီး လုပ်ပစ်လိုက်တာ။”လို့ COBRA ONE Pakokku တပ်ဖွဲ့တာဝန်ရှိသူက ဆိုပါတယ်။
အမြဲတမ်းစစ်သားဖြစ်သွားရင် တခြားစစ်မှုထမ်းတွေလို ၂နှစ်မဟုတ်တော့ဘဲ အနှစ် (၂၀) သို့မဟုတ် သတ်မှတ်ထားတဲ့ အငြိမ်းစားယူရမယ့် သက်ပြည့်အသက်အရွယ်အထိ တာဝန်ထမ်းဆောင်ရတော့မှာဖြစ်ပါတယ်။
စစ်တပ်ဟာ ယခင်ကတည်းက စစ်မှုထမ်းတပ်သားသစ်တွေကို အမြဲတမ်း သန္ဓေတပ်သားတွေ ဖြစ်လာအောင် စည်းရုံးသိမ်းသွင်းတာတွေရှိပြီး ၁၀တန်းအောင်နဲ့ ဘွဲ့ရတွေဆိုပါက ရာထူးတိုးပေးတာမျိုး၊ ဗိုလ်လောင်းသင်တန်းတက်ခွင့်ပေးမယ်ဆိုတာမျိုးနဲ့ စည်းရုံးတယ်လို့ သိရပါတယ်။
