ဇူလိုင်-၁၄၊၂၀၂၆။ရွှေပြည်စိုး/People’s Spring
အာဏာသိမ်းစစ်တပ် နဲ့ MNDAAတို့ လားရှိုးမြို့မှာ ယနေ့ တွေ့ဆုံ ဆွေးနွေးခဲ့သလို စစ်သုံ့ပန်း ၁၀၀ ခန့်ကိုလည်း MNDAAက ပြန်လွှဲပေးလိုက်တယ်လို့ ရှမ်းပြည်နယ်မြောက်ပိုင်းကသတင်းရင်းမြစ်အချို့ကပြောပါတယ်။
လားရှိုးမြို့က ဆင်နှစ်ကောင်ဟိုတယ်မှာ စစ်ကောင်စီအရာရှိတချို့နဲ့ MNDAA အရာရှိတချို့ တွေ့ဆုံခဲ့ပြီး ပြန်လွှတ် ပေးတာလို့ သတင်းရင်းမြစ်အချို့ကပြောပါတယ်။
” စစ်တပ်ဖက်ကသိန္နီပြန်ပေးရေးပါထည့်ဆွေးနွေးတယ်။ကုန်သွယ်ရေးလမ်းပြန်ဖွင့်ဖို့ပါပေါ့။ဒါကို ကိုးကန့်ကသဘောမတူဘူး။ သုံ့ပန်းတွေပြန်လွှတ်လွှတ်ပေးပြီး ချွေးသိပ်နေတာ”လို့သတင်းရင်းမြစ်တဦးက ပြောပါတယ်။
Public Service Announcement
MNDAAဟာ၂၀၂၃ ခုနှစ်အောက်တိုဘာလ ၂၇ရက်မှာ ဖော်ဆောင်ခဲ့တဲ့ ၁၀၂၇ စစ်ဆင်ရေးအတွင်း ဗိုလ်ချုပ်အချို့အပါအဝင် စစ်ကောင်စီသုံ့ပန်းထောင်ချီပြီးဖမ်းဆီးခဲ့ပါတယ်။၂၀၂၄ ဇန်နဝါရီလ ၅ရက်က လောက်ကိုင်မြို့ရှိ စစ်တပ်ရဲ့ဒေသကွပ်ကဲမှုစစ်ဌာနချုပ်-ဒကစ ကို တိုက်ခိုက်သိမ်းပိုက်ချိန်မှာ လက်နက်ချအညံ့ခံခဲ့တဲ့ လောက်ကိုင်ဒကစမှူး ဗိုလ်မှူးချုပ်မိုးကျော်သူ၊ ဗိုလ်မှူးချုပ်ထွန်းထွန်းမြင့်အပါအဝင် ဗိုလ်မှူးချုပ်ခြောက်ဦး၊ အရာရှိ ၂၂၈ဦး၊အခြားအဆင့် ၁,၈၉၅ဦးကို ဖမ်းပြီးတပတ်ခန့်အကြာမှာ MNDAAက ပြန်လွှတ်ပေးခဲ့ဖူးပါတယ်။
လားရှိုးမြို့က အရှေ့မြောက်တိုင်းစစ်ဌာနချုပ်(ရမခ)ကို သိမ်းတဲ့တိုက်ပွဲမှာလည်း တိုင်းမှူးဟောင်း ဗိုလ်ချုပ်စိုးတင့်၊ စစ်ဆင်ရေးကွပ်ကဲမှု ဌာနချုပ်(၁) ဗိုလ်မှူးချုပ်မျိုးမင်းထွေး၊ ရမခတိုင်းစစ်ဦးစီးချုပ် ဗိုလ်မှူးချုပ်သန့်ထင်စိုးတို့လည်း MNDAAက ဖမ်းမိခဲ့ပါတယ်။ဒါပေမယ့် စစ်ကောင်စီထံ ပြန်လွှဲပေးခဲ့ပါတယ်။
တရုတ်အစိုးရကြားဝင်မှု နဲ့လားရှိုးမြို့ကို စစ်တပ် ပြန်လွှဲပေးပြီး နောက်ပိုင်းမှာလည်းကိုးကန့်တပ်က စစ်သုံ့ပန်းစစ်သားတွေကိုမကြာခဏ လွှဲပေးခဲ့ပါတယ်။ ၂၀၂၆ ခုနှစ် ဇန်နဝါရီလ ၂၅ရက် နဲ့ ဖေဖော်ဝါရီလ ၂၈ရက်နေ့တွေမှာလည်း စစ်သုံ့ပန်း ၇၀၀ ကျော် ပြန်လွှတ်ပေးခဲ့ပါတယ်။
ယခုတစ်ကြိမ်မှာစစ်သုံပန်း ၁၀၀ခန့် ပြန်လွှတ်ပေးတယ်လို့သာ သိရပြီး အသေးစိတ်မသိရှိရသေးပါဘူး။
ယခုရက်ပိုင်းမှာ MNDAA ထိန်းချုပ်ဒေသတွေနဲ့ပတ်သက်တဲ့ သတင်းမျိုးစုံထွက်နေပါတယ်။သိန္နီမြို့ကို စစ်တပ်ကပြန်တောင်းနေသလိုဇူလိုင်လဆန်းပိုင်းမှာ MNDAA အရာရှိတွေက သိန္နီမြို့မြို့ခံတွေကို လာရောက်တွေ့ဆုံပြီး မြို့ကိုအုပ်ချုပ်ရေးယန္တရားကို သူတို့လုပ်ဆောင်တော့မှာမဟုတ်ဘဲ ဒေသခံတွေကိုယ်တိုင်စီမံကွပ်ကဲဖို့ ပြောသွားတယ်လို့ မြို့ခံသတင်းရင်းမြစ်အချို့ကပြောပါတယ်။
ဒါ့အပြင် MNDAA ထိပ်ပိုင်းခေါင်းဆောင်အချို့ကို တရုတ်နိုင်ငံဖက်ကို ခေါ်ထားပြီးသိန္နီမြို့ကို စစ်တပ်ထံ ပြန်လွှဲပေးဖို့ ဖိအားပေးနေတယ်လို့ သတင်းရင်းမြစ်အချို့ကပြောပါတယ်။ အဲ့ဒီအချိန်မှာပဲ့ စစ်သုံ့ပန်းချို့ကို MNDAAက ပြန်လွှဲပေးတာဖြစ်ပါတယ်။
