ဇူလိုင်-၁၉၊၂၀၂၆။ခိုင်မြတ်/People’s Spring
အာဏာသိမ်းစစ်တပ်ဟာ ဒီကနေ့ညနေပိုင်းမှာရခိုင်ပြည်နယ်၊သံတွဲမြို့ပေါ်နဲ့ ပုဏ္ဏားကျွန်းမြို့အနီးဝန်းကျင်တို့ကို ဂျက်ဖိုက်တာအုပ်လိုက်နဲ့ လေကြောင်းဗုံးကြဲခဲ့တာကြောင့် သံဃာတော်၊ အမျိုးသမီးတွေအပါအဝင် ၇ ဦးထက်မနည်းဒဏ်ရာရခဲ့တယ်လို့ဒေသခံတွေကပြောပါတယ်။
ဇူလိုင်လ၁၉ရက်ညနေလေးနာရီကျော်အချိန်မှာသံတွဲမြို့လယ်ရဲစခန်း၊တရားရုံးဝန်းကျင်တို့ကို ဂျက်ဖိုက်တာသုံးစီးနဲ့ ဗုံးကြဲခဲ့တာကြောင့်အမျိုးသမီး၂ ဦးအပါအဝင်၄ ဦးထက်မနည်း ဒဏ်ရာရသွားခဲ့တယ်လို့ သိရပါတယ်။
“လေးယောက်ကြားတယ်။အဲဒါထက်လည်း များနိုင်တယ်။ဒဏ်ရာပြင်းတော့အသေအပျောက်လည်း ရှိနိုင်တယ်”လို့ သံတွဲဒေသခံတဦးက ပြောပါတယ်။
Public Service Announcement
ဒါ့အပြင် ဒီနေ့ ညနေခြောက်နာရီကျော်အချိန်မှာလည်း ပုဏ္ဏားကျွန်းမြို့အနီးကို ဗုံးကြဲခဲ့တာကြောင့် သံဃာတော် ၂ ပါးအပါအဝင် အရပ်သားပြည်သူ ၃ ဦး ထပ်မံထိခိုက်ဒဏ်ရာရခဲ့ပါတယ်။ “အုန်းခနဲ အသံကြားလိုက်တယ်။ နှစ်ချက်ကြားလိုက်တာပါ။ဘုန်းကြီးနှစ်ပါးလုံး ဒဏ်ရာပြင်းတယ်”လို့ပုဏ္ဏားကျွန်းမြို့ခံတဦးက ပြောပါတယ်။
အဲဒီဗုံးကြဲမှုတွေကြောင့်သေဆုံး၊ဒဏ်ရာရသူတွေရဲ့ အသေးစိတ်အချက်အလက်တွေကိုတော့ မသိရသေးပါဘူး။စစ်တပ်ဟာဇူလိုင် ၁၉ ရက်နေ့တရက်တည်းမှာပဲမနက်ပိုင်း ၁၁ နာရီကျော်အချိန်ကလည်း တောင်ကုတ်မြို့နယ် မအီမြို့ပေါ်ကို ဗုံကြဲခဲ့ပြီး ၅ ဦးသေဆုံးကာ ၁၄ ဦးထက်မနည်း ထိခိုက်ဒဏ်ရာရခဲ့ပါတယ်။
“ဒီနေ့ တညနေလုံးလေယာဉ်ဝဲနေတာမင်းပြားအထက်ကလည်းဝဲသွားသေးတယ်။ ဒီကောင်တွေကို ဘယ်လိုမှ မယုံရဘူး။အရမ်းသတိထားနေရတယ်။အခုမှရေဘေးပြီးတာ၊ လေယာဉ်တွေလာတာ ယုတ်မာလွန်းအားကြီးတယ်”လို့မင်းပြားမြို့ခံအမျိုးသမီးတဦးက ပြောပါတယ်။
စစ်တပ်ဟာအာရက္ခတပ်တော်(AA)ရဲ့ ထိုးစစ်တွေကိုစစ်တွေ၊ ကျောက်ဖြူအပြင် ဧရာ၀တီ၊ မကွေး၊ ပဲခူးတိုင်း၊ ချင်းပြည်နယ်စစ်မျက်နှာတို့မှာပါ တပြိုင်တည်း ရင်ဆိုင်နေရပြီး အဲဒီတိုက်ပွဲတွေအတွင်း တပ်စခန်းတွေ ဆက်တိုက် လက်လွှတ်နေရကာ သေဆုံးထိခိုက်မှုများနေတာကြောင့် အခုလို အရပ်သားတွေကို ဦးတည်ပစ်မှတ်ထားကာ လေကြောင်းဗုံးကြဲမှုတွေ လုပ်နေတာဖြစ်တယ်လို့ ဒေသခံတွေက ပြောကြပါတယ်။
AA ကလည်း ရခိုင်ဒေသတွင်း ရေဘေးဒုက္ခကြုံနေရချိန် ပြည်သူတွေကို ဗုံးကြဲတဲ့ စစ်တပ်ရဲ့ အောက်တန်းကျတဲ့ လုပ်ရပ်အပေါ် မှတ်တမ်းတင်ထားတယ်လို့ ထုတ်ပြန်ထားပါတယ်။
ရခိုင်မှာ အခုနောက်ပိုင်း ဂျက်တိုက်လေယာဉ်သုံးစီး(သုံးစီးအထက်)နဲ့ ကင်းထောက်လေယာဉ်တွေ တပြိုင်တည်း သုံးပြီးလေကြောင်းတိုက်ခိုက်မှုတွေအရင်ကထက်ပြင်းပြင်းထန်ထန်လုပ်လာတာကြောင့် လေကြောင်းအန္တရာယ်ကို အထူးသတိထားကြဖို့ AA က အသိပေးထားပါတယ်။
ရခိုင်ပြည်နယ်မှာ ၂၀၂၆ ဇန်ဝါရီ ၁ ရက်နေ့ကနေ ဇွန်လကုန်ထိ ခြောက်လအတွင်း အာဏာသိမ်းစစ်တပ်ရဲ့အကြမ်းဖက်သတ်ဖြတ်မှုကြောင့် အပြစ်မဲ့အရပ်သားပြည်သူ၈၃ ဦး သေဆုံးပြီး ၁၈၇ ဦး ထိခိုက်ဒဏ်ရာရခဲ့တယ်လို့ AA ရဲ့ လူသားချင်း စာနာထောက်ထားရေးနဲ့ ဖွံ့ဖြိုးရေဆိုင်ရာပူးပေါင်းဆောင်ရွက်ရေးရုံး(HDCO)က ထုတ်ပြန်ထားပါတယ်။
