ခေါင်လန်ဖူးမှာ တိုက်ပွဲနေ့စဉ်ဖြစ်၊ စစ်တပ်က ရိက္ခာခဲယမ်းဖြည့်တင်းနေတယ်လို့ KIA ပြော

ဇူလိုင် ၂၆၊ ၂၀၂၆။ ထားမြတ်/People’s Spring

ကချင်ပြည်နယ်၊ ခေါင်လန်ဖူးမြို့နယ်မှာ တိုက်ပွဲတွေ နေ့စဉ်ဖြစ်ပွားနေတယ်လို့ ကချင်လွတ်လပ်ရေးတပ်မတော်(KIO/KIA) သတင်းပြန်ကြားရေးဌာနက ဖော်ပြပါတယ်။

ဇူလိုင် ၂၅ရက် သတင်းဖော်ပြချက်မှာ KIA တပ်မဟာ(၇) နယ်မြေဖြစ်တဲ့ ပူတာအိုခရိုင် ခေါင်လန်ဖူးဒေသ စစ်ရေးအခြေအနေကို အသိပေးလာတာဖြစ်ပါတယ်။

စစ်တပ်ဟာ ခေါင်လန်ဖူးဘက်မှာ လက်နက်ခဲယမ်းတွေဖြည့်တင်းနေပြီး စစ်ရေးလှုပ်ရှားတာတွေ အင်အားတိုးချဲ့တာတွေ ပြုလုပ်နေတာကြောင့် KIA ပူးပေါင်းတပ်တွေနဲ့ တိုက်ပွဲဖြစ်ပွားနေတာဖြစ်ကြောင်း၊ စစ်တပ်နဲ့ ပြည်သူ့စစ်တပ်ဖွဲ့တွေဟာ ရှေ့တန်းက တပ်တွေကို စားနပ်ရိက္ခာပို့တာ လက်နက်ပို့တာတွေ ပုံမှန်လုပ်နေကြောင်း ဖော်ပြထားတာပါ။

Public Service Announcement

ဒါ့အပြင် စစ်တပ်ဟာ ကချင်ပြည်နယ်အနှံ့က KIA သိမ်းပိုက်ထားတဲ့နေရာတွေမှာ စစ်ရေးလှုပ်ရှားပြီး တိုက်ပွဲဖြစ်တာ၊ လက်နက်ကြီးနဲ့ ရမ်းပစ်တာ ဒရုန်းနဲ့ ကင်းလှည့်တာတွေ နေ့တိုင်းလုပ်ဆောင်နေတယ်လို့ အသိပေးထားပါတယ်။

KIA ပူးပေါင်းတပ်ဟာ ခေါင်လန်ဖူးဒေသက စစ်တပ်စခန်းအချို့ကို တိုက်ခိုက်သိမ်းပိုက်ခဲ့ပြီး လက်နက်ခဲယမ်းအချို့လည်း ရရှိထားပါတယ်။ ဇူလိုင် ဒုတိယပတ်က မြန်မာ-တရုတ် နယ်ခြားမှတ်တိုင် အမှတ်(၃၀)အနီးရှိ စစ်ကောင်စီနဲ့ ပြည်သူ့စစ်စခန်းကို KIA ပူးပေါင်းတပ်က တိုက်ခိုက်သိမ်းပိုက်မီးရှို့ဖျက်ဆီးခဲ့တာပါ။