တောင်သာတိုက်နယ်ပကဖတာဝန်ခံရဲ့နာရေးကို စစ်တပ် လေကြောင်းတိုက်ခိုက်၊ နေရာမှား ဗုံးကြဲ

ဇူလိုင်-၃၀၊၂၀၂၆၊နှင်း/ People’s Spring

မန္တလေးတိုင်း၊တောင်သာမြို့နယ်က တိုက်နယ်ပကဖ တာဝန်ခံရဲ့ နာရေးကို စစ်တပ်က လေကြောင်းတိုက်ခိုက်ဖို့ကြိုးစားခဲ့ပြီး နေရာမှား ဗုံးကြဲတိုက်ခိုက်ခဲ့တယ်လို့ တော်လှန်ရေးတပ်တွေက ပြောပါတယ်။

တောင်သာမြို့နယ်က ရုံးစည်ကြီးတိုက်နယ်ပကဖတာဝန်ခံ မအမရာမောင်(ခ)စွန်ရဲမ ဟာ သူ့လက် အောက်ခံ ရဲဘော်အချင်းချင်းစကားများတာကို ဝင်တားရာမှာ ကျည်မတော်တဆထွက်ပြီး ထိမှန်သေဆုံးခဲ့တာဖြစ်ပါတယ်။

မအမရာမောင်ရဲ့ နာရေးကို ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ဇူလိုင် ၂၉ရက် မနေ့က နေ့လည်ပိုင်းမှာ ပြုလုပ်ခဲ့ရာ တော်လှန်ရေးတပ်ဖွဲ့ အများအပြား တက်ရောက်ခဲ့တယ်လို့ သိရပါတယ်။

Public Service Announcement

အဲဒီနာရေးကို စစ်တပ်က လေယာဉ်နဲ့ တက်ရောက်ဂုဏ်ပြုတယ်လို့ စစ်တပ်ထောက်ခံသူတွေကအောင်ပွဲခံကာ လေကြောင်းတိုက်ခိုက်ခဲ့‌‌အကြောင်း ရေးသားနေကြပေမယ့် နာရေးကိုရောက်နေတဲ့တော်လှန်ရေးရဲဘော်တစ်ဦးက နေရာမှား ဗုံးကြဲတာဖြစ်နိုင်ကြောင်း ပြောပါတယ်။

“နာရေးကိုတော့ လေကြောင်းလာမတိုက်ပါဘူး။နာရေးကို လေကြောင်းလာ တိုက်တယ်ဆိုတာ အခုပြောမှကို သိတာ။တောင်သာမြို့နယ်တ နေရာကို တော့Mi-35နဲ့ လေကြောင်းတိုက် သွားတာရှိပါတယ်။ဒါပေမယ့် နေရာက အဝေးကြီး။ပြီးတော့ လေကြောင်းပစ်တဲ့ နေရာက လူလည်းမရှိတဲ့ နေရာဆိုတော့ ဘယ်သူမှ သတိမထားမိပါဘူး”လို့ အထက်ပါ ရဲဘော်က ပြောပါတယ်။

စစ်တပ်အာဏာမသိမ်းခင်ကတည်းက ကျောင်းသားအရေးတွေမှာပါဝင်ခဲ့ဖူးပြီး ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ကျောင်းသားသမဂ္ဂတွေကို အားပေးခဲ့သူ မအမရာမောင်ဟာ ရုံးစည်ကြီးတိုက်နယ်ပကဖ တာဝန်ယူခဲ့ပြီး အမျိုးသားဖြစ်သူဟာလည်း တော်လှန်ရေးတပ်ဖွဲ့ဝင်ဖြစ်တယ်လို့ သိရပါတယ်။

ကျည်မ တော်တဆပေါက်မှုမှာ ကျည်ဆန်ဟာ နံရံကိုမှန်ပြီး ပြန်ကန်ထွက်ကာ မအမရာမောင်ကို ပြန်မှန်ခဲ့တာဖြစ်ပြီး အဲဒီမတော်တဆမှုမှာ ပါဝင်သူရဲဘော်၂ဦးစလုံးကို ထိန်းသိမ်းထားတယ်လို့ သိရပါတယ်။