ဇူလိုင်- ၃၁၊ ၂၀၂၆။ဇော်၀င်း/People’s Spring
ကရင်နီပြည်နယ်၊ ဒီးမော့ဆိုမြို့နယ်၊ ဒေါငံခါးတိုက်ပွဲအတွင်း စစ်တပ်အထိနာတာကြောင့် လေကြောင်း တိုက်ခိုက်မှုတွေ အပြင်းအထန်လုပ်နေတယ်လို့ စစ်ရေးသတင်းရင်းမြစ်တချို့က ပြောပါတယ်။
ဒီကနေ့(ဇူလိုင် ၃၁ ရက်)မနက်ပိုင်းကတည်းက စစ်တပ်ဟာ ဂျက်ဖိုက်တာ ၂စီးထက်မနည်း ဒီးမော့ဆိုမြို့ပေါ်ပျံဝဲပြီး ဗုံးကြဲနေတယ်လို့ ဆိုပါတယ်။
ဒီးမော့ဆိုမြို့နယ် နန်းဖယ်ခုံ- ဒေါငံခါးလမ်းပိုင်းကို စစ်တပ်ကထိန်းချုပ်နိုင်ဖို့ကြိုးစားနေတာကြောင့် ဒေါငံခါးရွာအနီးမှာ တပတ်ကျော်ကြာ နေ့စဉ်နီးပါး တိုက်ပွဲတွေ ပြင်းထန်နေတယ်လို့ အသိပေးပါတယ်။
Public Service Announcement
“မနေ့ညကတော့ သူတို့တော်တော်လေး ခံရတယ်။ဘော်ဒီတွေ ဆွဲပြေးတာတို့။ပြန်ဆုတ်ပြေးတာတွေရှိတယ်”လို့ ဒီးမော့ဆိုအခြေစိုက် တော်လှန်ရေးရဲဘော်တစ်ဦးက ပြောပါတယ်။
စစ်တပ်က လေကြောင်း၊လက်နက်ကြီးတွေနဲ့ ပစ်ကူပေးပြီး တိုက်ခိုက်နေတာကြောင့် ဒေါငံခါးရွာအနီးက ကာကင်းတချို့ကို ကနဦးလက်လွှတ်ထားရတယ်လို့ သိရပါတယ်။
“မနက်အစောကတည်းက လေယာဉ်တောက်လျှောက်ပျံနေတယ်။ကြဲတာ ၉ နာရီ ၁၅ လောက်မှာ။ဒီးမော့ဆိုမြို့နားပဲ”လို့ ဒေသခံတစ်ဦးက ပြောပါတယ်။
ဒေါငံခါးရွာဟာ လွိုင်ကော်-ဒီးမော့ဆို လမ်းဆုံ နဲ့ မိုးဗြဲ-နန်းမယ်ခုံ-ဒီးမော့ဆို လမ်းပိုင်းပေါ်မှာရှိပြီး စစ်တပ်ရဲ့ အခြေစိုက်တပ်တွေကိုချိတ်ဆက်ဖို့ အရေးပါတဲ့ နေရာဖြစ်ပါတယ်။
လက်ရှိစစ်တပ်စစ်ကြောင်းမှာ ဒီးမော့ဆိုအခြေစိုက် ခလရ(၁၀၂)၊ ခမရ(၄၂၇)တပ်ရင်းနဲ့ စစ်တပ်လက်အောက်ခံ ပအိုဝ်းပြည်သူ့စစ် PNO တွေပါ၀င်တယ်လို့ တော်လှန်ရေးတပ်ဖွဲ့ဝင်တချို့က ပြောထားပါတယ်။
စစ်တပ်က ဒေါငံခါးရွာမှာရှိတဲ့ နှစ်သက်တမ်း ၆၀ ကျော်ရှိတဲ့ ဒေါငံခါးဘုရား ကျောင်းဝင်းထဲက သီလရှင်ကျောင်းဆောင်တွေကို လွန်ခဲ့တဲ့ ၂လ၀န်းကျင်က မီးရှို့ဖျက်ဆီးထားပါတယ်။
ပြီးခဲ့တဲ့နှစ် ဩဂုတ်လပိုင်းမှာ စစ်တပ်က အင်အားအလုံးအရင်းနဲ့ စစ်ကြောင်းထိုးလာပြီးနောက် ဒီးမော့ဆိုမြို့ပေါ်က နေရာအများစုကို ပြန်လည်ထိန်းချုပ်ခဲ့ပါတယ်။အဲဒီနောက်ပိုင်း မြို့အနီးပတ်ဝန်းကျင်နေရာတွေကို အထိုင်ချတပ်စွဲ ပြီး စစ်ကြောင်းထိုးတာ၊လက်နက် ကြီးနဲ့ပစ်ခတ်မှုတွေ မကြာခဏ ရှိပါတယ်။
