ဩဂုတ်-၃၊၂၀၂၆။ကတ်သရင်း/People’s Spring
စစ်ကိုင်းတိုင်း၊ဝက်လက်မြို့နယ်၊မုဆိုးခြုံရွာမ ရွာမှာ စပါးရောင်းလာတဲ့ လင်မယားနှစ်ဦး နေအိမ်ဓားပြတိုက်ခံရပြီး ငွေကျပ်သိန်း၂၅၀နဲ့ဖုန်းတွေပါယူသွားခံရကာ အမျိုးသားဖြစ်သူကိုပါ သတ်ဖြတ်သွားတယ်လို့ ဒေသခံ တွေက ပြောပါတယ်။
ဩဂုတ်လ၁ရက်(စနေနေ့ )ည၁၂နာရီမှာ မျက်နှာဖုံးစွပ်ထားတဲ့ လူ ၆ ဦးဟာ ဆိုင်ကယ်နှစ်စီးနဲ့ လက်နက်တွေကိုင်ပြီးမုဆိုးခြုံရွာမထဲက အသက်၆၀ ဝန်းကျင်ဦးဇော်ထွန်းနဲ့ ဒေါ်မာမာတို့အိမ်ကို ရောက်လာပါတယ်။အဲဒီနောက် လင်မယားနှစ်ဦးလုံးကို လက်ပြန်ကြိုးတုပ်ပြီးစပါးရောင်းရငွေ ငွေကျပ်သိန်း၂၅၀နဲ့ ဖုန်း ၄ လုံးကိုယူကာ အမျိုးသားဖြစ်သူကိုနားထင်သေနတ်နဲ့ တေ့ပစ်သွားတယ်လို့ ဒေသခံတွေကပြောပါတယ်။
“အမျိုးသမီးက အသက်ရှင်ခဲ့တယ်လေ။သူ ပြောရဲရင် ပေါ်မှာပဲ။သူ့ဟာသူမျက်လုံးပဲစည်းစည်း၊ဒီနယ်မှာအသံနဲ့တင်ဘယ်သူလဲဆိုတာသိကြတယ်။”လို့ဒေသခံတဦးကပြောပါတယ်။
Public Service Announcement
မုဆိုးခြုံရွာမဟာ စစ်တပ်တပ်စွဲထားတဲ့ ဟန်လင်းရွာရဲ့အနောက်ဘက်မှာရှိပြီး တော်လှန်ရေးတပ်တွေစိုးမိုးနယ်မြေ ဖြစ်တယ်လို့သိရပါတယ်။ရွာအဝင်မှာလည်းရပ်ကျေးပကဖရဲ့ကင်းတဲဂိတ်ရှိတယ်လို့ ဒေသခံ တွေက ပြောပါတယ်။
ပြီးခဲ့တဲ့ဇန်နဝါရီလအတွင်းကလည်း စပါးပွဲစားတဦး ငွေထုတ်ပြန်လာချိန်လမ်းမှာ နားထင်တေ့ပစ်သတ်ခံရပြီး ငွေကျပ်သိန်း ၆၀၀ လုယူခံခဲ့ရပါတယ်။ဒါ့အပြင် ဒီဖြစ်ရပ် မတိုင်ခင်မှာလည်း စပါး ရောင်းပြန်လာတဲ့ လင်မယားနှစ်ဦးပစ်သတ်ခံရပြီးငွေတွေ လုယက်ခံခဲ့ရသေးတယ်လို့သိရပါတယ်။
ဓါးပြတိုက်ခံရတဲ့ ဖြစ်စဥ်နဲ့ ပတ်သက်ပြီး ဝက်လက်မြို့နယ်က ပကဖ ၊ပအဖ ၊ပလဖ (ပသုံးလုံး) တာဝန်ရှိသူတွေကို ဆက်သွယ်မေးမြန်းဖို့ People’s Spring က ကြိုးစားပေမယ့် ဆက်သွယ်လို့မရသေးပါဘူး။
