ဩဂုတ်-၂၅၊၂၀၂၆။သတိုး/People’s Spring
ရန်ကုန်-မန္တလေး အမြန်လမ်း ၃၁၇ မိုင်မှာ ကားတစ်စီး အပူလွန်ကဲကာ အင်ဂျင်ခန်းကစတင်မီးလောင်ခဲ့တယ်လို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က အသိပေးထားပါတယ်။
ဩဂုတ် ၂၄ ရက် နေ့လည်က နေပြည်တော်ကနေ မန္တလေးမြို့ဘက်ကို မောင်းနှင်လာတဲ့ Lincoln Navigator Station Wagon ယာဉ် အပူလွန်ကဲပြီး မီးလောင်ခဲ့တာကြောင့် ယာဉ်တစ်စီးလုံးမီးလောင်ပျက်စီးသွားခဲ့တယ်လို့ သိရပါတယ်။
“ကားကမီးလောင်ခါစ ဟွန်းသံရှည်ကြီးတောက်လျောက်မြည်နေတယ်။ကားတံခါးဖွင့်ထားလည်းမတွေ့ရ။ကားနားမှာ တစ်စုံတစ်ယောက်မှလည်း မတွေ့ရလို့ အပြေးသွားပြီး ကားထဲလူပိတ်မိနေရင် ကယ်ထုတ်ပေးဖို့ တံခါးဖွင့်ကြည့်ခဲ့ပေမဲ့ ကားထဲလူရိပ်လူယောင်တော့ မတွေ့ရဘူး” လို့ မျက်မြင်တွေ့ခဲ့သူတစ်ဦးက ဗီဒီယိုဖိုင်နဲ့အတူတင်ထားပါတယ်။
Public Service Announcement
အဲဒါကြောင့် မီးလောင်မှုဖြစ်တဲ့နေရာနားက ရဲစခန်းကို အကြောင်းကြားပေးခဲ့တယ်လို့ ရေးသားထားပါတယ်။
သူ့ရဲ့ဗီဒိယိုအောက်မှာတော့ ဖေ့စ်ဘွတ်ခ်အသုံးပြုသူကတစ်ဦးက မီးလောင်တဲ့ကားက အရည်ကျိုပို့ဖို့သွားရင်း မီးလောင်ခဲ့တာလို့ မှတ်ချက်ရေးသားထားပါတယ်။
အမြန်လမ်းမှာသွားလာနေတဲ့ ယာဉ်မောင်းတွေအနေနဲ့ ယာဉ်ကြံ့ခိုင်မှုကို စစ်ဆေးဖို့ မီးသတ်ဆေးဘူးဆောင်ထားဖို့နဲ့ ယာဉ်အမျိုးအစားအလိုက် သတ်မှတ်မိုင်နှုန်းမောင်းနှင်ဖို့ အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့ က သတိပေးထားပါတယ်။
