စက်တင်ဘာ ၁၄၊၂၀၂၆။ထားမြတ်/People’s Spring
ကချင်ပြည်နယ်၊ ဗန်းမော်မြို့နယ် ကောင်ဂျာယန်ဒေသကို ထိုးစစ်ဆင်လာတဲ့ စစ်တပ်စစ်ကြောင်းကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်ခဲ့ရာ စစ်ကြောင်းတစ်ခုလုံးပြုတ်ပြီး အရှင်ဖမ်းမိသူ ၃၀ကျော်ရှိလာကြောင်း ကချင်စစ်ရေးသတင်းရင်းမြစ်က ပြောပါတယ်။
စစ်တပ်ထိုးစစ်ဆင်လာလို့ ကောင်ဂျာယန်ဒေသမှာ စက်တင်ဘာ ၁၂ရက်ကတည်းက တိုက်ပွဲစတင်ခဲ့ရာ မနေ့က တိုက်ပွဲပြင်းထန်ခဲ့ပြီး စစ်တပ်ဆုတ်ခွာသွားရာ KIA ပူးပေါင်းတပ်က ဒီကနေ့ စက်တင်ဘာ ၁၄ရက်မနက်အထိ လိုက်လံရှင်းလင်းရာ စစ်ကောင်စီတပ်ဖွဲ့ဝင်တွေ သေဆုံးတာနဲ့ အရှင်ဖမ်းမိတာတွေ ရှိခဲ့တာဖြစ်ပါတယ်။
“စစ်ကြောင်းတကြောင်းလုံးပြုတ်သွားတာပေါ့။ ကောင်ဂျာယန်ဘက်ကို ထိုးတဲ့ စစ်ကြောင်းတကြောင်းလုံး။ သေတာ လေးဆယ်ကျော်သွားပြီ။ စစ်သုံ့ပန်းက ၂၆ယောက် ။ အခုသုံးလေးယောက် ထပ်ပြီးဖမ်းမိတယ်ပြောတယ်။ အလောင်းက လေးဆယ်ကျော်။စစ်သုံံ့ပန်း အရှင်မိတာ ၃၀ကျော်သွားပြီ”လို့ ကချင်စစ်ရေးသတင်းရင်းမြစ်က ပြောပါတယ်။
Public Service Announcement
ဒါ့အပြင် စစ်ကောင်စီတပ်ဖွဲ့ဝင် အများအပြား သေဆုံးနေတဲ့ ရုပ်သံမှတ်တမ်းကိုလည်း သတင်းရင်းမြစ်က ပြသပါတယ်။
KIA သတင်းပြန်ကြားရေးဌာနကလည်း ကောင်ဂျာယန်တိုက်ပွဲ အကြောင်း ကချင်ဘာသာနဲ့ ထုတ်ပြန်ထားပြီး စစ်တပ်အထိနာ ဆုတ်ခွာသွားလို့ ဒရုန်း၊ လက်နက်ကြီးတွေနဲ့ ဆက်လက်တိုက်ခိုက်ခဲ့ကြောင်း အသိပေးထားပါတယ်။ စစ်တပ်ဘက်ကလည်း လေကြောင်း ပစ်ကူပေး တိုက်ခိုက်မှုတွေရှိတယ်လို့ ဆိုပါတယ်။
စစ်တပ်ဟာ ဩဂုတ်လကုန်ပိုင်းနဲ့ စက်တင်ဘာလ အတွင်း ဗန်းမော်၊ရွေကူမြို့နယ်တွေမှာ ဖြစ်ပွားခဲ့တဲ့ မြေပြင်တိုက်ပွဲတွေအတွင်း ထိခိုက်သေဆုံးမှုများပြား အထိနာလျက်ရှိပါတယ်။
ဗန်းမော်မြို့နယ် စင်းခန်းဒေသ တိုက်ပွဲ၊ ရွှေကူမြို့နယ် ဇင်းဘုံဒေသ တိုက်ပွဲ၊ သင်္ဘောအင်းကျေးရွာတိုက်ပွဲ တွေမှာ စစ်တပ်ဘက်က အထိနာကာ တပ်ရင်းမှူးအဆင့် အရာရှိတွေအပါအဝင် သေဆုံးထိခိုက်များပြားခဲ့တယ်လို့ ကချင်သတင်းရင်းမြစ်တွေက ပြောပါတယ်။
ဒါ့အပြင် ရွှေကူကနေ ဗန်းမော်မြို့ကို ဝင်လာတဲ့ စစ်သင်္ဘောအုပ်စုကို KIA ပူးပေါင်းတပ်က တိုက်ခိုက်ခဲ့ရာ သင်္ဘောများစွာ ထိခိုက်ပျက်စီးခဲ့သလို စင်းခန်းတံတားအနီး တိုက်ပွဲမှာ ထိခိုက်ခဲ့တဲ့ စစ်တပ်သင်္ဘောဟာ ကမ်းကပ်ပြီး လက်နက်ချလို့ ဗိုလ်ကြီး ၂ဦးအပါအဝင် စစ်ကောင်စီ လက်နက်ကိုင် ၁၁၈ဦး၊ ကလေးနဲ့ အမျိုးသမီးတွေအပါအဝင် တပ်မိသားစုဝင်အချို့၊ သင်္ဘောနဲ့လိုက်လာတဲ့ အရပ်သားအချို့ကို စက်တင်ဘာ ၂ရက်နေ့မှာ ဖမ်းဆီးရမိခဲ့ပါတယ်။
ဖမ်းမိစစ်သုံ့ပန်းတွေကို နိုင်ငံတကာ ဥပဒေနဲ့အညီ ကောင်းမွန်စွာ စောင့်ရှောက်ထားတယ်လို့လည်း KIA က အသိပေးထားပါတယ်။
