စက်တင်ဘာ – ၂၉ ၊၂၀၂၆
မန္တလေးမြို့ကလေးဆေးရုံကြီးမှာဆေးရုံလာတက်နေတဲ့စစ်ကိုင်းတိုင်း၊ ရွှေဘိုမြို့နယ်က ကလေးငယ်တွေရဲ့ဖခင်နှစ်ဦးဟာအာဏာသိမ်းစစ်တပ်အတွက်ပေါ်တာဆွဲခံရပြီးနောက်ဝေဖန်မှုတွေ မြင့်တက်လာချိန်မှ စစ်တပ်က ပြန်လွှတ်ပေးလိုက်ပါတယ်။
“လိုင်းပေါ်မှာလူပြောများနေလို့ ပြန်လွှတ်ပေးလိုက်တာပါ”လို့ ဖြစ်စဉ်ကို သိတဲ့လုံခြုံရေးအရ အမည်မဖော်လို့တဲ့သတင်းရင်းမြစ်က ပြောပါတယ်။
ပေါ်တာဆွဲခံရတဲ့ကလေးဖခင်တွေဟာအသက် ၃၃ နှစ်အရွယ်နဲ့ အသက် ၃၅ နှစ်အရွယ် တွေရှိကြတာပါ။
Public Service Announcement
ပြီးခဲ့တဲ့ရက်ပိုင်းစက်တင်ဘာလ ၂၆ ရက်မှာသူတို့နှစ်ဦးဟာ မန္တလေးမြို့ လူစည်ကားနေရာမှာရှိတဲ့ကလေးဆေးရုံကြီးကနေအပြင်ထွက်ချိန်မှာပေါ်တာဆွဲခံရတာပါ။
ဆေးရုံတက်နေရတဲ့ကလေးငယ်တွေရဲ့ဖခင်တွေပေါ်တာဆွဲခံရတာကြောင့် လူမှုကွန်ရက်မှာဝေဖန်သံတွေထွက်လာပြီးနောက်သုံးရက်အကြာမှာ ပြန်လွတ်လာတာလည်းဖြစ်ပါတယ်။
ပြန်လည်လွတ်မြောက်လာတဲ့ ပုံမှာတော့ အမျိုးသားနှစ်ဦးစလုံး ကိုဦးထုပ်ကိုယ်စီဆောင်းထားစေတာတွေ့ရပါတယ်။
ဒါကပေါ်တာဆွဲခံရပြီးနောက်ဆံပင်ကိုတပ်သားသစ်ပုံစံညှပ်ပြီးသားဖြစ်နေတာကိုဖုံးကွယ်ထားချင်တာကြောင့်ဦးထုပ်ဆောင်းစေတာဖြစ်တယ်ဆိုတဲ့ ထောက်ပြပြောဆိုမှုတွေလည်းလူမှုကွန်ရက်မှာ ထွက်ပေါ်လာနေပါတယ်။
အာဏာသိမ်းစစ်တပ်ရဲ့အလယ်ပိုင်းတိုင်းစစ်ဌာနချုပ်အခြေစိုက်ရာ မန္တ လေးမြို့ဟာအမျိုးသားတွေကို တပ်သားသစ်အဖြစ် ပေါ်တာဆွဲ ကြမ်းနေတဲ့ မြို့လည်းဖြစ်ပါတယ်။
ပေါ်တာဆွဲတာတွေရှိနေတာကိုစစ်တပ်ရဲ့လက်ဝေခံပျုစောထီးခေါ် ပြည် သူ့စစ်ခေါင်းဆောင်ပိုင်းသက်န်းဝတ်ဘုန်းကြီးပေါက်ကိုယ်တော်ကိုယ်တိုင် သူ့ရဲ့ တယ်လီဂရမ်ချန်နယ်ကနေ ပြီးခဲ့တဲ့ ဇွန်လ ၂၈ ရက်က ဝန်ခံထားပါတယ်။
အာဏာသိမ်းစစ်တပ်ဟာစစ်မြေပြင်မှာတပ်ဖွဲ့ဝင်အင်အားပြုန်းတီးမှုများလာချိန်မှာအရွယ်ကောင်းလူငယ်လူရွယ်တွေကို တပ်သားသစ်အဖြစ် စုဆောင်းဖို့ အာဏာသိမ်းစစ်ခေါင်းဆောင်က ပြီးခဲ့တဲ့ ၂၀၂၄ ခုနှစ် ၊ဖေဖော်ဝါရီလ ၁၀ ရက်မှာ ပြည်သူ့စစ်မှုထမ်း ဉပဒေကို အသက်သွင်းခဲ့တာပါ။
အဲဒီနောက်စစ်မှုထမ်းအပတ်စဉ် တစ်ခုကို လူအင်အား ငါးထောင်နှုန်း စုဆောင်းနေတာဖြစ်ပြီး အပတ်စဉ်သတ်မှတ်နှုန်းထားပြည့်ဖို့ လူငယ်တွေကို ဖိအားပေးမဲနှိုက်စေတာ၊ လူငယ်တွေနေအိမ်မှာမရှိရင် မိဘတွေကို မဲနှိုက်စေပြီးမဲပေါက်ရင်သားဖြစ်သူကို ပြန်ခေါ်စေတာ၊အခြေခံလူတန်းစားလူငယ်တွေကိုပစ်မှတ်ထားပြီးလူသစ်စုဆောင်းတာ ၊ ပေါ်တာဆွဲတာ စတဲ့ နည်းလမ်းမျိုးစုံသုံးပြီး လူသစ်စုဆောင်းတာပါ။
စုဆောင်းလို့ရတဲ့လူငယ်တွေကိုစစ်သင်တန်းကာလတိုပေးပြီး တိုက်ပွဲတွေ ဖြစ်ရာရှေ့တန်းစစ်မြေပြင်တွေဆီစေလွှတ်နေတာလည်းဖြစ်ပါတယ်။
အာဏာသိမ်းစစ်တပ်ဟာတိုက်ပွဲတွေမှာပစ လို့အတိုကောက်ခေါ်တဲ့ ပြည်သူ့စစ်မှုထမ်းသင်တန်းဆင်းလူငယ်အင်အားကိုအလုံးအရင်းသုံးလာတယ်ဆိုတာကို တော်လှန်ရေးအင်အားစုတွေက ပြောဆိုထားကြပါတယ်။
