အောက်တိုဘာ ၅၊ ၂၀၂၆။ ထားမြတ်/People’s Spring
တိုက်ပွဲတွေ ပြင်းထန်ခဲ့တဲ့ ရွှေကူ-ငါးအိုးလမ်းမကြီးကို ကချင်လွတ်လပ်ရေးတပ်မတော်(KIO/KIA)က ပိတ်ပင်ထားတာဖြစ်တဲ့အတွက် ပြည်သူများအားလုံးအနေနဲ့ အဲဒီ လမ်းမကြီးကို သွားလာလှုပ်ရှားခြင်းမပြုကြဖို့ KIA တပ်ရင်း(၁၂) တပ်ရင်းမှူးက အောက်တိုဘာ ၅ရက်မှာ သတိပေးချက် ထပ်မံ ထုတ်ပြန်ပါတယ်။
ကချင်ပြည်နယ် ရွှေကူမြို့အဝင် လမ်းမကြီးနဲ့ ငါးအိုး-ရွှေကူ လမ်းမကြီးကို ဇွန် ၈ရက်မှစတင်ပြီး ရက်အကန့်အသတ်မရှိ သွားလာခွင့်ပိတ်ထားတဲ့ အခြေအနေမှာ ပြည်သူတွေအနေနဲ့ ထုတ်ပြန်ချက်ကို လိုက်နာဖို့ သတိပေးခဲ့တာပါ။
“ပိတ်ပင်ထားသောလမ်းပိုင်းများကို သွားလာပါက စစ်ကောင်စီ၏ သတင်းပေး၊ သတင်း ယူ၊ သူလျှို (ဒလန်) အဖြစ် သတ်မှတ်မည်ဖြစ်ပြီး နောက်ဆက်တွဲဖြစ်ပေါ်လာမည့် ပြဿနာများကို မိမိတို့ KIO.KIA အနေဖြင့် လုံးဝ(လုံးဝ) တာဝန်ယူဖြေရှင်းပေးမည် မဟုတ်ပါ”လို့လည်း KIA တပ်ရင်း(၁၂) တပ်ရင်းမှူးက ပြင်းထန်တဲ့ သတိပေးချက် ထပ်မံ ထုတ်ပြန်ထားပါတယ်။
Public Service Announcement
ရွှေကူနဲ့ ငါးအိုးကို သွားလာမယ်ဆိုရင် KIO/KIA သတ်မှတ်ထားတဲ့ လမ်းအတိုင်းသာ သွားလာဖို့လည်းဖော်ပြထားပါတယ်။
KIA တပ်မဟာ(၁၁) တပ်ရင်း(၁၂)နယ်မြေဖြစ်တဲ့ ရွှေကူမြို့အဝင် လမ်းမကြီး နဲ့ ငါးအိုး-ရွှေကူလမ်းမကြီး အားလုံးပိတ်ထားချိန် ပြည်သူတွေအနေနဲ့ တော်လှန်-လမ်းကူး-စီသာ-မိုးကင့်-စီဖွားလမ်းပိုင်းကိုသာ အသုံးပြုကြရမယ် ဇွန်လ ၈ရက် ကြေညာချက်မှာ အသိပေးထားပါတယ်။
KIA အနေနဲ့ စစ်ရေးအခြေအနေတွေကြောင့် ရွှေကူမြို့တွင်းရှိ ပြည်သူတွေအားလုံး တိမ်းရှောင်ကြဖို့ ထုတ်ပြန်ထားသလို စစ်ကောင်စီတပ်ကလည်း ပြည်သူတွေ စစ်မရှောင်ဖို့ တားမြစ်ပိတ်ပင်ထားပါတယ်။
စစ်ကောင်စီတပ်ဟာ ရွှေကူနယ်အပါအဝင် ကချင်ပြည်နယ်အတွင်း လက်လွှတ်ဆုံးရှုံးထားရတဲ့ နယ်မြေဒေသတွေ မြို့တွေ ပြန်ထိန်းချုပ်နိုင်ဖို့ မေလကတည်းက ရွှေကူနယ်မှာ စစ်အင်အားအလုံးအရင်းနဲ့ ထိုးစစ်ဆင်နေပေမဲ့ ထိရောက်မှုမရှိဘဲ KIA ပူးပေါင်းတပ်တွေရဲ့ တိုက်ခိုက်မှုကြောင့် ရွှေကူ၊ ဗန်းမော် တိုက်ပွဲတွေမှာ စစ်ကောင်စီတပ် အထိနာလျက်ရှိပါတယ်။
