ဗီဒီယိုရိုက်ကူးချိန် ညနေ ၄ နာရီခွဲ၊ ရေဝေးသုသာန်။
ကိုဗစ်လူနာသေဆုံးလူနာတွေတအားများနေပြီး ရန်ကုန်က သင်္ချိုင်းတွေမှာသင်္ဂြိုဟ်ဖို့ တန်းစီစောင့်နေရတဲ့အနေအထားတွေဖြစ်နေတယ်လို့ နာရေးကူညီမှုဆောင်ရွက်နေသူ တစ်ဦးက ပြောပါတယ်။
“အခုက အိမ်မှာ ဆုံးဆဲ့သူ ဘယ်သူမဆို နေ့ချင်းချရတာဖြစ်တော့ သင်္ဂြိုဟ်ဖို့ကို တန်းစီစောင့်နေကြရတာ” လို့ အဲဒီ ပရဟိတဆောင်ရွက်နေသူက ပြောပါတယ်။
သင်္ချိုင်းတွေမှာ အရင်လို ခန်းမတွေ ငှားရမ်းပြီးတော့ မိသားစု၊ မိတ်ဆွေတွေ လိုက်ပါ သင်္ဂြိုဟ်တာမျိုးကို ဆေးရုံ၊ ဆေးခန်းတွေမှာ သေဆုံးတဲ့ ကိုဗစ်သံသယမရှိတဲ့ လူနာတွေကိုသာ ခွင့်ပြုထားတာဖြစ်လို့ နေအိမ်မှာ သေဆုံးသူတွေကတော့ ဒီတိုင်းပဲ သင်္ဂြိုဟ်စက်ရှေ့မှာ စောင့်ဆိုင်းပြီး အစဉ်လိုက် သင်္ဂြိုဟ်ရတာဖြစ်တယ်လို့ ဆိုပါတယ်။
Public Service Announcement
စစ်ကောင်စီက နေ့စဉ် လူနာ တိုးနှုန်း၊ သေဆုံးမှု အရေအတွက်တွေကို ထုတ်ပြန်ပေးနေပြီး မနေ့ကဆို သေဆုံးသူ ၁၀၉ ဦး ရှိတယ်လို့ ထုတ်ပြန်ခဲ့ပါတယ်။
ဒါပေမယ့်ကျန်းမာရေးဝန်ကြီးဌာနရဲ့ ဓာတ်ခွဲခန်းတွေမှာ စစ်ဆေးတာမဟုတ်ဘဲ အိမ်မှာနေရင်းဖျားနာ အောက်စီဂျင်ကျ သေဆုံးသူတွေလည်း အမြောက်အများရှိနေပြီး စစ်ကောင်စီစာရင်းထက် သေဆုံးသူက ပိုများနေနိုင်တယ်လို့ သုံးသပ်ကြပါတယ်။
တစ်ချို့အိမ်တွေမှာ တစ်ယောက်မက ဆက်တိုက်သေဆုံးတာမျိုးတွေလည်း ကြုံနေရပြီး ဆေးရုံတက်ခွင့်မရတာ၊ အောက်စီဂျင်ရဖို့ ခက်ခဲနေတာတွေကြောင့်ဖြစ်တယ်လို့ ကာယကံရှင်တွေရဲ့ ပြောကြားချက်အရသိရပါတယ်။
