အီရန် ရေတပ်ရဲ့ အကြီးဆုံး သင်္ဘော မီးလောင်ပြီး နစ်မြုပ်

ဇွန်လ ၂ ရက် မနက်ပိုင်းက ဟောမုဇ် ရေလက်ကြားနားက အိုမန် ပင်လယ်ကွေ့မှာရှိတဲ့ အီရန်ပိုင် ဂျန့်စ်ခ် ဆိပ်ကမ်းနားမှာ သင်္ဘော နစ်မြုပ်သွားခဲ့တာပါ။ ၂၀၇ မီတာ ရှည်လျားတဲ့ Kharg သင်္ဘောကြီးကို ရေတပ်ရဲ့ အဓိက ထောက်ပံ့ရေး ရေယာဉ်အဖြစ် အသုံးပြုနေတာပါ။

သင်္ဘော မီးလောင်ရတဲ့ အကြောင်းရင်းကိုတော့ ရှင်းရှင်းလင်းလင်း မသိရသေးပါဘူး။ အီရန်မီဒီယာတွေရဲ့ ဖော်ပြချက်အရ မီးလောင်မှုကြောင့် Khargပေါ်က အမှုထမ်းနဲ့ သင်တန်းသား ၄၀၀ လောက် အရေးပေါ် ပြောင်းရွှေ့ ထွက်ပြေးခဲ့ရပြီး ၃၃ ဦး ထိခိုက် ဒဏ်ရာရခဲ့ကြောင်း သိရပါတယ်။

မီးလောင်မှု အကြောင်းရင်းကို စုံစမ်းနေဆဲဖြစ်ပြီး အီရန် အာဏာပိုင်တွေက တိတိကျကျ ဘာမှ မပြောသေးပါဘူး။ ပြီးတော့ သင်္ဘော မီးလောင်ရာမှာ ပြည်ပ ပယောဂ ပါမပါ ဆိုတာကိုလည်း မသိရသေးပါဘူး။ အမေရိကန်ရဲ့ ထောက်လှမ်းရေး ဂြိုဟ်တု ဓာတ်ပုံတွေမှာတော့ Khargမှာ မီးမလောင်ခင် ဆိပ်ကမ်းမှာ မီးစလောင်တယ်ဆိုတဲ့ အထောက်အထားတချို့ကို တွေ့မြင်ခဲ့ရပါတယ်။

အီရန်ရဲ့ စစ်လက်နက် အများစုလိုပဲ Khargဟာလည်း အတော်လေး သက်တမ်း အိုဟောင်းနေပြီး ၁၉၇၉ ခုနှစ်၊ အစ္စလာမ်မစ် တော်လှန်ရေး မတိုင်ခင် ကတည်းက တည်ဆောက်ထားတာပါ။ ဒီသင်္ဘောကြီးကို ၁၉၇၇ ခုနှစ်က ဗြိတိန်မှာ ဆောက်လုပ်ပြီး ၁၉၈၄ ခုနှစ်ကျမှ အီရန် ရေတပ်မှာ စတင် သုံးစွဲခဲ့တာ ဖြစ်ပါတယ်။

Public Service Announcement