သမ္မတ ဂျိုးဘိုင်ဒန်ရဲ့ အစိုးရ အဖွဲ့ဟာ လာမယ့် ၂ နှစ်တာ ကာလအတွင်း ဒီအစီအမံကို အထမြောက်အောင် အကောင်အထည် ဖော်သွားမယ်လို့ အမေရိကန် မီဒီယာတွေက ဖော်ပြပါတယ်။ ပထမအသုတ် ကာကွယ်ဆေး အလုံးရေ သန်း ၂၀၀ ကို ဒီနှစ်ထဲမှာ ဝယ်ယူ ဖြန့်ဝေပေးပြီး ကျန်တဲ့ အရေအတွက်ကတော့ ၂၀၂၂ ခုနှစ်ထဲမှာ ဖြန့်ဝေသွားဖို့ ဖြစ်ပါတယ်။
အမေရိကန် အစိုးရဟာ ဆင်းရဲနွမ်းပါးတဲ့ နိုင်ငံတွေဆီ ကာကွယ်ဆေးတွေ ထောက်ပံ့ ပေးပို့ဖို့ ဘက်ပေါင်းစုံ ဖိအားပေး တောင်းဆိုမှုတွေနဲ့ ကြုံနေရပါတယ်။ ဘိုင်ဒန်ရဲ့ သမ္မတ သက်တမ်းတလျှောက် ပထမဆုံး ပြည်ပ ခရီးစဉ်အဖြစ် ဗြိတိန်ကို သွားရောက်ချိန်မှာပဲ အခုလို ကာကွယ်ဆေး အလုံးရေ သန်း ၅၀၀ ဝယ်ယူ လှူဒါန်းမယ့် သတင်း ထွက်ပေါ်လာတာပါ။
အစောပိုင်းမှာတော့ ဘိုင်ဒန်က သူဟာ နိုင်ငံတကာ ကာကွယ်ဆေး ဖြန့်ဝေမှု ရည်မှန်းချက်နဲ့ ပတ်သက်လို့ အစီအမံတစ်ရပ် ရှိနေကြောင်း၊ မကြာခင်မှာ အများသိအောင် ကြေညာမှာဖြစ်ကြောင်း ပြောကြားထားခဲ့ပါတယ်။
အမေရိကန်ဟာ ကမ္ဘာအနှံ့က ဝင်ငွေနည်းပါးတဲ့ နိုင်ငံ ၉၂ ခုနဲ့ အာဖရိက သမဂ္ဂဆီကို ကာကွယ်ဆေးတွေ တင်ပို့သွားမှာပါ။ အမေရိကန်နည်းတူ ဗြိတိန်နဲ့ ကနေဒါတို့လို နိုင်ငံကြီးတွေကလည်း ကာကွယ်ဆေးတွေ လှူဒါန်းဖို့ စီစဉ်နေပြီလို့ သိရပါတယ်။
Public Service Announcement
