Connect with us

Hi, what are you looking for?

LuduNwayOo

နိုင်ငံတကာ

အစ္စရေး-အီရန် တင်းမာမှု အရှိန်လျော့ကျသွားပြီလို့ ယုံကြည်ရ

အစ္စရေးနဲ့ အီရန်ကြားမှာ တိုက်ရိုက် ပဋိပက္ခဖြစ်မယ့် အလားအလာက လျော့ကျသွားပြီ ဆိုပေမယ့် အီရန်ရဲ့ လက်ဝေခံ လက်နက်ကိုင် အဖွဲ့အစည်းတွေနဲ့ အီရန်ကြား တိုက်ခိုက်မှုတွေကတော့ အရှေ့အလယ်ပိုင်း ဒေသအနှံ့ ဆက်လက် ဖြစ်ပွားနေပါတယ်။

အစ္စရေး-အီရန် တင်းမာမှု အရှိန်လျော့ကျသွားပြီလို့ ယုံကြည်ရ
အစ္စရေး-အီရန် တင်းမာမှု အရှိန်လျော့ကျသွားပြီလို့ ယုံကြည်ရ

နိုင်ငံတကာက စိုးရိမ်တကြီး စောင့်ကြည့်နေတဲ့ အစ္စရေး-အီရန် တင်းမာမှုဟာ အခုအခါ အရှိန်လျော့ပြီး အခြေအနေ ငြိမ်သက်စ ပြုလာပြီလို့ ယုံကြည်ရပါတယ်။

ဒါဟာ ဂါဇာ ပဋိပက္ခအပြင် အရှေ့အလယ်ပိုင်းမှာ နောက်ထပ် နိုင်ငံတကာ စစ်မက်ရေးရာ ပြဿနာကြီးတစ်ခု ပေါ်ပေါက်လာမှာကို စိုးရိမ်နေကြသူတွေအတွက် စိတ်လက် ပေါ့ပါးစရာ ဖြစ်ခဲ့ပါတယ်။

အခုလလယ်တုန်းက အစ္စရေး နိုင်ငံအနှံ့ကို အီရန်က ဒရုန်းတွေနဲ့ ဒုံးကျည်တွေ အသုံးပြု တိုက်ခိုက်ခဲ့တဲ့အပေါ် အစ္စရေးက လက်တုံ့ပြန်မယ်လို့ ကြုံးဝါးထားတဲ့နောက် ဒေသတွင်းမှာ ကျီးလန့်စာစား အနေအထားမျိုး ရှိနေခဲ့ပါတယ်။

ဧပြီ ၁၉ ရက်မှာတော့ အီရန်အလယ်ပိုင်းက အစ္စဖာဟန်မြို့ကို ဒရုန်းတွေနဲ့ တိုက်ခိုက်တာ ခံရပြီး အဲဒီ ဒရုန်းတွေကို ကြားဖြတ် ပစ်ချနိုင်ခဲ့တယ်လို့ အီရန်က ကြေညာပါတယ်။ အမေရိကန် စစ်ဘက် အရာရှိ တချို့က အစ္စရေးဟာ အစ္စဖာဟန်ကို ဒရုန်းတွေအပြင် ဒုံးကျည်တွေနဲ့ပါ ပစ်ခတ်ခဲ့တယ်လို့ ပြောပေမယ့် အီရန်ကတော့ ဒုံးကျည်တွေနဲ့ တိုက်ခိုက် ခံရတယ် ဆိုတာကို ငြင်းဆိုပြီး ရောက်လာတာကလည်း ဒရုန်း အသေးစားလေးတွေသာ ဖြစ်သလို ကြားဖြတ် ပစ်ချနိုင်ခဲ့တယ်လို့ ပြောပါတယ်။

Public Service Announcement

Public Service Announcement

အစ္စဖာဟန်မှာ ကျယ်လောင်တဲ့ ပေါက်ကွဲသံတွေ ကြားနေခဲ့ရတယ်လို့ မျက်မြင်တွေက ပြောပေမယ့်လည်း အီရန်ကတော့ ဒီကိစ္စကို အကျယ်ချဲ့လိုတဲ့ သဘောမျိုး မရှိသလို အစ္စရေးကို လှောင်ပြောင်တာ၊ ခနဲ့တာမျိုးလည်း မလုပ်ဘဲ ခပ်မြန်မြန် အဆုံးသတ်သွားစေလိုဟန်မျိုးသာ ပြောကြားခဲ့ပါတယ်။ အစ္စဖာဟန်မှာ ထိခိုက်သေဆုံးမှု၊ ပျက်စီးမှုတွေလည်း မရှိခဲ့ဘူးလို့ အီရန်က ပြောပါတယ်။

အစ္စရေးက အီရန်ပိုင်နက်ထဲမှာ လေကြောင်းတိုက်ခိုက်ခဲ့တယ် ဆိုတာကို အတည်မပြုသလို ဘာမှတ်ချက်မှ မပေးသေးပါဘူး။ ဒါပေမဲ့လည်း အီရန်ဖက်က အနေအထားကိုကြည့်ပြီး အစ္စရေး ကိုယ်တိုင်လည်း နောက်ထပ် ရန်လိုမှုတွေ ဆက်မလုပ်တော့မယ့် သဘောလို့ ယုံကြည်ရကြောင်း အရှေ့အလယ်ပိုင်းအရေး စောင့်ကြည့်သူတွေက သုံးသပ်ထားကြပါတယ်။

ဧပြီ ၁၃ ရက်နေ့မှာ အီရန်ဟာ အစ္စရေးနိုင်ငံ အနှံ့က စစ်ရေးပစ်မှတ်တွေကို ဒရုန်းနဲ့ ဒုံးကျည် စုစုပေါင်း အစင်း ၃၀၀ လောက် အသုံးပြုပြီး ပစ်ခတ် တိုက်ခိုက်ခဲ့ပါတယ်။ ဒါဟာ ခါးသီးရန်ဘက် နှစ်နိုင်ငံကြားမှာ အချုပ်အခြာ ပိုင်နက်ထဲထိ အတိအလင်း ကျူးကျော်ဝင်ရောက် တိုက်ခိုက်တာ ပထမဆုံး ဖြစ်လာခဲ့ပါတယ်။ အီရန်ကတော့ လဆန်းပိုင်းတုန်းက ဆီးရီးယားမှာရှိတဲ့ အီရန် ကောင်စစ်ဝန်ရုံးကို အစ္စရေးက လေကြောင်းကနေ တိုက်ခိုက်ခဲ့တဲ့အတွက် လက်တုံ့ပြန်ခဲ့တာလို့ ပြောပါတယ်။

အဲဒီကစလို့ နှစ်နိုင်ငံကြား အခြေအနေတွေ တင်းမာခဲ့ပြီး နောက်ဆုံး ဖြစ်ရပ်က အစ္စဖာရန်မှာ ပေါ်ပေါက်ခဲ့တဲ့ ဒရုန်းတိုက်ခိုက်မှုတွေပါ။ အီရန် အစိုးရ ထိပ်တန်း အရာရှိ တစ်ဦးက အခုကိစ္စအတွက် အီရန်ဟာ အစ္စရေးကို သီးခြား လက်တုံ့ပြန်နေတော့မှာ မဟုတ်ကြောင်း စကားနည်း ရန်စဲသဘောမျိုး မှတ်ချက် ပေးသွားခဲ့ပါတယ်။

အစ္စရေးနဲ့ အီရန်ကြားမှာ တိုက်ရိုက် ပဋိပက္ခဖြစ်မယ့် အလားအလာက လျော့ကျသွားပြီ ဆိုပေမယ့် အီရန်ရဲ့ လက်ဝေခံ လက်နက်ကိုင် အဖွဲ့အစည်းတွေနဲ့ အီရန်ကြား တိုက်ခိုက်မှုတွေကတော့ အရှေ့အလယ်ပိုင်း ဒေသအနှံ့ ဆက်လက် ဖြစ်ပွားနေပါတယ်။

ကိုးကား: CNN

ဆက်စပ်သတင်းများ

နိုင်ငံတကာ

အီရန် မီဒီယာတွေကလည်း ရိုင်ဆီ သေဆုံးသွားပြီလို့ ဖော်ပြကြပေမယ့် အစိုးရဆီက တရားဝင် ကြေညာချက်တော့ ထွက်ပေါ်မလာသေးပါဘူး။

နိုင်ငံတကာ

အီရန်မှာ နိုင်ငံတော် အဓိပတိ အယာတိုလာ အလီ ခါမေနီကတော့ ခြွင်းချက်မရှိ အကြီးမားဆုံး ဩဇာကို ပိုင်ဆိုင်ထားပြီး သမ္မတ နေရာရဲ့ အထက်ကနေ ကွပ်ကဲနေပါတယ်။

နိုင်ငံတကာ

အစ္စရေး စစ်တပ် (IDF)ရဲ့ ပြောရေးဆိုခွင့်ရ အရာရှိ ဒန်နီရယ်လ် ဟာဂါရီကလည်း အမေရိကန်ဆီက စစ်လက်နက် အထောက်အပံ့တွေ ရပ်ဆိုင်းထားရင်တောင်မှ ရာဖားဟ်ထိုးစစ်အတွက် စစ်လက်နက် ရင်းမြစ် အလုံအလောက် ပိုင်ဆိုင်ထားပြီး ဖြစ်တယ်လို့ မှတ်ချက်ပေးသွားခဲ့ပါတယ်။

နိုင်ငံတကာ

လက်ရှိ အစ္စရေးဟာ ရာဖားဟ်မှာ လေကြောင်းတိုက်ခိုက်မှုတွေ အပါအဝင် ကန့်သတ်စစ်ဆင်ရေးတချို့ လုပ်ဆောင်နေပေမယ့် မြေပြင်ထိုးစစ်ကြီး အဆင့်ထိ ရောက်နေပြီလို့ အမေရိကန်က သတ်မှတ်မထားသေးကြောင်းလည်း ဘိုင်ဒန်က ဆိုပါတယ်။