အစ္စရေးနဲ့ ပဋိပက္ခမှာ ဝင်မပါဖို့ အမေရိကန်ကို အီရန်က သတိပေး ပြောကြားလိုက်ပါတယ်။
ဧပြီ ၁၃ ရက် ညပိုင်းက အီရန်ကနေ အစ္စရေးနိုင်ငံ အနှံ့ကို ဒရုန်းနဲ့ ဒုံးကျည် အစင်း ၃၀၀ ဝန်းကျင်နဲ့ ပစ်ခတ် တိုက်ခိုက်ခဲ့ပြီး အမေရိကန်က အစ္စရေးဖက်ကနေ ကူညီရင်း အီရန်ရဲ့ စစ်လက်နက်တွေကို ကြားဖြတ် ပစ်ချပေးခဲ့ပါတယ်။
အဲဒီနောက် ကုလသမဂ္ဂဆိုင်ရာ အီရန် သံတမန် အဖွဲ့က အီရန်ရဲ့ တိုက်ခိုက်မှုဟာ တရားမျှတပြီး အမေရိကန် အနေနဲ့ ကြားမဝင်ဖို့ လိုတယ်လို့ သတိပေးလိုက်တာ ဖြစ်ပါတယ်။
အီရန်က ဧပြီ ၁ ရက်နေ့တုန်းက ဆီးရီးယားနိုင်ငံ ဒမတ်စကက်မြို့က အီရန် ကောင်စစ်ဝန်ရုံးကို အစ္စရေးက လေကြောင်းကနေ တိုက်ခိုက်လို့ အီရန် စစ်ဘက် အရာရှိတွေ သေဆုံးခဲ့တဲ့အတွက် အခုလို လက်တုံ့ပြန်တာလို့ အကြောင်းပြခဲ့ပါတယ်။ အစ္စရေးကတော့ ဒမတ်စကက်က ကိစ္စနဲ့ ပတ်သက်လို့ ဝန်ခံတာရော၊ ငြင်းဆန်တာရော မရှိခဲ့ပါဘူး။
Public Service Announcement
ဒီပဋိပက္ခဟာ အီရန်နဲ့ ရန်သူ အစ္စရေး အစိုးရကြားက ပြဿနာသာဖြစ်ကြောင်း၊ အမေရိကန်ဟာ ခပ်ဝေးဝေးပဲ နေသင့်ကြောင်း ကုလသမဂ္ဂဆိုင်ရာ အီရန်မစ်ရှင်က ကြေညာချက် ထုတ်ပြန်ခဲ့ပါတယ်။
အမေရိကန်ကတော့ အရှေ့အလယ်ပိုင်းမှာ ဖြန့်ကျက်ထားတဲ့ အမေရိကန် တပ်တွေဟာ အစ္စရေးဆီ ဦးတည်လာနေတဲ့ ဒုံးကျည်တွေနဲ့ ဒရုန်းတွေကို ကူညီ ပစ်ချပေးခဲ့သလို အစ္စရေးအတွက် ခံစစ်ပိုင်းဆိုင်ရာ အကူအညီတွေလည်း ထပ်မံ ပံ့ပိုးပေးခဲ့တယ်လို့ ကြေညာပါတယ်။
တစ်ဖက်မှာတော့ အီရန်ရဲ့ ကုလသမဂ္ဂဆိုင်ရာ မစ်ရှင်က ကုလသမဂ္ဂ ပဋိညာဉ်ပါ ပြဋ္ဌာန်းချက်အမှတ် ၅၁ အရ အီရန်ဟာ ကိုယ့်နိုင်ငံကို တခြားနိုင်ငံ တစ်ခုက ထိပါးလာရင် တရားဝင် ခုခံ တုံ့ပြန်ခွင့်ရှိတယ်ဆိုတဲ့အတိုင်း တုံ့ပြန်ခဲ့တာလို့ ပြောပါတယ်။
အီရန်ရဲ့ တိုက်ခိုက်မှုတွေအပြီး အစ္စရေးက ဘယ်လို ခြေလှမ်းပြင်လာမလဲ ဆိုတာကို မသိရသေးပါဘူး။ အစ္စရေး ဝန်ကြီးချုပ် ဘင်ဂျမင် နေတန်ညာဟုက အစ္စရေး စစ်တပ်ဟာ အီရန်ရဲ့ တိုက်ရိုက် တိုက်ခိုက်လာနိုင်တဲ့ အခြေအနေတွေကို ကြိုတင် မှန်းဆပြီး ပြင်ဆင်ထားခဲ့တယ်လို့ ဆိုပါတယ်။ အစ္စရေး စစ်တပ်ရဲ့ အဆိုအရ အီရန် ပစ်လွှတ်ခဲ့တဲ့ ဒရုန်းနဲ့ ဒုံးကျည်တွေထဲက ၉၉ ရာခိုင်နှုန်းကို မဟာမိတ်တွေနဲ့ ပူးပေါင်းပြီး ကြားဖြတ် ပစ်ချနိုင်ခဲ့တယ်လို့ သိရပါတယ်။
ကိုးကား: Sky
