Connect with us

Hi, what are you looking for?

LuduNwayOo

နိုင်ငံတကာ

ထိုင်ဝမ်ကို တရုတ် တိုက်ခိုက်ဖို့ မဖြစ်နိုင်သေးဘူးလို့ အမေရိကန် ထိပ်တန်းဗိုလ်ချုပ်ကြီး သုံးသပ်

ထိုင်ဝမ်ကို တရုတ်က တိုက်ခိုက်ဖို့ဆိုတာ လတ်တလော ဖြစ်နိုင်ခြေ နည်းပါးလွန်းတယ်လို့ အမေရိကန် ထိပ်တန်း စစ်ဗိုလ်ချုပ်ကြီး တစ်ဦးက သုံးသပ် ပြောကြားသွားခဲ့ပါတယ်။

တရုတ်ဟာ သီးခြားနိုင်ငံ တစ်ခုအဖြစ် ရပ်တည်နေတဲ့ ထိုင်ဝမ်ကို ပိုင်နက် နယ်မြေအဖြစ် သတ်မှတ်ထားပါတယ်။ လိုအပ်လာရင် ထိုင်ဝမ်ကို စစ်အင်အားသုံးပြီး တိုက်ခိုက် သိမ်းပိုက်မယ်လို့လည်း တရုတ်က ခြိမ်းခြောက်ထားဖူးပါတယ်။

မကြာသေးခင် လပိုင်းတွေအတွင်း ထိုင်ဝမ်ကျွန်းနားမှာ တရုတ် ရေတပ်နဲ့ လေတပ်ရဲ့ လှုပ်ရှားမှုတွေ ပိုမို များပြားလာတဲ့အပေါ် ထိုင်ဝမ် အစိုးရကရော၊ အမေရိကန်ကပါ စိုးရိမ်နေပါတယ်။ ဒါပေမဲ့ အမေရိကန်ရဲ့ မဟာဗျူဟာ ပူးပေါင်းစစ်ဆင်ရေးဌာန အကြီးအကဲ ဗိုလ်ချုပ်ကြီး မတ်ခ် မီလေးကတော့ ထိုင်ဝမ်ဟာ လောလောလတ်လတ် အခြေအနေမှာတော့ တရုတ်ရဲ့ ကျူးကျော်မှုကို ခံရနိုင်တဲ့ အန္တရာယ် မရှိလောက်သေးဘူးလို့ မှတ်ချက် ပေးခဲ့ပါတယ်။

အမေရိကန် လွှတ်တော် အမတ်တွေဆီ တွေ့ဆုံ အစီရင်ခံတဲ့ အခါမှာ မီလေးက ထိုင်ဝမ်ဟာ တရုတ်အတွက် အဓိက စိတ်အဝင်စားဆုံး အကြောင်းအရာ တစ်ခုအဖြစ် ဆက်ရှိနေဆဲလို့ ပြောပါတယ်။ ဒါပေမဲ့ ထိုင်ဝမ်ကို စစ်တိုက်ပြီး သိမ်းပိုက်ဖို့တော့ ဘယ်လို အကြောင်းပြချက်မှ မရှိကြောင်း၊ ဒါကို တရုတ် ကိုယ်တိုင်ကလည်း နားလည်ပြီးဖြစ်ကြောင်း၊ တရုတ်က အချိန်တိုအတွင်း ထိုင်ဝမ်ကို ကျူးကျော်စစ် ပြုလာနိုင်ဖို့ ဖြစ်နိုင်ခြေက အရမ်းနည်းလွန်းတယ်လို့ ယုံကြည်ကြောင်း မီလေးက ဆိုပါတယ်။

တရုတ်ဟာ ထိုင်ဝမ်ကို တကယ်ပဲ သိမ်းယူဖို့ ဆုံးဖြတ်လိုက်ပြီဆိုရင် ဒီအတွက် စစ်အင်အား ပြင်ဆင် တည်ဆောက်ဖို့ အချိန်ယူရလိမ့်ဦးမယ်လို့ သူက ရှင်းပြပါတယ်။ အမေရိကန်ဟာ ထိုင်ဝမ်ကို အဓိက ထောက်ခံ ရပ်တည်ပေးနေတဲ့ အင်အားကြီး နိုင်ငံဖြစ်ပြီး ထိုင်ဝမ်အတွက် လက်နက်တွေကိုလည်း ရောင်းချပေးနေပါတယ်။ ဒီအခြေအနေက တရုတ်ကို အကြီးအကျယ် ဒေါသထွက်စေပါတယ်။

တရုတ် အစိုးရက ထိုင်ဝမ်ဟာ တရုတ်ရဲ့ အစိတ်အပိုင်း တစ်ခုသာဖြစ်ပြီး ထိုင်ဝမ်နဲ့ ပတ်သက်လို့ ပြည်ပနိုင်ငံတွေရဲ့ ဝင်ရောက် စွက်ဖက်မှုတိုင်းဟာ တရုတ်ပြည်တွင်းရေးလို့ သတ်မှတ်နိုင်ကြောင်း သတိပေးထားပါတယ်။

You May Also Like

နိုင်ငံတကာ

M1A2တွေဟာ အရင်မျိုးဆက်ရဲ့ ဒီဇိုင်းဟောင်းကို အကြီးအကျယ် မွမ်းမံ ပြင်ဆင်မှုတွေ အားဖြည့်ထားတာဖြစ်ပြီး ပိုပြီး ပစ်အားပြင်းပြင်းနဲ့ ဝေးဝေးရောက်နိုင်တဲ့ အမြောက်၊ ကာကွယ်ရေး အစီအမံတွေနဲ့ တခြား ခေတ်မီ နည်းပညာတွေ ပေါင်းစပ်ထားလိုက်ပါတယ်။

သတင်း

AviChinaဟာ ၂၀၂၁ ခုနှစ်၊ ဒီဇင်ဘာလတုန်းက မြန်မာစစ်တပ်အတွက် အပေါ့စားလေယာဉ်တွေ ပို့ဆောင်ပေးခဲ့ပြီး Bharat Electronicsကတော့ ၂၀၂၁ ခုနှစ်၊ ဇူလိုင်လတုန်းကမြန်မာနိုင်ငံမှာအဝေးထိန်းလက်နက်ရုံတစ်ခုတည်ဆောက်ပေးခဲ့တယ်လို့သိရပါတယ်။

ဗီဒီယို

ရုရှားနိုင်ငံဆိုင်ရာ အမေရိကန် သံရုံးကတော့ အခုကိစ္စနဲ့ ပတ်သက်ပြီး အမေရိကန်ဟာ ရုရှားကို နောက်တစ်ကြိမ် ပေါ်ပေါ်ထင်ထင် ရန်စလိုက်တာ ဖြစ်တယ်လို့ စွပ်စွဲထားပါတယ်။

နိုင်ငံတကာ

တရုတ်နှစ်သစ်ကူးကို အကြောင်းပြုပြီး ဒေသတချို့မှာ ရောဂါ ဖြစ်ပွားနှုန်း တိုးလာတာမျိုး ကြုံကောင်း ကြုံရနိုင်ကြောင်း၊ ဒါပေမဲ့ နောက်တစ်ကြိမ် ကိုဗစ်ကူးစက်မှုလှိုင်း အကြီးအကျယ် ရိုက်ခတ်တာမျိုးကတော့ လာမယ့် လပိုင်းတွေအတွင်း မဖြစ်နိုင်လောက်တော့ကြောင်း ဝူက မှတ်ချက် ပေးခဲ့ပါတယ်။