ဝန်ကြီးချုပ် ဖြစ်အပြီး နာရီပိုင်း အကြာမှာ နုတ်ထွက်သွားတဲ့ အမျိုးသမီးဟာ အခုအခါမှာ ဆွီဒင် ဝန်ကြီးချုပ်အဖြစ် ပြန်လည် ခန့်အပ် ခံလိုက်ရပြန်ပြီ ဖြစ်ပါတယ်။
ဆိုရှယ် ဒီမိုကရက်တစ် ပါတီ ခေါင်းဆောင် မက်ဒါလီနာ အန်ဒါဆန်ဟာ ပြီးခဲ့တဲ့ သီတင်းပတ်မှာ ဆွီဒင်ရဲ့ ပထမဆုံးသော အမျိုးသမီး ဝန်ကြီးချုပ်အဖြစ် ခန့်အပ် ခံခဲ့ရပါတယ်။ ဒါပေမဲ့ အစိုးရ ဘတ်ဂျတ် အစီအမံ တစ်ရပ် လွှတ်တော်မှာ ထောက်ခံမှု မရခဲ့တဲ့နောက် နာရီပိုင်း အတွင်းမှာပဲ အန်ဒါဆန်က နုတ်ထွက်သွားခဲ့ပါတယ်။
ဒီအခြေအနေက ဆွီဒင် နိုင်ငံရေးမှာ အရှုပ်အထွေးတချို့ ပေါ်ပေါက်လာစေခဲ့ပြီး အခု အခါမှာတော့ လွှတ်တော် အမတ် အများစုရဲ့ ထောက်ခံမှုနဲ့အတူ အန်ဒါဆန်က ဝန်ကြီးချုပ် ပြန်ဖြစ်လာခဲ့တာပါ။ အန်ဒါဆန်ကလည်း သူဟာ ညွန့်ပေါင်း အစိုးရ အနေနဲ့ မဟုတ်ဘဲ ဆိုရှယ် ဒီမိုကရက်တစ် ပါတီကသာ ဦးဆောင်တဲ့ အစိုးရ အဖွဲ့ရဲ့ ဝန်ကြီးချုပ်အဖြစ် ပြန်လည် တာဝန်ယူဖို့ မျှော်လင့်ကြောင်း ပထမအကြိမ် နုတ်ထွက်စဉ် ကတည်းက ပြောဆိုဖူးပါတယ်။
အခုတော့ သူဟာ တစ်ပါတီ အစိုးရကို ဦးဆောင်ရင်း လာမယ့်နှစ်၊ စက်တင်ဘာလမှာ ကျင်းပမယ့် ရွေးကောက်ပွဲမှာ ဆိုရှယ် ဒီမိုကရက်တစ်တွေ အခြေအနေကောင်းအောင် ကြိုးစားရပါတော့မယ်။ ပြီးခဲ့တဲ့ သီတင်းပတ်မှာတော့ ဆွီဒင်ရဲ့ ညွန့်ပေါင်း အစိုးရ ပြိုကွဲသွားပြီး အန်ဒါဆန်ကလည်း ဝန်ကြီးချုပ် ရာထူးက ချက်ချင်း နုတ်ထွက်ခဲ့တာ ဖြစ်ပါတယ်။
Public Service Announcement
အသက် ၅၄ နှစ် ရှိပြီဖြစ်တဲ့ စီးပွားရေး ပညာရှင်ဟာ ဂရင်းပါတီနဲ့ ညွန့်ပေါင်းအစိုးရ ဖွဲ့ဖို့ စီစဉ်ခဲ့ပေမယ့် သူ့ရဲ့ ဘတ်ဂျတ် အဆိုပြုချက်က လွှတ်တော်မှာ အရေးနိမ့်ခဲ့တဲ့နောက် ရာထူးက နုတ်ထွက်ကြောင်း ကြေညာခဲ့ပါတယ်။ အထူးသဖြင့် လက်ယာစွန်း ဆွီဒင် ဒီမိုကရက် အင်အားစုလို အတိုက်အခံ ပါတီတွေက လွှတ်တော် မဲခွဲမှုမှာ အန်ဒါဆန်ကို ဆန့်ကျင် ရပ်တည်ခဲ့ကြပါတယ်။
နောက်ပိုင်းမှာတော့ နိုင်ငံရေး အကျပ်အတည်းတွေ ဖြစ်လာနိုင်ခြေ ရှိတဲ့အတွက် ကြားပါတီ တချို့ရဲ့ လွှတ်တော် အမတ်တွေက အန်ဒါဆန်ကို ထောက်ခံဖို့ သဘောတူလာခဲ့ကြပါတယ်။ ဒါပေမဲ့ ဆွီဒင်ရဲ့ နိုင်ငံရေး ဇာတ်မျောက အဆုံးသတ်သွားဖို့ အဝေးကြီး လိုဦးမယ်လို့ လေ့လာသူတွေက ပြောပါတယ်။
အန်ဒါဆန်ဟာ ၇ နှစ်ကြာ ဆွီဒင် ဝန်ကြီးချုပ်အဖြစ် တာဝန်ယူခဲ့တဲ့ စတီဖန် လော့ဖ်ဗန်ရဲ့ နေရာမှာ အစားထိုး တာဝန် ယူသွားမှာပါ။ အန်ဒါဆန် ဝန်ကြီးချုပ် ရာထူးကို မဆက်ခံခင် အတောအတွင်း လော့ဖ်ဗန်က ယာယီ ဝန်ကြီးချုပ်အဖြစ် ဆက်ရှိနေကြောင်းလည်း သိရပါတယ်။
