ဘာကီနာဖာဆို နိုင်ငံက ရွှေတွင်းတစ်ခုမှာ ပေါက်ကွဲမှု ဖြစ်ပွားရာက လူ ၆၀ ကျော် သေဆုံးသွားကြောင်း သိရပါတယ်။
နိုင်ငံ အနောက်တောင်ပိုင်းက ဂေါ်ဝါမြို့မှာ ဖေဖော်ဝါရီ ၂၁ ရက်က ပေါက်ကွဲမှု ဖြစ်ခဲ့တာလို့ ဒေသခံ အစိုးရ ရှေ့နေ အယ်လ်ဖာ ကွမ်ပိုရီက ပြောပါတယ်။ နောက်ထပ် ၄၈ နာရီ အကြာမှာ အသေအပျောက် ၆၃ ဦး စာရင်းရထားပြီး ၁၀၀ ကျော် ရှိလာပါပြီ။
ဂေါ်ဝါမြို့စွန်က ဘွမ်ဘလိုရာ ရပ်ကွက်မှာ ဖြစ်ပွားတဲ့ ပေါက်ကွဲမှုဟာ ရွှေတူးရာမှာ အသုံးပြုတဲ့ ဓာတုပစ္စည်းတွေ စုပုံထားရာ နေရာက အစပြုတယ်လို့ ယုံကြည်ရပါတယ်။ အစိုးရပိုင် ရုပ်မြင်သံကြား ဌာနက အခင်းဖြစ်ရာ နေရာနားမှာ ရုပ်အလောင်းတွေကို အဝတ်တွေ ဖုံးထားပုံတွေ၊ ဆေးရုံမှာ လူနာတွေကို ကုသပေးနေပုံတွေကို ထုတ်လွှင့် ပြသခဲ့ပါတယ်။
ပေါက်ကွဲမှုအပြီး ကူညီဖို့ သွားရောက်တဲ့အခါ နေရာတိုင်းလိုလိုမှာ အလောင်းတွေကို မြင်နေရပြီး ကြောက်စရာ ကောင်းလွန်းတယ်လို့ မျက်မြင် တစ်ဦးက ဖွင့်ဟပါတယ်။ ပထမဆုံး ပေါက်ကွဲမှု အပြီး လူတွေက အထိတ်တလန့် ထွက်ပြေးချိန်မှာ ဆင့်ကဲ ပေါက်ကွဲမှုတွေ ထပ်ဖြစ်ခဲ့တယ်လို့ သိရပါတယ်။
ဘာကီနာဖာဆိုဟာ အာဖရိကတိုက်မှာ ရွှေထုတ်လုပ်ရေး လုပ်ငန်း ဖွံ့ဖြိုးမှု အမြန်ဆုံး နိုင်ငံတစ်ခု ဖြစ်ပါတယ်။ ရွှေတူးတဲ့ လုပ်ငန်းက လူပေါင်း ၁ သန်းခွဲလောက်ကို အလုပ်အကိုင် ရရှိစေပြီး ၂၀၁၉ ခုနှစ်မှာ ဝင်ငွေ စုစုပေါင်း ဒေါ်လာ ၂ ဘီလီယံလောက် ရရှိလာပါတယ်။
အခု ပေါက်ကွဲမှု ဖြစ်ပွားတဲ့ နေရာလိုမျိုး ရွှေမိုင်းတွင်း အသေးစားလေးတွေလည်း နိုင်ငံအနှံ့မှာ အလျှိုအလျှို ပေါ်လာပြီး ရရှိတဲ့ ရွှေတွေကို တိုဂို၊ နိုက်ဂျား၊ ဂါနာနဲ့ ဘီနင်တို့လို အိမ်နီးချင်း နိုင်ငံတွေဆီ မှောင်ခို တင်ပို့လေ့ ရှိပါတယ်။ ဒါ့အပြင် အယ်လ်ကိုင်ဒါနဲ့ အိုင်အက်စ်လို အကြမ်းဖက် အဖွဲ့အစည်း တချို့ကလည်း ဘာကီနာဖာဆိုမှာ အသေးစား ရွှေတူးဖော်ရေး လုပ်ငန်းတွေနဲ့ ဘဏ္ဍာငွေ ရှာဖွေတတ်ကြပါတယ်။
ပညာရှင်တွေကတော့ အဲဒီလို မိုင်းတွင်း အသေးလေးတွေဟာ ခနော်နီ ခနော်နဲ့ တည်ဆောက်ထားလေ့ ရှိကြပြီး လုံခြုံရေး စံနှုန်းအရ အရမ်း အန္တရာယ်ကြီးတဲ့ အနေအထားတွေ ဖြစ်နေတတ်ကြောင်း သတိပေးထားကြပါတယ်။