ထိုင်ဝမ် ရေလက်ကြားမှာ ရေနံတင်သင်္ဘောတစ်စီး နစ်မြုပ်ပြီး မြန်မာနိုင်ငံသား ရေယာဉ် အရာရှိတစ်ဦး သေဆုံးခဲ့ကြောင်း သိရပါတယ်။
အောက်တိုဘာ ၁၅ ရက် မနက်ပိုင်းက ထိုင်ဝမ်ပိုင် ဝူကျူကျွန်းရဲ့ တောင်ဖက် ရေမိုင် ၂၅ မိုင်လောက် အကွာမှာ Kelsey 2 ရေနံတင်သင်္ဘော နစ်မြုပ်ခဲ့ကြောင်း မိခင် ကုမ္ပဏီဖြစ်တဲ့ Wooshin Marineက ထုတ်ပြန်ပါတယ်။ သင်္ဘောဟာ ရေနံနဲ့ တခြား ဓာတုဗေဒပစ္စည်း တန်ချိန် ၇၅၀၀ လောက်ကို တင်ဆောင်ပြီး ဟောင်ကောင်ကနေ တောင်ကိုရီးယားနိုင်ငံ၊ ဂွန်ဆန်မြို့ကို ဦးတည် ခုတ်မောင်းနေရင်း နစ်မြုပ်သွားခဲ့တာပါ။
ကယ်ဆယ်ရေး လုပ်ငန်းတွေ အပြီးသတ်လိုက်တဲ့ အောက်တိုဘာ ၁၆ ရက် မနက်ပိုင်းမှာတော့ ရေယာဉ် အမှုထမ်း ၂၀ အနက် ၁၉ ဦးကို ကယ်တင်နိုင်ခဲ့ပြီး ၁ ဦး သေဆုံးခဲ့ကြောင်း ကြေညာပါတယ်။ သေဆုံးသူက ဘယ်နိုင်ငံသားလဲ ဆိုတာကိုတော့ ကုမ္ပဏီက မကြေညာသေးပါဘူး။
ဒါပေမဲ့ မြန်မာနိုင်ငံက သင်္ဘောသားရေးရာ သတင်းအချက်အလက်တွေ ဖော်ပြနေတဲ့ Facebook စာမျက်နှာတွေရဲ့ အဆိုအရတော့ Kelsey 2 နစ်မြုပ်မှုမှာ သေဆုံးသူဟာ မြန်မာနိုင်ငံသား Chief Officer ကိုတင်မောင်ဦး ဖြစ်တယ်လို့ သိရပါတယ်။
Public Service Announcement
ရေယာဉ် နစ်မြုပ်မှုနဲ့ ပတ်သက်လို့ ကုမ္ပဏီက စုံစမ်း စစ်ဆေးမှုတွေ ဆက်လက် လုပ်ဆောင်နေပါတယ်။ ကနဦး သတင်း အချက်အလက်တွေအရ သင်္ဘောဟာ ပင်လယ်ပြင်မှာ ချွတ်ယွင်းမှုတစ်ခု ကြုံတွေ့ခဲ့တာကြောင့် အရှိန်လျှော့ မောင်းနှင်နေရာက အင်ဂျင်ခန်းထဲ ရေတွေဝင်လာပြီး နစ်မြုပ်သွားခဲ့တာလို့ သိရပါတယ်။
Kelsey 2 သင်္ဘောကို ၂၀၀၂ ခုနှစ်မှာ တည်ဆောက်ပြီးစီးခဲ့ပြီး တောင်ကိုရီးယား နိုင်ငံမှာ မှတ်ပုံတင်ထားကြောင်း ကုမ္ပဏီက ထုတ်ပြန်တဲ့ မှတ်တမ်းတွေမှာ ဖော်ပြထားပါတယ်။
