တရုတ်နိုင်ငံက ဆေးရုံတစ်ခုမှာ မီးလောင်ကျွမ်းမှုကြောင့် လူ ၃၀ နီးပါး သေဆုံးခဲ့ကြောင်း သိရပါတယ်။
ဘေဂျင်းမြို့တော်က ချန်ဖန်း ဆေးရုံအဖြစ် ဖွင့်လှစ်ထားရာ အထပ်မြင့် အဆောက်အအုံမှာ ဧပြီ ၁၈ ရက်က မီးလောင်မှု ဖြစ်ခဲ့တာပါ။ ဆေးရုံရဲ့ အတွင်းလူနာဆောင်က စတင်တဲ့ မီးကြောင့် ဆေးရုံဝန်ထမ်းတွေနဲ့ လူနာတွေ အပါအဝင် စုစုပေါင်း ၂၉ ဦး သေဆုံးခဲ့ပြီး ၇၀ လောက်ကို အရေးပေါ် ရွှေ့ပြောင်းပေးခဲ့ရပါတယ်။
အခုမီးလောင်ကျွမ်းမှုဟာ ဘေဂျင်းမှာတော့ ဆယ်စုနှစ် နှစ်ခုကျော် ကာလအတွင်း အသေအပျောက် အများဆုံး ဆေးရုံ မီးလောင်မှုအဖြစ် မှတ်တမ်းဝင်လာခဲ့ပါတယ်။
မီးလောင်နေချိန်မှာ ရိုက်ယူထားတဲ့ မိုဘိုင်းဖုန်း ဗီဒီယို မှတ်တမ်းတွေအရ ပြတင်းပေါက် အပြင်ဖက်မှာ တပ်ထားတဲ့ အဲကွန်းတွေပေါ်မှာ လူတွေ ထွက်ထိုင်ရင်း မီးအပူရှိန်နဲ့ မီးခိုးလုံးတွေကို ရှောင်ရှားနေတာ တွေ့ရသလို တချို့ကလည်း အဝတ်တွေကို ဆက်ပြီး ချည်ထားတဲ့ ကြိုးတွေနဲ့ ပြတင်းပေါက်ကနေ စွန့်စွန့်စားစား တွယ်ဆင်းနေတာကို မြင်ခဲ့ရပါတယ်။
Public Service Announcement
မီးစတင် လောင်ကျွမ်းရတဲ့ အကြောင်းရင်းကို အတိအကျ မသိရသေးပါဘူး။ အစိုးရပိုင် CCTV သတင်းဌာနကတော့ ဆေးရုံ မီးလောင်မှုနဲ့ ပတ်သက်လို့ စုံစမ်းစစ်ဆေးမှုတွေ လုပ်ဆောင်နေတယ်လို့ ကြေညာပါတယ်။ ဆေးရုံ မီးလောင်မှုမှာ ထိခိုက်ဒဏ်ရာရသူ ဘယ်လောက် ရှိခဲ့သလဲ ဆိုတာကလည်း အတိအကျ မထုတ်ပြန်ဘဲ ဝေဝေဝါးဝါး ဖြစ်နေဆဲပါ။
ဧပြီ ၁၉ ရက်မှာတော့ ဘေဂျင်း ရဲတပ်ဖွဲ့က ဆေးရုံအုပ်နဲ့ ဆေးရုံမှာ ပြင်ဆင် မွမ်းမံမှုတွေ လုပ်ဆောင်နေတဲ့ ဆောက်လုပ်ရေး လုပ်သားတွေ အပါအဝင် စုစုပေါင်း ၁၂ ဦးကို ပေါ့လျော့မှုနဲ့ ဖမ်းဆီးထားတယ်လို့ သိရပါတယ်။
အစောပိုင်းက ဆေးရုံမီးလောင်နေချိန် ရိုက်ကူးထားတဲ့ ဗီဒီယို မှတ်တမ်း တော်တော်များများက တရုတ် လူမှုကွန်ရက် မီဒီယာဖြစ်တဲ့ Weiboပေါ်မှာ ပျံ့နှံ့ခဲ့ပေမယ့် နောက်ပိုင်းမှာတော့ ဆင်ဆာ တင်းကျပ်တဲ့ အာဏာပိုင်တွေက လိုက်လံ ဖယ်ရှားပစ်ခဲ့ပါတယ်။
ဆေးရုံ တာဝန်ရှိသူတွေက သေဆုံးသူတွေ ဘယ်သူဘယ်ဝါ ဆိုတာကို တိတိကျကျ မထုတ်ပြန်သေးတာကြောင့် ဆေးရုံမှာ တက်ရောက် ကုသနေတဲ့ လူနာတွေရဲ့ မိသားစုဝင်တွေက စိုးရိမ်တကြီး သတင်းစုံစမ်းနေပါတယ်။ တချို့ လူနာတွေရဲ့ မိသားစုတွေကတော့ မီးငြိမ်းပြီး နာရီပေါင်း များစွာ ကြာတဲ့ထိ ဆေးရုံဖက်က ဖုန်းဆက်ပြီး အကြောင်းကြားတာမျိုး မရှိတဲ့အပေါ် ဒေါသတကြီး ဝေဖန်နေကြပါတယ်။
